సర్కార్ కొత్త ప్లాన్

భూ వివాదాలకు చెక్.. రైతులకు నష్టం లేకుండా జాయింట్ సర్వేలు!

హైదరాబాద్: రాష్ట్రంలో ఏళ్ల తరబడి కొనసాగుతున్న భూ సరిహద్దు వివాదాలకు(Land border disputes) శాశ్వత పరిష్కారం చూపడంపై తెలంగాణ ప్రభుత్వం దృష్టి సారించింది. ముఖ్యంగా రెవెన్యూ, అటవీ భూముల మధ్య నెలకొన్న హద్దుల సమస్యలను పరిష్కరించేందుకు సంయుక్త సర్వేలు చేపట్టాలని నిర్ణయించింది. ఈ ప్రక్రియలో రైతులు, సామాన్య ప్రజలకు ఎలాంటి ఇబ్బందులు, నష్టాలు కలగకుండా చర్యలు తీసుకోవాలని రెవెన్యూ మంత్రి పొంగులేటి శ్రీనివాస్ రెడ్డి(Ponguleti Srinivas Reddy) అధికారులను ఆదేశించారు.

రెవెన్యూ, ఫారెస్ట్ శాఖలు సమన్వయంతో పనిచేయాలి

డాక్టర్ బీఆర్ అంబేద్కర్ రాష్ట్ర సచివాలయంలో సోమవారం రెవెన్యూ, అటవీ, సర్వే, సెటిల్‌మెంట్ శాఖల ఉన్నతాధికారులతో మంత్రి సమీక్ష నిర్వహించారు. రాష్ట్రంలోని రెవెన్యూ, ఫారెస్ట్ భూములకు(Forest Land) సంబంధించిన సరిహద్దు వివాదాలపై చర్చించారు.

రెండు శాఖల అధికారులు పరస్పర సమన్వయంతో క్షేత్రస్థాయిలో జాయింట్ సర్వేలు(Joint Survey) చేపట్టాలని సూచించారు. భూముల హద్దులను స్పష్టంగా గుర్తించి, రైతులకు ఎలాంటి అన్యాయం జరగకుండా జాగ్రత్తలు తీసుకోవాలని స్పష్టం చేశారు.

ఆధునిక టెక్నాలజీతో భూముల హద్దుల గుర్తింపు

భూముల సర్వేలో ఆధునిక సాంకేతిక పరిజ్ఞానం, శాస్త్రీయ విధానాలను వినియోగించాలని మంత్రి సూచించారు. అధికారుల మధ్య సమన్వయం, బాధ్యతాయుతమైన పనితీరుతో సర్వే ప్రక్రియను పారదర్శకంగా నిర్వహించాలని చెప్పారు.

భూముల సరిహద్దులను కచ్చితంగా గుర్తించడం ద్వారా భవిష్యత్తులో కొత్త వివాదాలు తలెత్తకుండా నివారించవచ్చని అభిప్రాయపడ్డారు. ఇందుకోసం జిల్లా, మండల స్థాయిల్లో రెవెన్యూ, అటవీ శాఖ అధికారులతో ప్రత్యేక కమిటీలను ఏర్పాటు చేయాలని ఆదేశించారు.

రైతులు, ప్రజల భాగస్వామ్యంతో పరిష్కారం

భూ సర్వే ప్రక్రియలో స్థానిక రైతులు, ప్రజలను భాగస్వాములను చేయాలని పొంగులేటి సూచించారు. క్షేత్రస్థాయిలో వాస్తవ పరిస్థితులను పరిశీలించి, సంబంధిత రికార్డులతో సరిపోల్చిన తర్వాతే భూముల సరిహద్దులను ఖరారు చేయాలని అధికారులకు దిశానిర్దేశం చేశారు. రెండు శాఖల మధ్య సమన్వయం లేకపోవడం వల్ల ప్రజలు ఇబ్బందులు ఎదుర్కొనే పరిస్థితులు రాకూడదని స్పష్టం చేశారు. సామాన్యుల హక్కులకు భంగం కలగకుండా సమస్యలను పరిష్కరించడమే ప్రాధాన్యంగా పనిచేయాలని పేర్కొన్నారు.

భూ రికార్డుల్లో పారదర్శకతే ప్రభుత్వ లక్ష్యం

రాష్ట్రంలో భూ రికార్డుల నిర్వహణలో సమగ్ర సంస్కరణలు తీసుకొస్తున్నట్లు మంత్రి వెల్లడించారు. సర్వే, సెటిల్‌మెంట్, భూ రికార్డుల శాఖల ద్వారా రికార్డుల్లో పారదర్శకత, కచ్చితత్వం పెంచేందుకు ప్రభుత్వం చర్యలు చేపడుతోందన్నారు. దశాబ్దాలుగా పెండింగ్‌లో ఉన్న భూ సమస్యలకు శాశ్వత పరిష్కారం చూపడం ప్రభుత్వ ప్రధాన లక్ష్యమని తెలిపారు. భూముల హద్దులపై స్పష్టత తీసుకురావడం ద్వారా రైతులకు భరోసా కల్పించడంతో పాటు భవిష్యత్తులో వివాదాలకు అవకాశం లేకుండా చేయాలని అధికారులకు సూచించారు.