CECకు భారత్ రత్నా?

న్యూఢిల్లీ: కేంద్ర ఎన్నికల సంఘం ప్రధాన ఎన్నికల కమిషనర్ (CEC) జ్ఞానేష్ కుమార్(Gyanesh Kumar Bharat Ratna) చుట్టూ రాజకీయంగా చర్చ కొనసాగుతున్న వేళ మరో సంచలన డిమాండ్ తెరపైకి వచ్చింది. జ్ఞానేష్ కుమార్‌కు దేశ అత్యున్నత పౌర పురస్కారం భారత్ రత్న ఇవ్వాలని నేషనలిస్ట్ సిటిజన్స్ పార్టీ ఆఫ్ ఇండియా (NCPI) ప్రధాని నరేంద్ర మోదీని కోరింది. ఈ మేరకు పార్టీ జాతీయ అధ్యక్షుడు జ్యోతి ప్రకాశ్ చటర్జీ ప్రధానికి లేఖ రాశారు.

బెంగాల్ ఎన్నికలను ప్రస్తావిస్తూ ప్రశంసలు

జ్ఞానేష్ కుమార్ నాయకత్వంలో పశ్చిమ బెంగాల్‌లో ఎన్నికల ప్రక్రియ ప్రశాంతంగా, విశ్వసనీయంగా సాగిందని NCPI తన లేఖలో పేర్కొంది. గతంలో బెంగాల్ ఎన్నికల సమయంలో హింస, బెదిరింపులు, అక్రమాలపై ఆరోపణలు ఉండేవని ప్రస్తావిస్తూ.. తాజా ఎన్నికల నిర్వహణతో ఓటర్లలో ఎన్నికల ప్రక్రియపై విశ్వాసం పెరిగిందని పార్టీ అభిప్రాయపడింది. ఈ సేవలను గుర్తించి జ్ఞానేష్ కుమార్‌కు భారత్ రత్న ఇవ్వాలని కోరింది.

ఇవి కూడా చదవండి: 24 గంటలు వెయిటింగ్

ఒకవైపు భారత్ రత్న డిమాండ్.. మరోవైపు తీవ్ర విమర్శలు

ఇదే సమయంలో SIR (Special Intensive Revision) ప్రక్రియపై ప్రతిపక్షాలు ఎన్నికల సంఘంపై తీవ్ర విమర్శలు చేస్తున్నాయి. ఓటర్ల జాబితాల సవరణకు సంబంధించిన నిర్ణయాలు, ప్రక్రియపై ప్రతిపక్షాలు పలు అభ్యంతరాలు వ్యక్తం చేస్తున్నాయి. కొన్ని నివేదికల ప్రకారం, ఎన్నికల కమిషన్‌లోని ఇద్దరు కమిషనర్లు SIRకు సంబంధించిన కొన్ని నిర్ణయాలపై గతంలో అభ్యంతరాలు నమోదు చేశారు. అయితే ఎన్నికల సంఘం మాత్రం తన నిర్ణయాలు ఏకగ్రీవంగానే తీసుకున్నామని చెబుతోంది.

జ్ఞానేశ్ కుమార్‌పై ప్రతిపక్షాల ఆందోళనలు

SIR వ్యవహారంపై INDIA కూటమి నేతలు(INDIA Bloc Protest) ఎన్నికల సంఘం పనితీరును ప్రశ్నిస్తూ దేశవ్యాప్తంగా కార్యక్రమాలు చేపట్టాలని నిర్ణయించారు. అక్టోబర్ 6న ప్రతిపక్ష ఎంపీలు ఎన్నికల సంఘం కార్యాలయం వరకు మార్చ్ నిర్వహించనున్నట్లు తాజా నివేదికలు పేర్కొంటున్నాయి. SIR కారణంగా ఓటర్ల జాబితాల్లో జరిగిన మార్పులపై తమ అభ్యంతరాలను వ్యక్తం చేయడమే ఈ కార్యక్రమాల ఉద్దేశమని ప్రతిపక్ష నేతలు చెబుతున్నారు.

ఎన్నికల సంఘం కూడా సమీక్షలో..

SIRపై వివాదం కొనసాగుతున్న నేపథ్యంలో ఎన్నికల సంఘం తన ప్రక్రియకు సంబంధించి పలు అంశాలను సమీక్షించింది. CEC జ్ఞానేష్ కుమార్‌తో పాటు ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి సమావేశమై వివిధ అంశాలపై చర్చించారు. అనంతరం ఎన్నికల ప్రక్రియపై వస్తున్న ప్రశ్నలకు ఎన్నికల సంఘం వివరణలు కూడా ఇచ్చింది.

ఇవి కూడా చదవండి: ‘సేవ్ డెమోక్రసీ’ మార్చ్

ఇప్పుడు అసలు చర్చ ఇదే..

ఒకవైపు జ్ఞానేష్ కుమార్‌కు భారత్ రత్న ఇవ్వాలన్న NCPI డిమాండ్, మరోవైపు SIRపై ప్రతిపక్షాల నిరసనలు, CECపై విమర్శలు—ఈ రెండు పరిణామాలు ఒకేసారి తెరపైకి రావడంతో ఎన్నికల సంఘం వ్యవహారం మరోసారి రాజకీయ చర్చకు కేంద్రంగా మారింది. భారత్ రత్న డిమాండ్‌పై కేంద్రం నుంచి ఎలాంటి నిర్ణయం వెలువడిందనే సమాచారం మాత్రం ప్రస్తుతానికి లేదు.