ఈ జిల్లాలకు Rain Alert
అలర్ట్.. మూడు రోజుల పాటు ఏపీని వర్షాలు ముంచెత్తే ఛాన్స్!
అమరావతి: ఆంధ్రప్రదేశ్‌లో మరోసారి వర్షాలు కురిసే అవకాశాలు కనిపిస్తున్నాయి. బంగాళాఖాతంలో ఏర్పడిన అల్పపీడనం శనివారం (అక్టోబర్ 31) నాటికి వాయుగుండంగా (Depression) బలపడే అవకాశం ఉందని భారత వాతావరణ శాఖ (IMD) అంచనా వేసింది. అనంతరం ఈ Weather System పశ్చిమ వాయవ్య దిశగా కదులుతూ ఆంధ్రప్రదేశ్ తీరంవైపు వచ్చే రెండు రోజుల్లో పయనించనుందని తెలిపింది. ఈ ప్రభావంతో దక్షిణ కోస్తా ఆంధ్ర, రాయలసీమ ప్రాంతాల్లో రాబోయే మూడు రోజుల పాటు వర్షాలు కురిసే అవకాశం ఉంది.
నేడు ఈ జిల్లాల్లో వర్ష సూచన
శనివారం మన్యం, అల్లూరి సీతారామరాజు, పల్నాడు, కోనసీమ, పశ్చిమ గోదావరి జిల్లాల్లో అక్కడక్కడ ఓ మోస్తరు వర్షాలు కురిసే అవకాశం ఉంది. అలాగే మార్కాపురం, ప్రకాశం, నెల్లూరు, నంద్యాల, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లోనూ వర్షాలు పడే సూచనలు ఉన్నాయి. కొన్ని ప్రాంతాల్లో ఉరుములు, మెరుపులతో కూడిన వర్షాలు పడే అవకాశం ఉండటంతో ప్రజలు అప్రమత్తంగా ఉండాలని వాతావరణ శాఖ సూచిస్తోంది. తాజా IMD Forecast ప్రకారం.. నవంబర్ 1 నుంచి కోస్తా ఆంధ్రలో వర్షాలు పెరిగే అవకాశం ఉంది. నవంబర్ 2, 3 తేదీల్లో అక్కడక్కడ భారీ నుంచి అతి భారీ వర్షాలు కురిసే సూచనలున్నాయి. రాయలసీమలోనూ నవంబర్ 2, 3 తేదీల్లో భారీ వర్షాలు పడే అవకాశం ఉందని వాతావరణ శాఖ హెచ్చరించింది. ఉరుములు, మెరుపులు, బలమైన గాలులు కూడా వీచే అవకాశముంది. అల్పపీడనం బలపడుతున్న నేపథ్యంలో సముద్ర పరిస్థితులపై అధికారులు నిఘా ఉంచుతున్నారు. మత్స్యకారులు సముద్రంలోకి వెళ్లే విషయంలో అధికారిక హెచ్చరికలను తప్పనిసరిగా పాటించాలి. రైతులు కోతకు సిద్ధంగా ఉన్న పంటలు, ధాన్యం, వ్యవసాయ ఉత్పత్తుల విషయంలో ముందస్తు జాగ్రత్తలు తీసుకోవడం మంచిది. వాయుగుండం దిశ, తీవ్రతలో మార్పులను బట్టి వర్షాల అంచనాలు మారే అవకాశం ఉన్నందున తాజా Weather Updatesను గమనించాలి.
