ఫార్మా ప్లాంట్‌పై డ్రోన్ ఎటాక్‌.. ఒకరు మృతి
04-10-2026 | 02:33pm
ఉక్రెయిన్‌లోని సుమీ నగరంలో భారత మూలాలున్న కుసుమ్‌ గ్రూప్‌ (Kusum Group)కు చెందిన ఫార్మా ప్లాంట్‌పై రష్యా డ్రోన్ల దాడి (Drone Attack) కలకలం రేపింది. ఈ దాడిలో ఒకరు మృతి చెందగా.. పలువురు గాయపడినట్లు తాజా నివేదికలు వెల్లడించాయి. డ్రోన్ దాడి ధాటికి ప్లాంట్‌ ప్రధాన నిర్మాణం (Main Structure) తీవ్రంగా దెబ్బతిన్నట్లు సమాచారం. భవనంలోని పలు ప్రాంతాలు ధ్వంసమైనట్లు తెలుస్తోంది. అయితే మృతులు, క్షతగాత్రుల సంఖ్యపై ఇంకా పూర్తి స్పష్టత రావాల్సి ఉంది.
కుసుమ్‌ గ్రూప్‌ 1994లో భారత ఔషధాలను ఉక్రెయిన్‌కు ఎగుమతి చేసే పంపిణీ సంస్థగా (Pharma Distribution) కార్యకలాపాలు ప్రారంభించింది. భారతీయుడు రాజీవ్‌ గుప్తా నేతృత్వంలో సంస్థ క్రమంగా ఔషధ తయారీ రంగంలోకి ప్రవేశించింది. ఆ తర్వాత ఉక్రెయిన్‌లోనే తయారీ కార్యకలాపాలను విస్తరించింది. 2009లో సుమీ నగరంలో ఫార్మా తయారీ కేంద్రాన్ని (Manufacturing Plant) ఏర్పాటు చేసింది.
రష్యా–ఉక్రెయిన్‌ యుద్ధం (Russia-Ukraine War) కొనసాగుతున్నప్పటికీ సుమీలోని ప్లాంట్‌ కార్యకలాపాలను సంస్థ కొనసాగిస్తూ వచ్చింది. స్థానికంగా ఔషధాల తయారీ, సరఫరాలో ఈ కేంద్రం కీలకంగా వ్యవహరిస్తున్నట్లు సమాచారం.తాజా డ్రోన్ దాడితో ప్లాంట్‌కు భారీగా నష్టం (Heavy Damage) వాటిల్లినట్లు తెలుస్తోంది. దాడి అనంతరం సహాయక చర్యలు, నష్టాన్ని అంచనా వేసే ప్రక్రియ కొనసాగుతున్నట్లు సమాచారం.ప్లాంట్‌పై జరిగిన దాడికి సంబంధించిన పూర్తి వివరాలు, క్షతగాత్రుల పరిస్థితిపై మరింత సమాచారం వెలువడాల్సి ఉంది.
