Breaking News

పంటలు ఎండుతుంటే.. ఇతర రాష్ట్రాలకు ఇస్తారా • ఢిల్లీలో హైటెన్షన్‌... బారికేడ్లు ఎక్కిన రాహుల్‌ • రాజ్యసభ బరిలో దినేష్ ఆర్య.. నామినేషన్ దాఖలు • నిజామాబాద్‌లో హైటెన్షన్..ఎమ్మెల్యే అరెస్ట్! • ఢిల్లీలో హైటెన్షన్.. ఎంపీల ర్యాలీ! • స్టేషనరీ పేరుతో బాణాసంచా స్మగ్లింగ్! • బెంగాల్‌ ఉప ఎన్నికల్లో హైటెన్షన్! • కరెంట్ బిల్లు మోత మోగనుందా? • దుకాణాల క్లోజింగ్‌.. హైకోర్టు సీరియస్ • ఈసీ ఆఫీస్‌ వద్ద టెన్షన్‌..మీడియాకు నో ఎంట్రీ •

Districts - Nagarkurnool

కొల్లాపూర్ ఆర్టీసీ బస్టాండ్ కంపు కంపు

కొల్లాపూర్: నాగర్ కర్నూల్ జిల్లా కొల్లాపూర్ ఆర్టీసీ బస్టాండ్ ఆవరణం అపరిశుభ్రతతో ప్రయాణికులకు తీవ్ర అసౌకర్యాన్ని కలిగిస్తోంది. మూత్రశాలలు, మలవిసర్జనతో దుర్వాసన వెదజల్లుతుండటంతో ప్రజలు ఆగ్రహం వ్యక్తం చేస్తున్నారు. హైదరాబాద్, పెబ్బేరు, వనపర్తి నుండి వచ్చే ప్రయాణికులు బస్సు దిగగానే దుర్వాసనతో ఆవేదన చెందుతున్నారు. మున్సిపల్ పరిధిలో ఉన్న ఈ ప్రాంగణం పరిశుభ్రత విషయంలో నిర్లక్ష్యానికి గురవుతోందని ప్రయాణికులు ఆరోపిస్తున్నారు. అవగాహన బోర్డులు ఏర్పాటు చేసి, నిరంతరం శుభ్రపరిచే చర్యలు చేపట్టాలని డిమాండ్ చేస్తున్నారు.

05-10-2026 | 08:41pm

విద్యుత్‌ షాక్‌తో రైతు మృతి

కల్వకుర్తి: ఊరుకొండ మండలం రాచాలపల్లి శివారులో కేఎల్‌ఐ కాల్వలో మోటార్‌ మరమ్మతులు చేస్తుండగా తిమ్మన్నపల్లికి చెందిన 39 ఏళ్ల రైతు శ్యామ్‌ విద్యుత్‌ షాక్‌కు గురై అక్కడికక్కడే మృతి చెందాడు. మోటార్‌లో సాంకేతిక లోపం సరిచేస్తుండగా ప్రమాదవశాత్తు విద్యుత్‌ సరఫరా కావడంతో ఈ ఘటన చోటుచేసుకుంది. మృతుడికి భార్య, నలుగురు కుమార్తెలు ఉన్నారు. ఈ ఘటనతో గ్రామంలో విషాదఛాయలు అలుముకున్నాయి.

05-10-2026 | 04:19pm

అలుగులో అంగన్వాడీ మెడిసిన్

బిజినేపల్లి: గాంధీ జయంతి రోజున పాలెం చెరువు అలుగులో వైద్యారోగ్యశాఖ మెడిసినుతో పాటు అంగన్వాడీ కేంద్రానికి చెందిన మెడిసిన్ కూడా వెలుగు చూసినట్లు తెలిసింది. వైద్యారోగ్యశాఖ మెడిసిన్ కాలం చెల్లినదిగా గుర్తించగా, అంగన్వాడీ మెడిసిన్ 2027 మార్చ్ వరకు చెల్లుబాటులో ఉందని అధికారులు గుర్తించారు. ఈ ఘటనపై ఏఎన్ఎం విజయకు ఇప్పటికే మేమో జారీ చేయగా, అంగన్వాడీ మెడిసిన్ నిర్లక్ష్యంపై విచారణ జరగాల్సి ఉంది.

05-10-2026 | 04:01pm

పత్తి రైతుకు దక్కని ‘మద్దతు’!

కల్వకుర్తి: వర్షాభావ పరిస్థితులతో పత్తి సాగు చేసిన రైతులు ఈ ఏడాది తీవ్ర నిరాశలో ఉన్నారు. కేంద్ర ప్రభుత్వం ప్రకటించిన క్వింటాల్‌కు రూ.8,667 కనీస మద్దతు ధర అందక, ప్రైవేటు వ్యాపారులు రూ.7,800 నుండి రూ.8,200 మాత్రమే చెల్లిస్తున్నారు. ప్రభుత్వ కొనుగోలు కేంద్రాలు సకాలంలో ప్రారంభం కాకపోవడం, నిల్వ చేసుకునే వసతులు లేకపోవడంతో రైతులు క్వింటాల్‌కు రూ.800 నుండి వెయ్యి వరకు నష్టపోతున్నారు. ఈ నెల 21 నుండి సీసీఐ కొనుగోళ్లు ప్రారంభమవుతాయని తెలిసింది.

05-10-2026 | 05:30am

రాళ్ళ గుట్టలపై డేగల కన్ను

బిజినేపల్లి: మామూళ్ల మత్తులో మైనింగ్, రెవెన్యూ, ఆర్టీవో, అటవీశాఖల అధికారులు నిద్రపోతుండగా, మైనింగ్ మాఫియా కొండల్లో బ్లాస్టింగులు చేసి రాళ్లను అమ్మి సొమ్ము చేసుకుంటున్నట్లు తెలిసింది. బిజినేపల్లి మండలం నుండి ఒక్కో శాఖకు లక్ష రూపాయల వరకు మామూళ్లు అందుతున్నాయని గుసగుసలు వినిపిస్తున్నాయి. నంబర్ ప్లేట్ లేని ట్రాక్టర్లలో రాళ్లను రవాణా చేస్తున్నా అధికారులు పట్టించుకోవడం లేదని, అటవీ ప్రాంతాల్లో బ్లాస్టింగుల వల్ల జంతువులు, పక్షులు మాయమవుతున్నాయని ప్రజలు ఆందోళన వ్యక్తం చేస్తున్నారు.

04-10-2026 | 07:48pm

పాముల సంరక్షణ అందరి భాద్యత.!

అచ్చంపేట: వన్యప్రాణి వారోత్సవాలు–2026లో భాగంగా అచ్చంపేటలోని ఎన్‌టీఆర్‌ స్టేడియంలో వాకర్స్‌ క్లబ్‌ సభ్యులకు పాముల సంరక్షణ, రక్షణపై అటవీ శాఖ అవగాహన కార్యక్రమం నిర్వహించింది. స్నేక్‌ క్యాచర్‌ సుమన్, అటవీ అధికారులు పాముల జాతులు, విషపూరిత-విషరహిత పాముల గుర్తింపు, వాటి ప్రాధాన్యతను వివరించారు. పాముకాటుకు గురైనప్పుడు మూఢనమ్మకాలకు దూరంగా ఉండాలని, శిక్షణ పొందిన స్నేక్‌ రెస్క్యూ సిబ్బందికి సమాచారం ఇవ్వాలని జిల్లా అటవీ అధికారి రేవంత్‌ చంద్ర సూచించారు. పాములు పర్యావరణ సమతుల్యతలో కీలక పాత్ర పోషిస్తాయని తెలిపారు.

04-10-2026 | 03:40pm

పందుల కొట్టాలో బీసీ విద్యార్థుల చదువులు

కొల్లాపూర్: నాగర్ కర్నూల్ జిల్లా కొల్లాపూర్ మండల కేంద్రంలోని బీసీ హాస్టల్‌ను బీసీ సంఘం జాతీయ అధ్యక్షులు ఆర్ కృష్ణయ్య ఆదేశాల మేరకు సందర్శించి వీడియో సమావేశం నిర్వహించారు. కాంగ్రెస్ ప్రభుత్వం బీసీలను బ్రష్టు పట్టించిందని, రాష్ట్రంలో 3,000 బీసీ హాస్టళ్లు పందుల కొట్టాల కంటే దారుణంగా ఉన్నాయని బీసీ విద్యార్థి సంఘం స్టేట్ ప్రెసిడెంట్ పగిళ్ల సతీష్ ఆరోపించారు. బీసీలకు 100 గురుకులాలు, ఎమ్మెల్సీ స్థానాల్లో కేటాయింపులు, మిస్ చార్జీలు పెంచాలని డిమాండ్ చేశారు.

04-10-2026 | 02:33pm

మున్సిపల్ చైర్మన్ పేరుతో పైసా వసూల్.!

నాగర్‌ కర్నూల్: నాగర్‌ కర్నూల్ మున్సిపల్ చైర్మన్ తీగల సురేంద్ర పీఏ పేరుతో ఫేస్‌బుక్‌ ఐడీ ద్వారా కొందరు వ్యక్తులతో చాటింగ్‌ చేస్తూ డబ్బులు అడిగిన వ్యవహారం ఆలస్యంగా వెలుగులోకి వచ్చింది. ఫోన్‌ కొనుగోలుకు ట్రాన్సాక్షన్‌ లిమిట్‌ దాటిపోయిందని, మొబైల్‌ స్టోర్‌లో చెల్లింపుల కోసం డబ్బులు అవసరమని కోరినట్లు చాటింగ్ బయటపడింది. ఈ విషయం చైర్మన్‌ దృష్టికి రావడంతో సంబంధిత వ్యక్తిని విధుల నుంచి తొలగించినట్లు తెలిసింది. గతంలోనూ పలు ఆరోపణలు ఎదుర్కొన్నట్లు సమాచారం.

03-10-2026 | 11:44pm

విహార యాత్రలా దేవాదాయ కమిషనర్ పర్యటన

బిజినేపల్లి: పాలెం శ్రీ వేంకటేశ్వర స్వామి ఆలయం గత నాలుగు సంవత్సరాలుగా పూర్వ వైభవం కోల్పోతుండగా, తెలంగాణ రాష్ట్ర దేవాదాయ శాఖ కమిషనర్ M.హనుమంత రావు పర్యటన విహార యాత్రలా సాగిందని భక్తులు ఆరోపిస్తున్నారు. ఆలయ అభివృద్ధి, ఉత్సవాలు, రద్దీ పెంచే చర్యలపై ఆరా తీయకుండా, పూజలు చేయించుకుని వెళ్లడంపై స్థానిక భక్తులు, ప్రజల నుండి విమర్శలు వెల్లువెత్తాయి.

03-10-2026 | 10:36pm

మాజీ మున్సిపల్ చైర్మన్ పై ఫిర్యాదు

కల్వకుర్తి: మాజీ మున్సిపల్ చైర్మన్ ఎడ్మ సత్యంపై పట్టణ ఆర్యవైశ్య మహాసభ సభ్యులు పోలీసులకు ఫిర్యాదు చేశారు. ఆర్యవైశ్యులను ఉద్దేశించి దూషణలకు పాల్పడటంతో పాటు, తమ సామాజిక వర్గాన్ని కించపరిచేలా దుర్భాషలాడారని ఆరోపించారు. సత్యంపై కేసు నమోదు చేసి చట్టపరమైన చర్యలు తీసుకోవాలని కోరారు. అనంతరం పాలమూరు చౌరస్తాలో నిరసన చేపట్టి, దిష్టిబొమ్మను దహనం చేసినట్లు తెలిసింది.

03-10-2026 | 07:35pm

ఆర్డీవో కార్యాలయంలో షాదీ ముబారక్ ఫైల్స్ మిస్సింగ్..!

నాగర్‌ కర్నూల్: నాగర్‌ కర్నూల్‌ ఆర్డీవో కార్యాలయంలో కల్యాణలక్ష్మి, షాదీ ముబారక్‌ దరఖాస్తుల నిర్వహణలో అధికారుల అలసత్వం వెల్లడైంది. రెండేళ్ల క్రితం వివాహాలు జరిగిన లబ్ధిదారుల దరఖాస్తులు సైతం పెండింగ్‌లో ఉండటంతో బాధితులు కార్యాలయాల చుట్టూ తిరుగుతున్నారు. కొన్ని ఫైళ్లు కనిపించకుండా పోయినట్లు లబ్ధిదారులు ఆరోపిస్తున్నారు. ఈ విషయంపై ఆర్డిఓ అర్చన విచారించి చర్యలు తీసుకుంటామని పేర్కొన్నారు.

03-10-2026 | 04:21pm

ఎస్టీ బాలుర వసతిగృహ నిర్మాణానికి శంకుస్థాపన

కొల్లాపూర్: నాగర్ కర్నూల్ జిల్లా కొల్లాపూర్‌లో రూ.2.50 కోట్ల అంచనా వ్యయంతో నిర్మించనున్న ఎస్టీ బాలుర వసతిగృహం నూతన భవనానికి మంత్రి జూపల్లి కృష్ణారావు శనివారం శంకుస్థాపన చేశారు. గిరిజన విద్యార్థులు విద్యలో ముందుకు సాగేందుకు ప్రభుత్వం అన్ని వసతులను కల్పించడంపై దృష్టి సారించిందని, వారి భవిష్యత్తుకు బలమైన పునాది వేయడమే లక్ష్యమని మంత్రి ఈ సందర్భంగా పేర్కొన్నారు. ఈ కార్యక్రమంలో స్థానిక ప్రజాప్రతినిధులు, అధికారులు పాల్గొన్నారు.

03-10-2026 | 04:14pm

చిన్నారికి మంత్రి జూపల్లి తొలిముద్ద

కొల్లాపూర్ రూరల్: చిన్నారుల శారీరక, మానసిక ఎదుగుదలకు పౌష్టికాహారం అందించే లక్ష్యంతో అంగన్‌వాడీ కేంద్రాల్లో ‘తొలిముద్ద’ అల్పాహార పథకాన్ని పర్యాటక, సాంస్కృతిక, ఎక్సైజ్‌ శాఖ మంత్రి జూపల్లి కృష్ణారావు ప్రారంభించారు. కొల్లాపూర్‌ ఎంపీడీవో కార్యాలయంలో శనివారం ఈ పథకాన్ని ప్రారంభించి, మూడు నుంచి ఆరేళ్ల పిల్లలకు స్వయంగా అల్పాహారం తినిపించారు. అక్టోబర్‌ 1 నుంచి నాగర్‌ కర్నూల్‌ సహా రాష్ట్రంలోని ఆరు జిల్లాల్లో తొలిదశలో ఈ పథకం అమలు చేస్తున్నట్లు మంత్రి వెల్లడించారు.

03-10-2026 | 02:29pm

బీసీ హక్కుల సాధనకై పార్లమెంటు ముట్టడి: బీసీ జాతీయ అధ్యక్షుడు శ్రీనివాస్ గౌడ్

వెల్దండ: బీసీ హక్కుల సాధన కోసం పార్లమెంటును ముట్టడిస్తామని జాతీయ బీసీ సంక్షేమ సంఘం అధ్యక్షుడు జాజాల శ్రీనివాస్ గౌడ్ వెల్లడించారు. ప్రధాని నరేంద్ర మోడీ బీసీలపై కపట ప్రేమ నటిస్తూ విద్యా, ఉద్యోగ రంగాల్లో మోసం చేస్తున్నారని ఆయన ఆరోపించారు. నవంబర్ తర్వాత జరిగే శీతాకాల సమావేశాల్లో బీసీ కులగణన చేపట్టాలని తీర్మానం చేయాలని, లేదంటే పార్లమెంటు ముట్టడి ఖాయమని ఈ నెల 8న జాతీయ బీసీ సంక్షేమ సంఘ సమావేశంలో నిర్ణయించనున్నట్లు తెలిపారు.

03-10-2026 | 12:14am