జట్ల ఎంపికలో ఏకపక్ష నిర్ణయాలు
- ప్రహసనంగా మార్చిన హెచ్సీఏ
- తెలంగాణ క్రికెట్ అసోసియేషన్ విమర్శలు
హైదరాబాద్, సెప్టెంబర్ 21 (విజయక్రాంతి): ప్రొఫెషనలిజాన్ని తీసుకొచ్చామని చెపుతున్నప్పటికీ, రాష్ట్ర జట్ల ఎంపికలోనూ ఏకపక్ష, అనియత నిర్ణయాలు కొనసాగుతున్నాయని తెలంగాణ క్రికెట్ అసోసియేషన్(Telangana Cricket Association) సోమవారం హైదరాబాద్ క్రికెట్ అసోసియేషన్(Hyderabad Cricket Association) (హెచ్సీఏపై తీవ్రస్థాయిలో విమర్శలు చేసింది. భారత మాజీ క్రికెటర్, హైదరాబాద్ టెస్ట్ క్రికెటర్ అంబటి రాయుడు(Ambati Rayudu)ను క్రికెట్ అడ్మినిస్ట్రేటర్(Cricket administrator)గా నియమించిన తర్వాత అయినా జట్ల ఎంపిక ప్రక్రియలో మార్పు రాలేని టీసీఏ జనరల్ సెక్రటరీ ధర్మ గురువారెడ్డి(Dharma Guruva Reddy) అన్నారు.
ఎంపిక ప్రక్రియలో నిజంగా ప్రొఫెషనలిజం తీసుకొచ్చి ఉంటే, 15 మంది సభ్యుల రాష్ట్ర జట్టులో ఏకంగా ఐదుగురు వికెట్ కీపర్లు ఎలా ఉంటారు? ఇది ఎలాంటి జట్టు కూర్పు? సాధారణంగా క్రికెట్పై అవగాహన ఉన్న సెలెక్టర్ లేదా క్రికెట్ అడ్మినిస్ట్రేటర్ ఇలా జట్టును రూపొందించరు అని అన్నారు. టీసీఏ పేర్కొన్న జాబితా ప్రకారం షేక్ రెహాన్ రోషన్, బి. వర్షిత్రెడ్డి, ఆదిత్య వర్ధన్, ఆదిత్య జవ్వాజీ, పి. ప్రిన్స్ వికెట్ కీపర్లుగా ఉన్నారు. ఈ ఐదుగురిలో ముగ్గురు రెగ్యులర్ వికెట్ కీపర్లుగా ఉండి, అదే సమయంలో అద్భుతమైన బ్యాటింగ్ లేదా బౌలింగ్ ప్రదర్శనలతో తమ స్థానాలను సంపాదించి ఉంటే, వారి ఎంపికను ఎవరూ ప్రశ్నించరు.
కానీ లీగ్లలో గణనీయమైన పరుగులు, ప్రదర్శనలు నమోదు చేసిన ఆటగాళ్లను పక్కన పెడితే మాత్రం తీవ్రమైన ప్రశ్నలు తలెత్తడం సహజం అని ఆయన అన్నారు. టీసీఏ పలువురు ఆటగాళ్ల ప్రదర్శనలను ప్రస్తావించింది. అసోసియేషన్ విడుదల చేసిన గణాంకాల ప్రకారం పి. అద్విత్ రెడ్డి రెండు రోజుల లీగ్, సూపర్-12, సూపర్-6 పోటీల్లో కలిపి 1,024 పరుగులు సాధించాడు. ఇందులో మూడు సెంచరీలు, నాలుగు అర్ధసెంచరీలు ఉన్నాయి. జస్వంత్ కన్నెబోయినా 696 పరుగులు సాధించగా, ఇందులో మూడు సెంచరీలు, మూడు అర్ధసెంచరీలు ఉన్నాయి.
బి. వర్షిత్ రెడ్డి 528 పరుగులు సాధించి, రెండు సెంచరీలు, ఒక అర్ధసెంచరీ నమోదు చేశాడు. ఆదిత్య వర్ధన్ 473 పరుగులు చేసి, ఒక సెంచరీ, ఒక అర్ధసెంచరీ సాధించాడు. ఎంపిక ప్రక్రియలో పెద్దగా మార్పు కనిపించడం లేదు. లీగ్లు నిర్వహించడంలోని ప్రధాన ఉద్దేశం ఆటగాళ్లకు తమ ప్రతిభను ప్రదర్శించి, తమ అర్హతను నిరూపించుకునే అవకాశం కల్పించడం. అలాంటి ప్రదర్శనలు తుది ఎంపికల్లో తగిన విధంగా ప్రతిబింబించకపోతే, యువ క్రికెటర్లకు మనం ఎలాంటి సందేశం ఇస్తున్నాం? అని రెడ్డి ప్రశ్నించారు.
తాజా ఎంపికలు మరోసారి మెరిట్ ఆధారంగా ఆటగాళ్లను ఎంపిక చేయడం కంటే, కొంతమందికి చోటు కల్పించినట్లుగా కనిపిస్తున్నాయని ఆయన ఆరోపించారు. ప్రొఫెషనలిజం, పారదర్శకత, క్రికెట్ అభివృద్ధి గురించి హెచ్సీఏ మాట్లాడుతూనే, స్పష్టమైన ప్రశ్నలకు తావిచ్చే ఎంపిక నిర్ణయాలు తీసుకోవడం సమంజసం కాదు అన్నారు. ఎంపిక ప్రక్రియలో మరింత పారదర్శకత తీసుకురావాలని, ప్రతిభావంతులైన యువ క్రికెటర్ల ప్రయోజనాలు ఏకపక్ష ఎంపిక విధానాల కారణంగా దెబ్బతినకూడదని టీసీఏ డిమాండ్ చేసింది.
