ఘర్షణలకు కేరాఫ్‎గా మారుతున్న మణుగూరు

• అసలు మణుగూరులో ఏం జరుగుతోంది...?

• ఘర్షణలకు కేరాఫ్‌గా మారుతున్న వైనం

• చలానాలపైనే దృష్టి.. లా అండ్‌ ఆర్డర్‌పై లేదా...?

• పోలీసుల తీరుపై ప్రజల్లో అసంతృప్తి

• గ్యాంగ్‌లను పెంచి పోషిస్తున్నది ఎవరు...?

• ఎస్పీ సార్‌.. మణుగూరుపై దృష్టి సారించండి!

మణుగూరు,సెప్టెంబర్‌ 5 (విజయక్రాంతి): మణుగూరు... ఒకప్పుడు ప్రశాంతతకు మారుపేరుగా నిలిచిన పట్టణం. నేడు తరచూ చోటుచేసుకుంటున్న ఘర్షణలతో చర్చనీయాంశంగా మారుతోంది. చిన్నచిన్న వివాదాలు సైతం పెద్ద ఘర్షణలకు దారితీస్తున్నాయన్న ఆందోళన ప్రజల్లో వ్యక్తమవుతోంది. ఇటీవల రెండు వర్గాల మధ్య జరిగిన ఘర్షణలో ఓ యువకుడు(Young man) ప్రాణాలు కోల్పోవడం కలకలం రేపింది. ఈ ఘటనతో మణుగూరు(Manuguru)లో అసలు ఏం జరుగుతోందన్న ప్రశ్నలు తలెత్తుతున్నాయి. యువతలో కొందరు గుంపులుగా ఏర్పడి ఆధిపత్యం కోసం ప్రయత్నిస్తున్నారన్న చర్చ సాగుతోంది. సోషల్‌ మీడియా(Social Media) వేదికలపై కూడా వర్గాల మధ్య పోటీలు కనిపిస్తున్నాయన్న ఆరోపణలు వినిపిస్తున్నాయి.

చిన్న వివాదం మొదలైతే చాలు, అది కొట్లాటగా మారుతున్న పరిస్థితులు ఆందోళన కలిగిస్తున్నాయి. గొడవలు జరిగిన తర్వాత కేసులు నమోదు చేయడం కంటే ముందస్తు చర్యలు అవసరమని ప్రజలు అంటున్నారు. మరోవైపు పోలీసులు వాహన తనిఖీలు, చలానాల వసూళ్లపై చూపుతున్న శ్రద్ధపై ప్రశ్నలు వినిపిస్తున్నాయి. ట్రాఫిక్‌ నిబంధనలు (Traffic rules)అమలు చేయడం అవసరమే అయినా, అదే సమయంలో పట్టణంలో శాంతిభద్రతల పరిరక్షణకు సమాన ప్రాధాన్యం ఇవ్వాలని ప్రజలు కోరుతున్నారు.

సందేహాస్పదంగా సంచరించే గుంపులు, రాత్రివేళ యువకుల గుంపులపై నిఘా పెంచాలని డిమాండ్‌ చేస్తున్నారు. సున్నిత ప్రాంతాల్లో నిరంతర పెట్రోలింగ్‌ నిర్వహించాలని కోరుతున్నారు. గతంలో వివాదాలకు కారణమైన వ్యక్తుల కదలికలపై నిఘా అవసరమని అంటున్నారు.రాజకీయ పార్టీల పేర్లతో యువకుల గుంపులు ఏర్పడుతున్నాయన్న ఆరోపణలు కూడా వినిపిస్తున్నాయి. అయితే ఈ ఆరోపణలకు ఆధారాలు ఉంటేనే సంబంధిత వ్యక్తులపై చర్యలు తీసుకోవాలని ప్రజలు సూచిస్తున్నారు. ఏ పార్టీ అయినా చట్టానికి అతీతం కాదనే విషయాన్ని పోలీసులు స్పష్టం చేయాల్సిన అవసరం ఉంది. రాజకీయ అండదండలున్నాయన్న భావన ప్రజల్లో ఏర్పడకుండా పోలీసు శాఖ పారదర్శకంగా వ్యవహరించాలి. పార్టీలకు అతీతంగా నేరస్తులపై కఠిన చర్యలు తీసుకోవాలని ప్రజలు కోరుతున్నారు. 

ఒక ఘటన జరిగిన తర్వాత స్పందించడం కంటే... ఘటనకు ముందే పరిస్థితులను అంచనా వేసి అడ్డుకోవడం పోలీసుల ప్రధాన బాధ్యతగా మారాలి. యువతను తప్పుదోవ పట్టిస్తున్న గ్యాంగ్‌ సంస్కృతికి అడ్డుకట్ట వేయాల్సిన అవసరం ఉంది.మణుగూరులోని ప్రధాన కూడళ్లు, సున్నిత ప్రాంతాల్లో సీసీ కెమెరాల పర్యవేక్షణ పెంచాలి. రాత్రివేళ ప్రత్యేక పోలీస్‌ పెట్రోలింగ్‌ నిర్వహించాలి. అసాంఘిక కార్యకలాపాలకు పాల్పడే వారిపై కఠిన నిఘా పెట్టాలి.

ప్రజలకు భద్రత కల్పించడమే పోలీసుల ప్రధాన కర్తవ్యమని స్థానికులు గుర్తుచేస్తున్నారు. పోలీసులపై ప్రజల్లో నమ్మకం పెరగాలంటే ఫిర్యాదులపై వేగంగా స్పందించాల్సి ఉంది. ఘర్షణలకు దారితీసే కారణాలను గుర్తించి మూలాలను అరికట్టాలని కోరుతున్నారు. పట్టణంలో శాంతిభద్రతలను పటిష్టం చేసేందుకు ప్రత్యేక కార్యాచరణ చేపట్టాలని డిమాండ్‌ చేస్తున్నారు.జిల్లా ఎస్పీ రోహిత్‌ రాజు నేర నియంత్రణలో రాజీపడబోమని ఇటీవల స్పష్టం చేశారు. ఈ నేపథ్యంలో మణుగూరులోని పరిస్థితులపై ప్రత్యేక దృష్టి సారించాల్సిన అవసరం ఉందని ప్రజలు కోరుతున్నారు.

మణుగూరు ప్రజలకు భయరహిత వాతావరణం కల్పించేందుకు పోలీసు శాఖ చర్యలు చేపట్టాలి. చట్టాన్ని చేతుల్లోకి తీసుకునే వారిపై పార్టీలకు అతీతంగా చర్యలు ఉండాలి. లేకపోతే చిన్నచిన్న వివాదాలు భవిష్యత్తులో మరింత పెద్ద సమస్యలకు దారితీసే ప్రమాదం ఉందని ప్రజలు ఆందోళన వ్యక్తం చేస్తున్నారు.ఎస్పీ సార్‌... మణుగూరుపై ప్రత్యేక దృష్టి సారించండి. శాంతిభద్రతలను కాపాడండి అంటూ స్థానికులు విజ్ఞప్తి చేస్తున్నారు.