న్యాయపోరాటం.. సర్పంచ్కి మళ్లీ బాధ్యతలు!
నాగర్‌కర్నూల్, అక్టోబర్ 10 (విజయక్రాంతి): ఎత్తం గ్రామ సర్పంచ్ బొల్లమోని లక్ష్మికి ఊరట లభించింది. తన సస్పెన్షన్ ఉత్తర్వులను సవాలు చేస్తూ ఆమె హైకోర్టును ఆశ్రయించగా, కోర్టు ఆదేశాల మేరకు జిల్లా కలెక్టర్ హేమంత్ కేశవ్ పాటిల్ అక్టోబర్ 9న సస్పెన్షన్‌ను ఎత్తివేస్తూ ఉత్తర్వులు జారీ చేశారు. దీంతో ఆమె తిరిగి సర్పంచ్‌గా బాధ్యతలు చేపట్టేందుకు మార్గం సుగమమైంది.
సర్పంచ్ లక్ష్మి, ఉప సర్పంచ్ ధర్మరాజు కలిసి చేసిన న్యాయపోరాటం (Legal Battle) ఫలించడంతో గ్రామంలో హర్షం వ్యక్తమవుతోంది. సర్పంచ్‌కు పంచాయతీ రికార్డులతో పాటు బాధ్యతలను అప్పగించాలని కోడేరు మండల పంచాయతీ అధికారి, ప్రత్యేక అధికారిని కలెక్టర్ ఆదేశించారు. తమకు అండగా నిలిచి సహకరించిన మాజీ ఎమ్మెల్యే బీరం హర్షవర్ధన్ రెడ్డికి సర్పంచ్ లక్ష్మి, ఉప సర్పంచ్ ధర్మరాజు కృతజ్ఞతలు తెలిపారు. హైకోర్టు ఆదేశాలతో సస్పెన్షన్ రద్దు కావడం తమ న్యాయపోరాటానికి లభించిన ఊరటగా వారు భావిస్తున్నారు.
