చిరుత సంచారం.. పాదముద్రల గుర్తింపు

జుక్కల్, సెప్టెంబర్ 25 (విజయక్రాంతి): కామారెడ్డి జిల్లా జుక్కల్ మండలం వజ్రఖండి గ్రామ శివారులో చిరుత సంచారం కలకలం రేపుతోంది. గురువారం సాయంత్రం గ్రామ శివారు ప్రాంతంలో చిరుత పాదముద్రలను గుర్తించినట్లు ఫారెస్ట్ బీట్ ఆఫీసర్ రాములు(Forest Beat Officer Ramulu) తెలిపారు. దీంతో గ్రామస్తులు, రైతులు అప్రమత్తంగా ఉండాలని అటవీశాఖ అధికారులు సూచించారు.

చిరుత సంచరిస్తున్నట్లు సమాచారం రావడంతో అటవీశాఖ సిబ్బంది సంఘటనా ప్రాంతాన్ని పరిశీలించి పాదముద్రలను గుర్తించారు. గ్రామ పరిసరాల్లోని వ్యవసాయ పొలాలు, పంట చేలల్లోకి రైతులు ఒంటరిగా వెళ్లకుండా జాగ్రత్తలు తీసుకోవాలని అధికారులు సూచించారు. ముఖ్యంగా ఉదయం, సాయంత్రం వేళల్లో పొలాలకు వెళ్లే రైతులు, వ్యవసాయ కూలీలు గుంపులుగా వెళ్లాలని తెలిపారు. రాత్రి సమయాల్లో అత్యవసరమైతే తప్ప గ్రామ శివారు ప్రాంతాల్లో సంచరించవద్దని హెచ్చరించారు.

అదేవిధంగా పశువులను పొలాల్లో లేదా బహిరంగ ప్రదేశాల్లో ఒంటరిగా వదిలేయకుండా జాగ్రత్తలు తీసుకోవాలని, పశువుల కొట్టాలకు వీలైనంత వరకు రక్షణ ఏర్పాట్లు చేసుకోవాలని సూచించారు. గొర్రెలు, మేకల కాపరులు ప్రత్యేక అప్రమత్తత పాటించాలని అధికారులు కోరారు.

చిరుత కనిపించినా దాని దగ్గరకు వెళ్లడం, వెంబడించడం లేదా ఫొటోలు, వీడియోలు తీసేందుకు ప్రయత్నించడం చేయకూడదని అటవీశాఖ అధికారులు సూచించారు. చిరుత సంచారం గురించి సమాచారం లభిస్తే వెంటనే అటవీశాఖ సిబ్బందికి తెలియజేయాలని కోరారు.

చిరుత పాదముద్రలు గుర్తించడంతో వజ్రఖండి గ్రామ శివారు ప్రజల్లో ఆందోళన నెలకొంది. అటవీశాఖ అధికారులు పరిస్థితిని పర్యవేక్షిస్తూ, ప్రజలు అప్రమత్తంగా ఉండాలని సూచించారు.