వాట్సాప్‌ గ్రూపుల్లో తప్పుడు ప్రచారాలు చేస్తే చర్యలు
అభ్యంతరకర పోస్టులను ప్రోత్సహిస్తే అడ్మిన్లపైనా కేసులు: డీఎస్పీ అరుణ్‌కుమార్‌
భద్రాచలం, (విజయక్రాంతి): వాట్సాప్‌ గ్రూపుల్లో తప్పుడు సమాచారం ప్రచారం చేయడం, నిరాధార ఆరోపణలు చేయడం, ఇతరులను అసభ్య పదజాలంతో దూషించడం వంటి చర్యలకు పాల్పడితే చట్టప్రకారం చర్యలు తప్పవని భద్రాచలం డీఎస్పీ ఎం.అరుణ్‌కుమార్‌(DSP M. Arun Kumar) హెచ్చరించారు. మంగళవారం భద్రాచలం డీఎస్పీ కార్యాలయంలో పట్టణంలోని వివిధ వాట్సాప్‌ గ్రూపుల అడ్మిన్లతో సమావేశం నిర్వహించారు.
ఈ సందర్భంగా ఆయన మాట్లాడుతూ ఇటీవల కొన్ని గ్రూపుల్లో వాస్తవాలను నిర్ధారించుకోకుండా తప్పుడు సమాచారం ప్రచారం చేయడం, వ్యక్తిగత విషయాలను ప్రస్తావిస్తూ ఇతరుల ప్రతిష్ఠకు భంగం కలిగించేలా పోస్టులు పెట్టడం జరుగుతోందన్నారు. ఇలాంటి చర్యల వల్ల ప్రజల్లో అనవసర అపోహలు, వివాదాలు తలెత్తే అవకాశం ఉందన్నారు. గ్రూపుల్లో ఎవరు ఎలాంటి సందేశాలు పెడుతున్నారో అడ్మిన్లు ఎప్పటికప్పుడు గమనించాలని, అభ్యంతరకర పోస్టులను గుర్తిస్తే తొలగించేందుకు చర్యలు తీసుకోవాలని సూచించారు.
పదేపదే నిబంధనలు ఉల్లంఘించే సభ్యులపై గ్రూపు నిబంధనల ప్రకారం చర్యలు తీసుకోవాలన్నారు. చట్టవిరుద్ధమైన పోస్టులను ఉద్దేశపూర్వకంగా ప్రోత్సహించినా, వాటి ప్రచారంలో అడ్మిన్ల ప్రమేయంబి ఉన్నట్లు ఆధారాలతో తేలినా వారిపైనా చట్టప్రకారం చర్యలు తీసుకుంటామని హెచ్చరించారు. బాధితులు సంబంధిత ఆధారాలతో ఫిర్యాదు చేస్తే విచారణ జరిపి చర్యలు తీసుకుంటామని తెలిపారు. వాట్సాప్‌ గ్రూపులను వ్యక్తిగత దూషణలకు వేదికలుగా మార్చకుండా ప్రజలకు ఉపయోగపడే సమాచారాన్ని పంచుకునేందుకు వినియోగించాలని సూచించారు. ఈ సమావేశంలో టౌన్‌ సీఐ ఎస్‌.రాజు, టౌన్‌ ఎస్‌ఐ సతీష్‌, ట్రాఫిక్‌ ఎస్‌ఐ కేశవ్‌ తదితరులు పాల్గొన్నారు.
