మత్తు పదార్థాలతో చెలగాటమా?
నాగర్‌కర్నూల్ (విజయక్రాంతి): కల్తీ కల్లు సేవించిన వారికి రూ.5 వేల జరిమానాతో పాటు మెడలో చెప్పుల దండ వేస్తామని నాగర్‌కర్నూల్ జిల్లా తిమ్మాజిపేట మండలంలోని ఓ గ్రామస్తులు వినూత్న రీతిలో హెచ్చరికలు (Warning) జారీ చేశారు. కల్లు ధరలు పెంచడంపై ఆగ్రహం వ్యక్తం చేసిన గ్రామస్తులు, కల్తీ కల్లు విక్రయాలపై నిరసన (Protest) వ్యక్తం చేస్తూ కల్లు దుకాణం ముందు చెప్పుల దండను ప్రదర్శించడం స్థానికంగా కలకలం రేపింది.
ఈత, తాటి చెట్ల నుంచి కల్లు తీసి విక్రయించేందుకు అనుమతులు పొందిన గౌడ కులస్తులు నిబంధనలకు విరుద్ధంగా ఆల్ఫాజోలం, సైక్లోరిన్ వంటి మత్తు పదార్థాలతో కృత్రిమ కల్లు తయారు చేస్తున్నారనే ఆరోపణలు (Allegations) వినిపిస్తున్నాయి. దీనివల్ల ప్రజల ఆరోగ్యానికి ముప్పు వాటిల్లుతోందని గ్రామస్తులు ఆందోళన వ్యక్తం చేస్తున్నారు. ఇటీవల కల్లు ధరను కూడా భారీగా పెంచడంతో వారి ఆగ్రహం మరింత పెరిగింది.
మత్తుకు బానిసై కల్తీ కల్లు సేవించవద్దని, ఎవరైనా తాగితే రూ.5 వేల జరిమానాతో పాటు చెప్పుల దండ వేస్తామని గ్రామస్తులు హెచ్చరించారు. ఈ మేరకు కల్లు దుకాణం ముందు చెప్పుల దండను ప్రదర్శించారు.
మరోవైపు, ఈ వ్యవహారంపై గ్రామస్తులను కొందరు బెదిరిస్తున్నారని, గ్రామాభివృద్ధి, దేవాలయాల అభివృద్ధికి డబ్బులు ఇస్తామంటూ రాజీ ప్రయత్నాలు చేస్తున్నారని సమాచారం. అయితే కల్తీ కల్లు తయారీ, విక్రయాలకు సంబంధించిన ఆరోపణలపై అధికారుల విచారణతో వాస్తవాలు వెలుగులోకి రావాల్సి ఉంది.
