సివిల్ రైట్స్ డేకు అధికారుల డుమ్మా
హుజురాబాద్, నవంబర్ 03 (విజయక్రాంతి): జూపాక గ్రామంలో అక్టోబర్ 30న నిర్వహించాల్సిన సివిల్ రైట్స్ డే (Civil Rights Day) అవగాహన కార్యక్రమం రద్దు కావడంపై పలువురు నాయకులు ఆగ్రహం వ్యక్తం చేశారు. కార్యక్రమం నిర్వహించకపోవడానికి బాధ్యులైన అధికారులపై చర్యలు తీసుకోవాలని తెలంగాణ అంబేద్కర్ సంఘం రాష్ట్ర కార్యదర్శి తునికి సమ్మయ్య, సామాజిక ఉద్యమ నేత వేల్పుల ప్రభాకర్, ముదిరాజు మహాసభ జిల్లా ఉపాధ్యక్షుడు కొలిపాక సమ్మయ్య తదితరులు డిమాండ్ చేశారు.
సివిల్ రైట్స్ డే సందర్భంగా మండల అధికారులు గ్రామాల్లో ప్రజలకు పౌర హక్కులపై (Civic Awareness) అవగాహన కల్పించాల్సిన బాధ్యత ఉందని వారు అన్నారు. ప్రతి పౌరుడికి రాజ్యాంగం కల్పించిన స్వేచ్ఛ, సమానత్వం, గౌరవం, న్యాయం, వివక్షకు వ్యతిరేకంగా ఉన్న హక్కులపై వివరించాల్సి ఉందన్నారు. రాజ్యాంగంలోని ఆర్టికల్ 14 సమానత్వ హక్కును, ఆర్టికల్ 15 వివక్ష నిషేధాన్ని, ఆర్టికల్ 17 అంటరానితనం నిర్మూలనను, ఆర్టికల్ 21 జీవించే హక్కు, వ్యక్తిగత స్వేచ్ఛను కల్పిస్తున్నాయని గుర్తుచేశారు. వీటిపై ప్రజలకు అవగాహన కల్పించకపోవడం విచారకరమని అభిప్రాయపడ్డారు.
ప్రజావాణిలో ప్రజలు తమ సమస్యల పరిష్కారం కోసం పలుమార్లు వినతిపత్రాలు సమర్పించినా అధికారుల నుంచి సరైన స్పందన రావడం లేదని వారు ఆరోపించారు. సమస్యలు పరిష్కారం కాకపోవడంతో ప్రజావాణిపై ప్రజలకు నమ్మకం సన్నగిల్లుతోందని విమర్శించారు. ప్రభుత్వ లక్ష్యానికి విరుద్ధంగా అధికారులు ప్రజావాణి కార్యక్రమాన్ని నిర్లక్ష్యం చేస్తున్నారని పేర్కొన్నారు.
ఇప్పటికైనా ఉన్నతాధికారులు స్పందించి సివిల్ రైట్స్ డే కార్యక్రమం నిర్వహించకపోవడంపై విచారణ (Official Inquiry) జరిపించాలని, బాధ్యులైన అధికారులపై చర్యలు తీసుకోవాలని విజ్ఞప్తి చేశారు. గ్రామీణ ప్రాంతాల్లో పౌర హక్కులపై అవగాహన కార్యక్రమాలను క్రమం తప్పకుండా నిర్వహించాలని కోరారు
