సినీ అవార్డుల వేడుకకు ఏక్తానగర్ సిద్ధం

గుజరాత్: దేశంలోనే ప్రతిష్టాత్మకమైన 72వ జాతీయ చలనచిత్ర అవార్డుల(Film awards) ప్రదానోత్సవం గుజరాత్‌లోని ఏక్తా నగర్‌ (Kevadia) వేదికగా ఘనంగా జరగనుంది. ఈ కార్యక్రమానికి భారత రాష్ట్రపతి ద్రౌపది ముర్ము ముఖ్య అతిథిగా హాజరై అవార్డు విజేతలకు పురస్కారాలను అందజేయనున్నారు. జాతీయ చలనచిత్ర అవార్డుల వేడుకను న్యూఢిల్లీ వెలుపల మరో రాష్ట్రంలో నిర్వహించడం ఇదే తొలిసారి కావడంతో ఈ కార్యక్రమానికి ప్రత్యేక ప్రాధాన్యత ఏర్పడింది. దీంతో గుజరాత్‌లోని ఏక్తా నగర్‌ వేదికగా జరగనున్న వేడుకపై సినీ వర్గాల్లో ఆసక్తి నెలకొంది.

భారతీయ సినీ రంగానికి విశేష సేవలు అందించిన ప్రముఖ నటీనటులు, దర్శకులు, నిర్మాతలు, సాంకేతిక నిపుణులతో పాటు వివిధ భాషలకు చెందిన సినీ ప్రముఖులు ఈ వేడుకలో పాల్గొననున్నారు. ఉత్తమ చిత్రాలు, నటన, దర్శకత్వం, సంగీతం, ఇతర సాంకేతిక విభాగాల్లో ప్రతిభ కనబరిచిన వారికి జాతీయ స్థాయి పురస్కారాలు అందజేయనున్నారు.రాష్ట్రపతి పర్యటన నేపథ్యంలో ఏక్తా నగర్‌లో అధికారులు ప్రత్యేక ఏర్పాట్లు చేశారు. గుజరాత్ గవర్నర్ ఆచార్య దేవవ్రత్, ఉన్నతాధికారులు రాష్ట్రపతికి ఘన స్వాగతం పలికారు. దేశవ్యాప్తంగా పలువురు సినీ ప్రముఖులు ఇప్పటికే ఏక్తా నగర్‌కు చేరుకుంటుండటంతో వేడుక ప్రాంతంలో సందడి నెలకొంది. భారతీయ సినిమా వైవిధ్యాన్ని, ప్రతిభను చాటిచెప్పే ఈ జాతీయ చలనచిత్ర అవార్డుల వేడుక సినీ అభిమానులను ఆకట్టుకోనుంది.