ఉద్యమకారుల ఐక్యవేదికకు కొత్త సారథి

కన్నాయిగూడెం, నవంబర్ 01 (విజయక్రాంతి): ములుగు జిల్లా కన్నాయిగూడెం మండలంలోని గూర్రేవుల గ్రామంలో తెలంగాణ ఉద్యమకారుల ఐక్యవేదిక మండల స్థాయి సమావేశం నిర్వహించారు. ఈ సమావేశానికి ముఖ్య అతిథిగా హాజరైన ములుగు జిల్లా అధ్యక్షుడు రెండ్ల సంతోష్ మాట్లాడుతూ.. తెలంగాణ రాష్ట్ర సాధన కోసం కన్నాయిగూడెం మండలంలోని పలు గ్రామాలకు చెందిన ఉద్యమకారులు ఎన్నో కష్టనష్టాలను ఎదుర్కొన్నారని గుర్తుచేశారు. నిర్బంధాలు, కేసులు, లాఠీ దెబ్బలను లెక్కచేయకుండా అలుపెరుగని పోరాటం సాగించారని అన్నారు.

తెలంగాణ ఉద్యమంలో పాల్గొన్న ఉద్యమకారులను గుర్తించి ప్రభుత్వం తక్షణమే పెన్షన్లు, ఇళ్ల స్థలాలు (Pension and Housing Benefits) కల్పించాలని డిమాండ్ చేశారు. ఉద్యమంలో అమరులైన వారి కుటుంబాలకు ఆర్థిక సాయం అందించడంతోపాటు ఇళ్లు నిర్మించి ఇవ్వాలని ప్రభుత్వాన్ని కోరారు.అనంతరం ఐక్యవేదిక కన్నాయిగూడెం మండల కమిటీ అధ్యక్షుడిగా తడకల భాస్కర్‌ను ఏకగ్రీవంగా ఎన్నుకున్నారు (Unanimous Election).

ఈ సందర్భంగా నూతన అధ్యక్షుడు తడకల భాస్కర్ మాట్లాడుతూ.. తనపై నమ్మకంతో అధ్యక్ష బాధ్యతలు అప్పగించినందుకు కృతజ్ఞతలు తెలిపారు. మండలంలోని అన్ని గ్రామాలకు చెందిన ఉద్యమకారుల పూర్తి వివరాలను సేకరించి, వారికి న్యాయం జరిగేలా ఐక్యవేదిక తరఫున కృషి చేస్తానని హామీ ఇచ్చారు.

ఈ సమావేశంలో ఓడపల్లి శ్యామ్, కృష్ణ, జినకల లక్ష్మణరావు, కావేరి చిన్ని కృష్ణ, పూజ కిషోర్, మఠం వెంకటేష్, శ్రీరాముల వెంకన్న, దుర్గం నారాయణ తదితరులు పాల్గొన్నారు.