పశుసంవర్ధక రంగాభివృద్ధికి ప్రత్యేక కార్యాచరణ

- రైతుల ఆధార్ నమోదు 100% పూర్తి చేయాలి

నాగర్‌ కర్నూల్,(విజయక్రాంతి): జిల్లాలో పశుసంవర్ధక రంగాన్ని బలోపేతం చేసి పశుపోషక రైతుల ఆదాయం పెంచేందుకు అధికారులు సమన్వయంతో పనిచేయాలని జిల్లా కలెక్టర్ హేమంత్ కేశవ్ పాటీల్ ఆదేశించారు. జిల్లాలోని ప్రతి పశుపోషక రైతు ఆధార్ నమోదును 100 శాతం పూర్తి చేయాలని, ప్రభుత్వం అమలు చేస్తున్న పథకాల ప్రయోజనాలు అర్హులందరికీ చేరేలా చర్యలు తీసుకోవాలని సూచించారు.

శుక్రవారం జిల్లా కలెక్టరేట్‌లో నిర్వహించిన సమీక్షా సమావేశంలో కలెక్టర్ మాట్లాడుతూ, జిల్లాలో 31.66 లక్షల పశుసంపద ఉన్నందున వ్యాధి నిరోధక టీకాలు, మొబైల్ వెటర్నరీ సేవలు, కృత్రిమ గర్భధారణ, పశుగ్రాసం, పాల ఉత్పత్తి పెంపుపై ప్రత్యేక దృష్టి పెట్టాలని ఆదేశించారు. అలాగే జిల్లా కేంద్రంలో ఆధునిక జిల్లా పశువైద్యశాల ఏర్పాటుకు ప్రతిపాదనలు సిద్ధం చేసి ప్రభుత్వానికి పంపాలని అధికారులను ఆదేశించారు. గ్రామ స్థాయిలో రైతులకు శాస్త్రీయ పశుపోషణపై అవగాహన కార్యక్రమాలు నిర్వహించాలని సూచించారు.