కేశవపట్నంలో పోలీసుల మెరుపు తనిఖీలు.. 72 వాహనాలు సీజ్‌!
హుజురాబాద్, అక్టోబర్ 31 (విజయక్రాంతి): కరీంనగర్ జిల్లా శంకరపట్నం మండలం కేశవపట్నం గ్రామంలో శనివారం ఉదయం పోలీసులు కార్డన్ అండ్ సెర్చ్ (Cordon and Search) నిర్వహించారు. ఎత్తుగడ్డ ఎస్సీ, బీసీ కాలనీల్లో విస్తృతంగా తనిఖీలు చేపట్టారు. ఈ సందర్భంగా కాలనీవాసులతో సమావేశమై శాంతిభద్రతలు, నేరాల నియంత్రణపై అవగాహన కల్పించారు. తనిఖీల్లో సరైన ధ్రువపత్రాలు లేని 72 వాహనాలను స్వాధీనం చేసుకుని కేశవపట్నం పోలీస్ స్టేషన్‌కు తరలించారు.
ఈ సందర్భంగా హుజురాబాద్ ఏసీపీ వాసంశెట్టి మాధవి మాట్లాడుతూ.. ద్విచక్ర వాహనదారులు తప్పనిసరిగా వాహనాలకు సంబంధించిన సరైన ధ్రువపత్రాలు (Vehicle Documents) కలిగి ఉండాలని సూచించారు. అతివేగంగా వాహనాలు నడపడం, మద్యం సేవించి డ్రైవింగ్ చేయడం వంటి చర్యలకు దూరంగా ఉండాలని హెచ్చరించారు.
ముఖ్యంగా విద్యార్థులు చెడు మార్గంలో పయనించకుండా తల్లిదండ్రులు, ఉపాధ్యాయులు వారిపై ప్రత్యేక దృష్టి సారించాలని సూచించారు. విద్యార్థుల భవిష్యత్తును దెబ్బతీసే అలవాట్లకు దూరంగా ఉండేలా వారికి అవగాహన కల్పించాలన్నారు.
గ్రామాల్లో అపరిచిత వ్యక్తులు అనుమానాస్పదంగా సంచరిస్తే వెంటనే పోలీసులకు సమాచారం (Police Alert) అందించాలని ఏసీపీ ప్రజలను కోరారు. అనుమానాస్పద కార్యకలాపాలను గమనించినప్పుడు పోలీసులకు సహకరించడం ద్వారా నేరాలను ముందుగానే అరికట్టవచ్చన్నారు. గ్రామాల్లో శాంతిభద్రతల పరిరక్షణ (Law and Order)కు ప్రజల భాగస్వామ్యం ఎంతో అవసరమని తెలిపారు.
ఈ కార్డన్ అండ్ సెర్చ్‌లో రూరల్ సీఐ వి. శ్రీనివాస్, కేశవపట్నం ఎస్సై శేఖర్, ఏఎస్ఐ సంపత్‌తోపాటు హుజురాబాద్ టౌన్ సీఐ కరుణాకర్, జమ్మికుంట టౌన్ సీఐ రామకృష్ణ, హుజురాబాద్ ఎస్సై శ్రీనివాసరావు, ఇల్లంతకుంట ఎస్సై క్రాంతి, సైదాపూర్ ఎస్సై స్వాతి తదితర పోలీసు అధికారులు, సిబ్బంది పాల్గొన్నారు.
