సారీ చెప్పిన హీరో
టాలీవుడ్ యంగ్ హీరో, దర్శకుడు విశ్వక్ సేన్ (Vishwak Sen) నిర్వహించిన Fan Meet కార్యక్రమంలో అనూహ్య పరిణామం చోటుచేసుకుంది. ఆయన స్వీయ దర్శకత్వంలో నటిస్తున్న ‘కల్ట్’ (Cult) సినిమా ప్రమోషన్స్‌లో భాగంగా హైదరాబాద్‌లోని సారథి స్టూడియోస్‌లో ఏర్పాటు చేసిన ఫ్యాన్ ఫొటో సెషన్‌లో గందరగోళం నెలకొంది. హీరోతో ఫొటోలు దిగేందుకు అభిమానులు భారీ సంఖ్యలో తరలిరావడంతో పరిస్థితిని నియంత్రించడం నిర్వాహకులకు కష్టంగా మారింది. భద్రతా ఏర్పాట్లు సరిపోకపోవడంతో కార్యక్రమాన్ని మధ్యలోనే నిలిపివేయాల్సి వచ్చింది. ఈ పరిణామంపై విశ్వక్ సేన్ అభిమానులకు క్షమాపణలు చెబుతూ సోషల్ మీడియాలో స్పందించారు.
అక్టోబర్ 30న విడుదల కానున్న ‘కల్ట్’ మూవీ ప్రచారంలో(Cult Movie Promotion) భాగంగా అభిమానులతో నేరుగా ముచ్చటించేందుకు, వారితో ఫొటోలు దిగేందుకు ఈ కార్యక్రమాన్ని ప్లాన్ చేశారు. అయితే, ఊహించిన దానికంటే ఎక్కువ మంది ఫ్యాన్స్ అక్కడికి చేరుకోవడంతో స్టూడియో ప్రాంగణంలో రద్దీ పెరిగింది. కొంతసేపటికి తోపులాట జరగడంతో పరిస్థితి అదుపు తప్పే సూచనలు కనిపించాయి. దీంతో భద్రతా కారణాలను దృష్టిలో ఉంచుకుని విశ్వక్ సేన్ అక్కడి నుంచి వెళ్లిపోయినట్లు సమాచారం. తమ అభిమాన హీరోతో ఫొటో దిగాలని దూరప్రాంతాల నుంచి వచ్చిన పలువురు నిరాశతో వెనుదిరగాల్సి వచ్చింది.
ఈ ఘటనపై విశ్వక్ సేన్ Social Media ద్వారా అభిమానులకు క్షమాపణలు తెలిపారు. ఫొటో సెషన్ సందర్భంగా ఎదురైన అసౌకర్యానికి చింతిస్తున్నట్లు పేర్కొన్నారు. తనతో ఫొటో దిగాలనే ఆశతో వచ్చి అవకాశం దక్కక నిరాశకు గురైన ప్రతి ఒక్కరికీ క్షమాపణలు చెప్పారు. అభిమానులందరినీ వ్యక్తిగతంగా కలవలేకపోవడం తనను బాధించిందని వెల్లడించారు. ఫ్యాన్స్ చూపించిన ప్రేమ, ఆదరణ తన అంచనాలకు మించి ఉందని పేర్కొంటూ, వారి అభిమానం పట్ల కృతజ్ఞతలు తెలిపారు.
అభిమానులను నిరాశపరచడం తన ఉద్దేశం కాదని స్పష్టం చేసిన విష్వక్ సేన్, త్వరలోనే మెరుగైన ఏర్పాట్లతో మరో Fan Meet నిర్వహించేందుకు ప్రయత్నిస్తానని హామీ ఇచ్చారు. ఈసారి పటిష్ఠమైన Security Arrangements, క్రమబద్ధమైన Entry Systemతో కార్యక్రమాన్ని నిర్వహించేలా చూస్తానని తెలిపారు. ‘కల్ట్’ సినిమా విడుదలకు ముందు జరిగిన ఈ ఘటన ఇప్పుడు టాలీవుడ్‌లో చర్చనీయాంశంగా మారింది. అభిమానుల నుంచి వస్తున్న స్పందనతో పాటు, తదుపరి కార్యక్రమాన్ని చిత్రబృందం ఎలా నిర్వహిస్తుందనే దానిపై ఆసక్తి నెలకొంది.
