పథకంపై చెదిరిన 'యువ' ఆశలు

- జాడ లేని 'రాజీవ్ యువ వికాసం' పథకం

- ఆవిరైన యువత ఆశలు

- హామీలకే పరిమితమైన యువ వికాసం

- రుణాల కోసం యువత ఎదురుచూపులు

- యువ వికాసంపై యువతలో అసహనం

వెంకటాపూర్,(విజయక్రాంతి): యువతకు ఉపాధి, స్వయం ఉపాధి అవకాశాలు కల్పించాలనే లక్ష్యంతో రాష్ట్ర ప్రభుత్వం ప్రతిష్ఠాత్మకంగా ప్రకటించిన రాజీవ్ యువ వికాసం పథకం(Rajiv Yuva Vikasam Scheme)పై మండల వ్యాప్తంగా యువతలో ఆశలు రోజురోజుకూ సన్నగిల్లుతున్నాయనే అభిప్రాయాలు వ్యక్తమవుతున్నాయి. ఉద్యోగ అవకాశాల కోసం ఎదురుచూస్తున్న నిరుద్యోగ యువత(Unemployed youth)కు ఈ పథకం ఓ ఆశాకిరణంగా కనిపించినప్పటికీ.. అమలు ప్రక్రియలో జాప్యం, స్పష్టత కొరవడటంతో అభ్యర్థుల్లో ఆందోళన నెలకొంటోంది.

ప్రచారంలో ఘనంగా.. ఆచరణలో ప్రశ్నార్థకం

పథకం ప్రకటించిన సమయంలో యువతకు వివిధ రంగాల్లో శిక్షణ, సబ్సిడీతో కూడిన రుణాలు, స్వయం ఉపాధి అవకాశాలు కల్పిస్తామని ప్రభుత్వం ప్రకటించింది. దీంతో గ్రామీణ ప్రాంతాల్లో అనేక మంది యువత పథకంపై ఆసక్తి కనబరిచారు. అయితే క్షేత్రస్థాయిలో పథకం అమలు ఏ దశలో ఉందనే విషయంపై స్పష్టత లేకపోవడం విమర్శలకు తావిస్తోంది.

దరఖాస్తులు తీసుకున్నారు, ప్రక్రియ ఎక్కడ.?

పథకానికి సంబంధించి యువత నుంచి దరఖాస్తులు స్వీకరించినప్పటికీ.. ఎంపిక, రుణాల మంజూరు వంటి అంశాలపై అభ్యర్థులకు స్పష్టమైన సమాచారం అందడం లేదనే వాదనలు వినిపిస్తున్నాయి. దరఖాస్తు చేసుకున్న తమ పరిస్థితి ఏమిటో తెలియక పలువురు యువకులు అధికారుల చుట్టూ తిరుగుతున్న పరిస్థితి నెలకొంటోందని చెబుతున్నారు.

స్వయం ఉపాధిపై ఎన్నో ఆశలు

ప్రభుత్వ ఉద్యోగాలు అందరికీ సాధ్యం కాని పరిస్థితుల్లో స్వయం ఉపాధి ద్వారా ఆర్థికంగా నిలదొక్కుకోవాలని అనేక మంది యువత భావిస్తున్నారు. చిన్న వ్యాపారాలు, వివిధ యూనిట్లు ఏర్పాటు చేసుకుని ఉపాధి పొందేందుకు పథకం ద్వారా ఆర్థిక సహాయం అందుతుందని ఆశించారు. రుణాలు, సబ్సిడీ అందడంలో జాప్యం జరిగితే తమ వ్యాపార ప్రణాళికలు వాయిదా పడే పరిస్థితి ఏర్పడుతుందని అభ్యర్థులు ఆందోళన వ్యక్తం చేస్తున్నారు.

యువతలో పెరుగుతున్న అసంతృప్తి

పథకం ద్వారా తమకు ఆర్థిక భరోసా లభిస్తుందని ఆశించిన యువతలో ప్రస్తుతం అసంతృప్తి పెరుగుతోంది. ప్రకటనలు, ప్రచారంతో పాటు పథకం ప్రయోజనాలు కూడా త్వరగా అందించాలని వారు కోరుతున్నారు. “హామీలు కాకుండా ఫలితాలు కావాలి” అంటూ పలువురు యువకులు తమ అసంతృప్తిని వ్యక్తం చేస్తున్నారు.