సరస్వతీ శిశు మందిర్‌లో ఘనంగా శ్రీకృష్ణ జన్మాష్టమి వేడుకలు

కృష్ణుడు, గోపికల వేషధారణలో ఆకట్టుకున్న చిన్నారులు

భజనలు, కీర్తనలతో పురవీధుల్లో శోభాయాత్ర

ఇచ్చోడ,(విజయక్రాంతి): ఇచ్చోడ మండల కేంద్రంలోని శ్రీ సరస్వతీ శిశు మందిర్ పాఠశాల(Sri Saraswati Shishu Mandir School)లో యాజమాన్యం ఆధ్వర్యంలో శ్రీకృష్ణ జన్మాష్టమి వేడుకలను(Sri Krishna Janmashtami celebrations) ఘనంగా నిర్వహించారు. ఈ సందర్భంగా బాలురు చిన్ని కృష్ణుని వేషధారణలో, బాలికలు గోపికల వేషధారణలో సందడి చేసి ప్రత్యేక ఆకర్షణగా నిలిచారు. శ్రీకృష్ణుని భజనలు, కీర్తనలతో చిన్నారులు పురవీధుల గుండా శోభాయాత్ర నిర్వహించారు. శివాజీ చౌక్, విఠల్–రుక్మిణీ మందిరంతో పాటు పాఠశాల ఆవరణలో ఉట్టి కొట్టే కార్యక్రమాలను ఉత్సాహంగా నిర్వహించారు.

అనంతరం జరిగిన కార్యక్రమంలో విశ్రాంత ఉపాధ్యాయుడు, ఆధ్యాత్మికవేత్త బొడ్డు భోజన్న ముఖ్య వక్తగా పాల్గొని విద్యార్థులు, పోషకులకు శ్రీకృష్ణ జన్మాష్టమి విశిష్టతను వివరించారు. భగవద్గీతలో శ్రీకృష్ణుడు బోధించిన ఉపదేశాలను మానవ జీవితానికి అన్వయించుకొని, జీవిత పరమార్థాన్ని తెలుసుకుని సన్మార్గంలో నడవాలని సూచించారు. విద్యార్థులు కృష్ణుడు, గోపికల వేషధారణలో ప్రదర్శించిన నృత్యాలు, సాంస్కృతిక కార్యక్రమాలు అందరినీ అలరించాయి.