Breaking News

పంటలు ఎండుతుంటే.. ఇతర రాష్ట్రాలకు ఇస్తారా • ఢిల్లీలో హైటెన్షన్‌... బారికేడ్లు ఎక్కిన రాహుల్‌ • రాజ్యసభ బరిలో దినేష్ ఆర్య.. నామినేషన్ దాఖలు • నిజామాబాద్‌లో హైటెన్షన్..ఎమ్మెల్యే అరెస్ట్! • ఢిల్లీలో హైటెన్షన్.. ఎంపీల ర్యాలీ! • స్టేషనరీ పేరుతో బాణాసంచా స్మగ్లింగ్! • బెంగాల్‌ ఉప ఎన్నికల్లో హైటెన్షన్! • కరెంట్ బిల్లు మోత మోగనుందా? • దుకాణాల క్లోజింగ్‌.. హైకోర్టు సీరియస్ • ఈసీ ఆఫీస్‌ వద్ద టెన్షన్‌..మీడియాకు నో ఎంట్రీ •

Districts - Rajanna Sircilla

సంతకు తీరింది చింత

గంభీరావుపేట: గంభీరావుపేట మండల కేంద్రంలో రూ.15 లక్షల వ్యయంతో నిర్మిస్తున్న సమీకృత మార్కెట్ పనులు తుది దశకు చేరుకున్నాయి. ఏళ్లుగా రోడ్డుపై సంత నిర్వహణతో ప్రజలు, వ్యాపారులు, వాహనదారులు పడుతున్న ఇబ్బందులు దీనితో తొలగనున్నాయి. సర్పంచ్ మల్లు గారి పద్మ-నర్సాగౌడ్ పర్యవేక్షణలో ఆధునిక సౌకర్యాలతో ఈ మార్కెట్ నిర్మాణం జరుగుతోంది. త్వరలోనే అందుబాటులోకి వస్తుందని సర్పంచ్ తెలిపారు.

06-10-2026 | 05:25am

ఇందిరమ్మ ఇళ్ల మంజూరులో అక్రమాల ఆరోపణలు..

కోనరావుపేట: ఇందిరమ్మ ఇళ్ల మంజూరులో అక్రమాలు జరుగుతున్నాయని ఆరోపిస్తూ కోనరావుపేట మండల సర్పంచులు ప్రజావాణిలో ఫిర్యాదు చేశారు. సర్పంచుల అనుమతి లేకుండా కాంగ్రెస్ నాయకులు జాబితాలు రూపొందిస్తున్నారని, గ్రామసభ తీర్మానాలను విస్మరిస్తున్నారని వారు పేర్కొన్నారు. తాతల నాటి స్థలాలున్న పేదలు, ఇళ్లు కూలిపోయిన నిరుపేదలకు ప్రాధాన్యత ఇవ్వాలని, గ్రామసభ ఆధారంగా అర్హులను ఎంపిక చేయాలని డిమాండ్ చేశారు. సర్పంచులకు సమాచారం లేకుండా ఇంటి పరిశీలనకు వస్తే అంగీకరించబోమని స్పష్టం చేశారు.

05-10-2026 | 11:26pm

మంత్రులను మర్యాదపూర్వకంగా కలిసిన సర్పంచులు

రాజన్న సిరిసిల్ల జిల్లా కలెక్టర్ కార్యాలయంలో తంగళ్లపల్లి సర్పంచ్ లక్ష్మిరాజం, మండేపల్లి సర్పంచ్ గదగోని సాగర్, గడ్డం మధుకర్ సోమవారం మంత్రి పొన్నం ప్రభాకర్ గౌడ్, ప్రభుత్వ విప్ ఆది శ్రీనివాస్లను మర్యాదపూర్వకంగా కలిశారు. ఈ సందర్భంగా స్థానిక అంశాలపై వారితో చర్చించినట్లు తెలిసింది.

05-10-2026 | 09:42pm

ట్రాక్టర్ జనరేటర్ తో పంటలకు నీరు

గంభీరావుపేట: రాజన్న సిరిసిల్ల జిల్లా గంభీరావుపేట మండలం పొన్నాల పల్లె గ్రామంలో అప్రకటిత కరెంటు కోతలు, లో వోల్టేజ్ సమస్యలతో రైతులు తీవ్ర ఇబ్బందులు పడుతున్నారు. రైతు దేవరాజు తన వరి పంటను కాపాడుకోవడానికి ట్రాక్టర్‌కు జనరేటర్‌ను అమర్చి రోజుకు సుమారు రూ.5వేల వరకు ఖర్చు చేస్తున్నాడు. నాణ్యమైన విద్యుత్తును 12 గంటలు అందిస్తామని అధికారులు చెబుతున్నా, ఆచరణలో సాధ్యం కావడం లేదని రైతులు ఆవేదన వ్యక్తం చేస్తున్నారు. పంటలు ఎండిపోకుండా కాపాడాలని రైతులు కోరుతున్నారు.

05-10-2026 | 07:21pm

పొలాలు ఎండుతున్నాయ్.. కరెంట్ ఇవ్వండి.!

గంభీరావుపేట: రాజన్న సిరిసిల్ల జిల్లా గంభీరావుపేట మండలం రాజేశ్వరరావు కాలనీ వద్ద కామారెడ్డి-సిరిసిల్ల ప్రధాన రహదారిపై విద్యుత్ కోతలకు నిరసనగా గజ సింగవరం, గోరంటాల, సముద్రాళింగాపూర్, మల్లు పల్లె గ్రామాలకు చెందిన రైతులు ధర్నా, రాస్తారోకో నిర్వహించారు. లో వోల్టేజ్ సమస్యతో మోటార్లు కాలిపోతున్నాయని, నాణ్యమైన విద్యుత్ అందించాలని డిమాండ్ చేశారు. పోలీసులు, విద్యుత్ అధికారులు హామీ ఇవ్వడంతో రైతులు నిరసన విరమించారు.

05-10-2026 | 03:50pm

ఎగువ మానేరు నీరు విడుదలపై బీజేపీ హర్షం

గంభీరావుపేట: రాజన్న సిరిసిల్ల జిల్లా గంభీరావుపేట మండలం నర్మాల ఎగువ మానేరు ప్రాజెక్టు ఆయకట్టు కింద పంటలకు నీటి విడుదల కోరుతూ బీజేపీ ఆధ్వర్యంలో రైతులు ధర్నా నిర్వహించారు. ఉన్నతాధికారులు స్పందించి మానేరు నీటిని విడుదల చేయడంతో రైతులు, బీజేపీ నాయకులు ఆనందం వ్యక్తం చేశారు. మండల కేంద్రంలో టపాసులు కాల్చి, స్వీట్లు పంచుకుంటూ హర్షం వ్యక్తం చేసినట్లు తెలిసింది.

04-10-2026 | 04:43pm

ఇందిరమ్మ ఇళ్ల నిర్మాణానికి అటవీ శాఖ సహకారం అవసరం

గంభీరావుపేట: రాజన్న సిరిసిల్ల జిల్లా గంభీరావుపేట మండలంలోని జగదాంబ తండాలో ఇందిరమ్మ ఇళ్ల లబ్ధిదారుల సమస్యలను డీవీఎంసీ సభ్యులు బానోత్ నరేష్ నాయక్, భూక్యా రమేష్ నాయక్ తెలుసుకున్నారు. అటవీ శాఖ అధికారులు ఇళ్ల నిర్మాణానికి అడ్డంకులు సృష్టిస్తున్నారని లబ్ధిదారులు ఆవేదన వ్యక్తం చేశారు. అటవీ, రెవెన్యూ, పంచాయతీ శాఖలు సమన్వయంతో గిరిజన కుటుంబాల సమస్యలను పరిష్కరించాలని డీవీఎంసీ సభ్యులు విజ్ఞప్తి చేశారు. ప్రభుత్వ సంక్షేమ పథకాలు ప్రతి గిరిజన కుటుంబానికి చేరేలా కృషి చేస్తామని వారు తెలిపారు.

04-10-2026 | 04:26pm

నిరుపేద జర్నలిస్ట్ కుటుంబానికి అండగా నిత్యవసర సరుకుల పంపిణీ

గంభీరావుపేట: రాజన్న సిరిసిల్ల జిల్లా గంభీరావుపేట మండలం కోలమద్ది గ్రామానికి చెందిన ఆర్‌ఎంపి, జర్నలిస్ట్ ఏడబోయిన నారాయణ ఇటీవల అనారోగ్యంతో మృతి చెందారు. నిరుపేద కుటుంబానికి అండగా తెలంగాణ రక్షణ సేన పార్టీ మండల కన్వీనర్ కూర సురేష్ సుమారు రూ.6 వేల విలువైన నిత్యావసర సరుకులను అందజేశారు. ఈ కార్యక్రమంలో టీయూడబ్ల్యూజే మండల అధ్యక్షుడు అబ్దుల్ రహీమ్, ఇతర జర్నలిస్టులు పాల్గొన్నారు.

04-10-2026 | 02:43pm

చాయ్ త్రాగుతూ ముచ్చటించిన విప్ ఆది శ్రీనివాస్

చందుర్తి: వేములవాడ ఎమ్మెల్యే ఆది శ్రీనివాస్ మల్యాల గ్రామంలో పర్యటించి, రైతులు, యువకులు, నాయకులు, గ్రామ పెద్దలను కలిసి సమస్యలను అడిగి తెలుసుకున్నారు. ప్రజలు ఎదుర్కొంటున్న సమస్యలను తన దృష్టికి తీసుకురావాలని, వాటి పరిష్కారానికి అవసరమైన చర్యలు తీసుకుంటానని హామీ ఇచ్చారు. గ్రామ అభివృద్ధికి కృషి చేస్తానని ఆయన పేర్కొన్నారు.

03-10-2026 | 10:42pm

అడవులు, వన్యప్రాణుల సంరక్షణపై అవగాహన

కోనరావుపేట: జాతీయ వన్యప్రాణి వారోత్సవాల్లో భాగంగా కోనరావుపేట మండలంలో అటవీ శాఖ అధికారులు గురువారం విస్తృత అవగాహన కార్యక్రమాలు నిర్వహించారు. అడవులను, వన్యప్రాణులను సంరక్షించడం ప్రతి పౌరుడి బాధ్యత అనే సందేశాన్ని ప్రజల్లోకి తీసుకెళ్లేందుకు బైక్ ర్యాలీ నిర్వహించారు. అక్రమ వేటను అరికట్టాలని, వన్యప్రాణులకు హాని కలిగించవద్దని అధికారులు సూచించారు. పర్యావరణ సమతుల్యతకు వన్యప్రాణుల సంరక్షణ కీలకమని పేర్కొన్నారు. ఈ కార్యక్రమంలో ఫారెస్ట్ రేంజ్ ఆఫీసర్ మాధవి, ఫారెస్ట్ సెక్షన్ ఆఫీసర్ భీర్బాల్ పాల్గొన్నారు.

03-10-2026 | 08:45pm

కరెంట్ ఉచ్చులు పెడితే పీడీ యాక్ట్ కేసులు

గంభీరావుపేట: అడవి జంతువుల నుండి పంటలను కాపాడుకునే పేరుతో కరెంట్ షాక్ ఉచ్చులు ఏర్పాటు చేసి ప్రజల ప్రాణాలతో చెలగాటం ఆడవద్దని ఎల్లారెడ్డిపేట సీఐ ఓ. వెంకటేష్ హెచ్చరించారు. ఇలాంటి చర్యలకు పాల్పడితే పీడీ యాక్ట్ కింద కేసులు నమోదు చేస్తామని ఆయన స్పష్టం చేశారు. శుక్రవారం గంభీరావుపేట మండల కేంద్రంలో రైతు దంపతులు గంట దేవయ్య, గంట లక్ష్మి కరెంట్ షాక్‌కు గురై మృతి చెందిన ఘటనను ఆయన గుర్తు చేశారు. పంట పొలాల చుట్టూ కరెంట్ ఉచ్చులు ఏర్పాటు చేసి ప్రమాదాలకు కారణమైతే, వాటిని హత్య కేసుతో సమానంగా పరిగణించి కఠిన చర్యలు తీసుకుంటామని సీఐ పేర్కొన్నారు.

03-10-2026 | 08:28pm

తెలంగాణ రక్షణ సేనలోకి 30 మంది మహిళలు, యువకులు

రాజన్న సిరిసిల్ల జిల్లా తంగళ్లపల్లి మండల కేంద్రంలో తెలంగాణ రక్షణ సేన పార్టీలోకి సుమారు 30 మంది మహిళలు, యువకులు చేరారు. జిల్లా మహిళా నాయకురాలు చెరుకుపల్లి శైలజ ఆధ్వర్యంలో ఈ చేరికలు జరిగాయి. రాజన్న సిరిసిల్ల జిల్లా అధ్యక్షురాలు సంకపల్లి సుమలత, సుధాకర్ శర్మ నూతనంగా పార్టీలో చేరిన వారికి స్వాగతం పలికారు. ఈ కార్యక్రమంలో పార్టీ నాయకులు వరద సతీష్, రమేష్, షాదుక్ పాల్గొన్నారు.

03-10-2026 | 08:14pm

ఓయూ సభను విజయవంతం చేయాలి

రుద్రంగి: ఉస్మానియా యూనివర్సిటీలో అక్టోబర్ 6న జరగనున్న మాదిగ స్టూడెంట్ ఫెడరేషన్ (ఎమ్మెస్ఎఫ్) జాతీయ ప్రతినిధుల సదస్సును విజయవంతం చేయాలని ఎమ్మార్పీఎస్ రుద్రంగి మండల ఇంచార్జ్ దయ్యాల నారాయణ మాదిగ పిలుపునిచ్చారు. మాదిగ ఉప కులాల హక్కుల సాధన, ఎస్సీ వర్గీకరణ అమలు కోసం విద్యార్థులు ఐక్యంగా పోరాడాలని ఆయన పేర్కొన్నారు. పద్మశ్రీ మందకృష్ణ మాదిగ మార్గనిర్దేశంలో జరిగే ఈ సదస్సులో విద్యా రంగంలో మాదిగ విద్యార్థుల హక్కులపై చర్చించనున్నట్లు వెల్లడించారు.

03-10-2026 | 04:23pm

విలాసాగర్‌లో రెండెకరాల్లో వెంచర్

బోయినపల్లి: రాజన్న సిరిసిల్ల జిల్లా బోయినపల్లి మండలం విలాసాగర్ లో వ్యవసాయ భూమిని రియల్ ఎస్టేట్ వ్యాపారులు ప్లాట్లుగా మార్చి విక్రయిస్తున్నారు. ప్రభుత్వ నిబంధనలకు విరుద్ధంగా నాలా కన్వర్షన్ చేయకుండా, ప్రభుత్వానికి పన్నులు చెల్లించకుండానే వేములవాడకు చెందిన ఓ వ్యాపారి రెండు ఎకరాల భూమిలో ఇప్పటికే 10 ప్లాట్ల వరకు విక్రయించినట్లు తెలిసింది. దీంతో ప్రభుత్వ ఆదాయానికి భారీగా గండి పడుతోంది. గ్రామ పంచాయతీ అనుమతులు లేవని, ఉన్నతాధికారుల దృష్టికి తీసుకెళ్లినట్లు విలాసాగర్ గ్రామ పంచాయతీ కార్యదర్శి శేఖర్ వెల్లడించారు.

03-10-2026 | 05:40am