రోడ్డు ప్రమాదంలో యువకుడు మృతి
నర్సాపూర్: ద్విచక్రవాహనం అదుపుతప్పి కిందపడటంతో ఓ యువకుడు అక్కడికక్కడే మృతి చెందిన సంఘటన నర్సాపూర్(Narsapur) మండల పరిధిలో చోటుచేసుకుంది. పోలీసుల వివరాల ప్రకారం... నర్సాపూర్ మండలం చిన్నచింతకుంట గ్రామానికి చెందిన ఏంబరి నరేష్ (21) కార్ డ్రైవర్ గా పని చేసుకుంటూ జీవనం సాగిస్తున్నాడు. దసరా పండుగ సందర్భంగా స్నేహితులను కలిసేందుకు ఈ నెల 20న రాత్రి బైక్‌పై ఇంటి నుంచి బయలుదేరాడు. రాత్రయినా అతను తిరిగి రాకపోవడంతో కుటుంబసభ్యులు గాలింపు చేపట్టారు.
గురువారం ఉదయం బ్రాహ్మణపల్లి గ్రామ శివారులోని రోడ్డు పక్కన ఉన్న పొలంలో నరేష్ మృతదేహంతో పాటు అతని బైక్ ఉన్నట్లు గ్రామస్తులు కుటుంబసభ్యులకు సమాచారం అందించారు. ద్విచక్రవాహనం స్కిడ్ అయి కిందపడటంతో తీవ్ర గాయాలై నరేష్ మృతిచెందాడని, ఈ ఘటనపై ఎవరిపైనా అనుమానం లేదని తండ్రి కుమార్ పోలీసులకు ఫిర్యాదు చేశారు. ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.
