గణపురం అభివృద్ధికి రూ.1.50 కోట్ల పనులు షురూ!

గణపురం, అక్టోబర్ 29 (విజయక్రాంతి): గణపురం మండలాన్ని అభివృద్ధిలో అగ్రగామిగా నిలిపేందుకు ప్రభుత్వం పెద్దపీట వేస్తోందని భూపాలపల్లి ఎమ్మెల్యే గండ్ర సత్యనారాయణ రావు అన్నారు. మండలంలోని పలు గ్రామాల్లో రూ.1.50 కోట్ల అంచనా వ్యయంతో చేపట్టనున్న అంగన్‌వాడీ, మహిళా సమాఖ్య భవనాల నిర్మాణ పనులకు గురువారం ఆయన శంకుస్థాపన చేశారు.

చెల్పూర్‌లో రూ.20 లక్షలతో అంగన్‌వాడీ భవనం, రెండు మహిళా సమాఖ్య భవనాలకు రూ.10 లక్షల చొప్పున నిర్మాణ పనులు ప్రారంభించారు. లక్ష్మారెడ్డిపల్లి, కరకపల్లిలో మహిళా సమాఖ్య భవనాల నిర్మాణానికి రూ.10 లక్షల చొప్పున నిధులతో పనులకు శ్రీకారం చుట్టారు. గాంధీనగర్‌లో రూ.20 లక్షలతో అంగన్‌వాడీ భవనం, గణపురం మండల కేంద్రంలో మూడు అంగన్‌వాడీ కేంద్రాల నిర్మాణానికి రూ.60 లక్షలు, బురకాయలగూడెంలో రూ.10 లక్షలతో మహిళా సంఘం భవన నిర్మాణానికి శంకుస్థాపన చేశారు.

ఈ సందర్భంగా ఎమ్మెల్యే గండ్ర సత్యనారాయణ రావు మాట్లాడుతూ గ్రామీణ ప్రాంతాల్లో మౌలిక వసతుల కల్పనతో పాటు మహిళలు, చిన్నారులకు మెరుగైన సౌకర్యాలు అందించడమే ప్రభుత్వ లక్ష్యమని తెలిపారు. చేపట్టిన అభివృద్ధి పనులను నాణ్యతా ప్రమాణాలతో (Quality Standards) నిర్ణీత గడువులో పూర్తి చేయాలని అధికారులను ఆదేశించారు. ప్రజలకు అవసరమైన మౌలిక వసతులను దశలవారీగా అందుబాటులోకి తీసుకొస్తామని తెలిపారు.

ఈ కార్యక్రమంలో తహసీల్దార్ అడ్లూరి రాజేశ్వరరావు, ఎంపీడీవో శ్రీకాంత్, పీఏసీఎస్‌ (PACS) చైర్మన్లు గండ్ర సత్యనారాయణ రెడ్డి, కన్నబోయిన కుమార్ యాదవ్, సర్పంచులు కట్కూరి రాధిక శ్రీనివాస్, కావటి రజిత రవీందర్, ఇంజపెల్లి శ్రీనివాస్, తుమ్మల సంపత్, సంపత్ రెడ్డి తదితరులు పాల్గొన్నారు.