* ఈ విషయాన్ని ప్రభుత్వం సీరియస్‌గా పరిగణిస్తోంది

* చిలుకూరు బాలాజీ ఆలయం వద్ద భద్రత పెంపు

* ఐటీ, పరిశ్రమల శాఖ మంత్రి శ్రీధర్‌బాబు

* కాంగ్రెస్ నేతలు, ప్రజాప్రతినిధులతో కలిసి అర్చకుడు రంగరాజన్‌కు పరామర్శ

రంగారెడ్డి/హైదరాబాద్ సిటీబ్యూరో, ఫిబ్రవరి11(విజయక్రాంతి): రాముడి పేరు తో దాడులు చేస్తే సహించేది లేదని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు హెచ్చరించారు. మంగళవారం రంగా రెడ్డి జిల్లా మొయినాబాద్ మండలం చిలుకూరు బాలాజీ ఆలయ ప్రధాన అర్చకుడు రంగరాజన్‌ను ప్రభుత్వ విప్, ఎమ్మెల్సీ మహేందర్‌రెడ్డి, ఎమ్మెల్యే కాలె యాదయ్య,  కాంగ్రెస్ సీనియర్ నేత వీహెచ్ హనుమంతరావుతో కలిసి పరామర్శించారు.

అర్చకుడు రంగరాజన్‌పై ఇటీవల జరిగిన దాడిని తీవ్రంగా ఖండించారు. ఘటనకు సంబంధించిన వివరాలను ఆరా తీశారు. అనంతరం మంత్రి మీడియాతో మాట్లాడుతూ.. రంగరాజన్‌పై జరిగిన దాడిని ప్రభుత్వం తీవ్రంగా పరిగణిస్తోందని తెలిపారు. రామరాజ్యం పేరిట, దేవుడి పేరుతో అరాచకాలు సృష్టిస్తే సహించేది లేదన్నారు.

దాడులకు పాల్పడిన వారిలో కొందరిని పోలీసులు ఇప్పటికే అరెస్ట్ చేసినట్లు చెప్పారు. చిలుకూరు బాలాజీ ఆలయం వద్ద భద్రత పెంచాలని అధికారులకు ఆదేశాలు ఇచ్చామన్నారు. ఎమ్మెల్సీ మహేందర్‌రెడ్డి మాట్లాడుతూ.. ఆలయ భద్రత విషయంలో ప్రభుత్వం పూర్తిస్థాయిలో చర్యలు తీసుకొంటుందన్నారు.

మతోన్మాద సంస్కృతి ప్రమాదకరం

అదుపుతప్పిన మతోన్మాద సంస్కృతిని నియంత్రణ చేయాలని మానవ హక్కుల వేదిక రాష్ట్ర అధ్యక్షుడు ఆత్రం భుజంగరావు, ప్రధాన కార్యదర్శి డాక్టర్ ఎస్.తిరుపతయ్య ప్రభుత్వాన్ని కోరారు. చిలుకూరు బాలాజీ ఆలయ అర్చకుడు రంగరాజన్‌పై రామరా జ్యం పేరుతో జరిగిన దాడిని ఖండిస్తూ  మంగళవారం ఒక ప్రకటన విడుదల చేశా రు.

రంగరాజన్‌పై దాడికి పాల్పడ్డ వ్యక్తులను చట్టబద్ధంగా శిక్షించడమే కాకుండా, అందు కు ప్రేరేపిస్తున్న సామాజిక వాతావరణాన్ని కూడా ప్రభుత్వం నియంత్రించాలన్నారు. రాజ్యాంగానికి లోబడి ఆలయాన్ని నిర్వహించుకుంటున్న పూజారిపై దాడి చేయటం అనాగరికమన్నారు. 

నిందితులను కఠినంగా శిక్షించాలి.. 

చిలుకూరు బాలాజీ ఆలయ ప్రధాన అర్చకుడు రంగరాజన్‌పై జరిగిన దాడిని తీవ్రం గా ఖండిస్తున్నామని కాంగ్రెస్ సీనియర్ నాయకుడు కే మురళీ ధర్‌రెడ్డి తెలిపారు. ఇది కేవలం ఒక వ్యక్తిపై జరిగిన దాడి మాత్రమే కాదని మంగళవారం ఆయన ఒక ప్రకటనలో పేర్కొన్నా రు.

సనాతన ధర్మంపై జరిగిన దాడిగా భావించి, దాడి చేసిన వారిపై కఠిన చర్య లు తీసుకోవాలన్నారు. రంగరాజన్‌ను సీఎం రేవంత్‌రెడ్డి ఫోన్లో పరామర్శించి, అండగా ఉంటామని ధైర్యం చెప్పారన్నారు. అలాగే దాడికి పాల్పడిన వారిపై కఠిన చర్యలు తీసుకోవాలని సీఎం పోలీసులను ఆదేశించారని తెలిపారు.