స్కూల్‌ విద్యార్థినిపై కిరాతకం.. నిందితుడు అరెస్ట్‌!
అనంతపురం జిల్లా రాప్తాడులో పదో తరగతి విద్యార్థినిపై జరిగిన దాడి (School Girl Attack) తీవ్ర కలకలం రేపింది. ఓ యువకుడు చెట్లు నరికే రంపంతో బాలికపై దాడి చేసి తీవ్రంగా గాయపరిచాడు. ఈ దాడిలో బాలిక ముఖం, వీపు సహా శరీరంలోని పలు భాగాలకు గాయాలయ్యాయి. చేయి కూడా తెగిపోయినట్లు సమాచారం. ఈ ఘటనపై రాష్ట్రవ్యాప్తంగా ఆందోళన వ్యక్తమవుతోంది.
దాడికి పాల్పడిన యువకుడు ఘటనాస్థలం నుంచి పరారయ్యాడు. సమాచారం అందుకున్న పోలీసులు వెంటనే రంగంలోకి దిగారు. పాఠశాల పరిసరాల్లోని సీసీటీవీ కెమెరాల ఫుటేజీని (CCTV Footage) పరిశీలించి నిందితుడి కదలికలను గుర్తించారు. అనంతరం గాలింపు చేపట్టి ఘటన జరిగిన కొన్ని గంటల్లోనే ధర్మవరం రైల్వే స్టేషన్ సమీపంలో అతడిని అదుపులోకి తీసుకున్నారు. నిందితుడిని నాగులూరుకు చెందిన హేమంత్‌గా గుర్తించారు.
హేమంత్ సుమారు పదేళ్ల క్రితం అయ్యవారిపల్లెకు వచ్చినట్లు తెలుస్తోంది. తల్లిదండ్రులు మరణించడంతో అక్క వద్ద ఉంటున్నట్లు సమాచారం. ఈ దాడికి గల కారణాలు ఏమిటన్న దానిపై పోలీసులు విచారణ కొనసాగిస్తున్నారు (Police Investigation).
విద్యార్థినిపై జరిగిన దాడిని ప్రభుత్వం తీవ్రంగా పరిగణించింది. మంత్రి నారా లోకేశ్ స్పందిస్తూ.. బాలికపై దాడి అత్యంత అమానుషమని పేర్కొన్నారు. నిందితుడిని కఠినంగా శిక్షిస్తామని ఎక్స్ వేదికగా స్పష్టం చేశారు.
మరోవైపు ముఖ్యమంత్రి చంద్రబాబు నాయుడు బాధిత విద్యార్థిని తల్లికి ఫోన్ చేసి మాట్లాడారు. బాలిక ఆరోగ్య పరిస్థితిని అడిగి తెలుసుకున్నారు. ఆందోళన చెందవద్దని ధైర్యం చెబుతూ, విద్యార్థినికి మెరుగైన వైద్యం అందించేలా చర్యలు తీసుకోవాలని అధికారులను ఆదేశించారు. నిందితుడిపై కఠిన చర్యలు తీసుకుంటామని హామీ ఇచ్చారు (CM Chandrababu Naidu).
పాఠశాలలో చదువుకుంటున్న బాలికపై ఇంతటి దారుణానికి పాల్పడటంపై స్థానికులు తీవ్ర ఆగ్రహం వ్యక్తం చేస్తున్నారు. విద్యార్థినుల భద్రతపై ఆందోళన వ్యక్తమవుతోంది. బాధిత బాలికకు మెరుగైన చికిత్స అందించి, ఘటనకు బాధ్యుడైన వ్యక్తికి చట్టప్రకారం శిక్ష పడేలా చూడాలని ప్రజలు కోరుతున్నారు.
