కొత్త మొల్గర జడ్పి ఉన్నత పాఠశాలను ఆకస్మిక తనిఖీ చేసిన స్థానిక సంస్థల అదనపు కలెక్టర్

భూత్పూర్, సెప్టెంబర్ 18 : భూత్పూర్ మండల పరిధిలోని కొత్త మొల్గర జిల్లా పరిషత్ ఉన్నత పాఠశాల (Molgara Zilla Parishad High School) (జెడ్పీహెచ్‌ఎస్‌)ను స్థానిక సంస్థల అదనపు కలెక్టర్  డి. మధుసూదన్ నాయక్ (Additional Collector D. Madhusudan Naik) శుక్రవారం ఆకస్మికంగా తనిఖీ చేశారు. ఈ సందర్భంగా పాఠశాలలో విద్యార్థులకు కల్పిస్తున్న మౌలిక వసతులు, పారిశుధ్య నిర్వహణ, తాగునీటి సౌకర్యాలను ఆయన పరిశీలించారు. తరగతి గదులు, పాఠశాల ప్రాంగణం, క్రీడా మైదానం, మరుగుదొడ్లను స్వయంగా పరిశీలించి పరిశుభ్రత పరిస్థితులను సమీక్షించారు.

విద్యార్థుల ఆరోగ్యం, విద్యాభ్యాసానికి పరిశుభ్రమైన వాతావరణం ఎంతో అవసరమని అదనపు కలెక్టర్ పేర్కొన్నారు. పాఠశాల ఆవరణలో ప్రతిరోజూ పారిశుధ్య పనులు సక్రమంగా నిర్వహించేలా చర్యలు తీసుకోవాలని పాఠశాల యాజమాన్యం, గ్రామ పంచాయతీ సిబ్బందికి సూచించారు.

అనంతరం విద్యార్థులతో అదనపు కలెక్టర్ నేరుగా మాట్లాడి పాఠశాలలో అందుతున్న సదుపాయాలపై వివరాలు అడిగి తెలుసుకున్నారు. తాగునీటి లభ్యత, విద్యుత్ సౌకర్యం, ఫ్యాన్ల పనితీరు, మధ్యాహ్న భోజనం నాణ్యత తదితర అంశాలపై విద్యార్థులను అడిగి వివరాలు సేకరించారు. పాఠశాలలో మౌలిక వసతులకు సంబంధించి ఏవైనా సమస్యలు, లోపాలు ఉంటే వాటిని గుర్తించి వెంటనే పరిష్కరించాలని క్షేత్రస్థాయి అధికారులను ఆదేశించారు. గ్రామీణ ప్రాంతాల్లోని ప్రభుత్వ పాఠశాలల్లో విద్యార్థులకు మెరుగైన విద్యా వాతావరణం, అవసరమైన మౌలిక వసతులు కల్పించేందుకు జిల్లా యంత్రాంగం నిరంతరం కృషి చేస్తుందని అదనపు కలెక్టర్ పేర్కొన్నారు.