సింగరేణిలో శ్రీకారం.. కోల్ ఇండియాలో అమలు

1. దేశవ్యాప్తంగా అమలుకు ప్రధాన మంత్రి కార్యాలయం ఆదేశాలు 
2. అన్ని ప్రభుత్వ శాఖలు, పబ్లిక్ సెక్టార్ సంస్థల్లో అమలు చేయాలని సూచన 
3. కార్పొరేట్ సాలరీ ప్యాకేజ్ కింద.. ఆయా బ్యాంకుల్లో సాలరీ అకౌంట్  తీసుకుంటే చాలు 
4. ఇదే పథకాన్ని అమలు చేస్తున్న తెలంగాణ ఆర్టీసీ, పోలీస్, జెన్‌కోలు
5. వివిధ శాఖలు, ప్రభుత్వ రంగ సంస్థల వద్దకు క్యూ కడుతున్న బ్యాంకులు 
6. బాధిత కుటుంబాలు రోడ్డున పడకుండా భరోసా కల్పిస్త్తున్న బీమా పథకం

* ప్రమాద బీమా.. ఎంతో కొంత ప్రీమియం కడితేనే ఇన్స్యూరెన్స్ కంపెనీలు, బ్యాంకులు అమలు చేసే పథకం ఇది. పైగా అదికూడా ప్రీమియంను బట్టి ప్రమాదంలో మరణించిన బాధిత కుటుంబానికి వచ్చేది ఎంత అని ఉంటుం ది. ఇది ఒకప్పటి మాట.. ఇప్పుడు పరిస్థితులు మారాయి..  జీరో ప్రీమియంతో. కేవలం సంస్థలో ఒప్పందం కుదుర్చుకున్న బ్యాంకులో సాలరీ అకౌంట్ తీసు కుంటే చాలు. అంతే.. రూ. 1.25 కోట్లకు ప్రమాద బీమా మీకు భరోసా కల్పిస్తుంది. సరికొత్తగా రూపొందించిన ఈ బీమా పథకం ఆ రంగంలో సంచలనం సృష్టిస్తోంది. ఉద్యోగులు, ప్రభుత్వ శాఖలు, ప్రైవేట్ సంస్థలు, బ్యాంకర్లను ఈ పథకం ఆకర్షిస్తోంది.

హైదరాబాద్, నవంబర్ 29 (విజయక్రాంతి) : కొద్ది కాలం క్రితం ఈ పథకాన్ని సింగరేణి సంస్థలో అమల్లోకి తీసుకొచ్చా రు. ఒక్కొక్క సింగరేణి కార్మిడికి రూ. 1.25 కోట్ల ప్రమాద బీమా అమలు చేసేందుకు ఆ సంస్థ సీఎండీ ఎన్. బలరామ్ వివిధ బ్యాంకులతో చర్చించారు. అయితే, ఆయా బ్యాంకులు తమ బ్యాంకులోనే సాలరీ ఖాతాలు తెరిస్తే ఈ బీమాను ఒక్క రూపాయి కూడా ప్రీమియంగా చెల్లించకుండానే అమలు చేస్తామని చెప్పడంతో.. యూనియన్ బ్యాంక్, పంజాబ్ నేషనల్ బ్యాంక్, బ్యాంక్ ఆఫ్ బరోడా తదితర బ్యాంకులతో కలిసి సింగరేణి వ్యాప్తంగా ఉద్యోగులు, కార్మికులు, కాంట్రాక్టు కార్మికులకు దీనిని వర్తింపజేసేలా చర్యలు తీసు కున్నారు. దీనిని కార్పొరేట్ సాలరీ ప్యాకేజ్ (సీఎస్‌పీ)గా వ్యవహరిస్తున్నారు.

కోల్ ఇండియాలో అమలు..

దేశంలోనే మొదటి సారిగా సింగరేణి లో అమలవుతున్న 1.25 కోట్ల ప్రమాద బీమా పథకం గురించి తెలుసుకున్న కోల్ ఇండియా యాజమాన్యం కూడా తమ ఉద్యోగులు, కార్మికులకు ఈ పథకాన్ని అమలు చేయాలని తలచింది. బ్యాంకర్లతో మాట్లాడి వేలాది మంది తమ ఉద్యో గులు, కార్మికులకు అమల్లోకి తీసుకొచ్చింది. ఇదిలా ఉండగా.. సింగరేణిలో మొదలైన ఈ పథకం గురించి తెలుసుకున్న తెలంగాణ జెన్‌కో, ఆర్టీసీ, పోలీసు శాఖలుకూడా ఈ పథకం వైపు మొగ్గుచూపాయి. ఆపత్కాలంలో బాధిత కుటుంబాలను ఆదుకునేలా  తీర్చిదిద్దిన ఈ పథకంపై అన్ని శాఖల్లోనూ చర్చ జరగడంతో పాటు.. ఆసక్తిని వ్యక్తంచేస్తున్నారు. తమకుకూడా ఈ పథకాన్ని అమ లు చేయాలని డిమాండ్ చేస్తున్నారు.

ప్రధాన మంత్రి కార్యాలయం ఆదేశాలు..

సింగరేణిలో ప్రారంభించిన ఈ ప్రమాద బీమా పథకం ఒక్కో శాఖ నుంచి నేరుగా ప్రధాన మంత్రి కార్యాలయానికి చేరింది. దీనిని పరిశీలించిన ప్రధాన మంత్రి కార్యాలయం కోల్ ఇండియాతోనూ మాట్లాడింది. ఈ పథకం వల్ల ఉద్యోగులకు ప్రమాద సమయాల్లో కలిగే ఆర్థిక స్వాంత్వన, ఆ బాధిత కుటుంబానికి లభించే భరోసాను నిశితంగా పరిశీలించిన తరువాత.. ఏకంగా దేశ వ్యాప్తంగా ఉన్న అన్ని ప్రభుత్వ శాఖల్లోనూ, ప్రభుత్వ రంగ సంస్థల్లోనూ ఈ పథకాన్ని (సీఎస్‌పీ) అమలు చేయాలంటూ సర్క్యులర్ జారీ చేశారు. ఇది రెగ్యులర్ ఉద్యోగులకే కాదు.. కాంట్రాక్టు ఉద్యోగులకుకూడా వర్తింపచేయాలంటూ ప్రధాన మంత్రి కార్యా లయం నుంచి ఆదేశాలు జారీచేయడంతో ఒక్కో రాష్ట్రంలో ఆయా ప్రభుత్వ శాఖల ప్రిన్సిపల్ సెక్రెటరీలు, చీఫ్ సెక్రెటరీలు ఆ దిశగా చర్యలు తీసుకుంటున్నారు.

అనేక లాభాలు..

ఇలా కార్పొరేట్ సాలరీ ప్యాకేజ్ (సీఎస్‌పీ) కింద బ్యాంకులో ఖాతా తెరిస్తే.. రెగ్యులర్ ఉద్యోగులకు రూ. 1 కోటి నుంచి రూ. 1.25 కోట్ల వరకు ప్రమాద బీమా వర్తిస్తుంది. అలాగే రూ. 2 కోట్ల వరకు విమాన ప్రమాద బీమాతోపాటు సాధారణ మరణం అయితే.. రూ. 10 లక్షల వరకు చెల్లించేలా ఈ బీమా పథకాన్ని రూపొందించారు. అదే కాకుండా, హెల్త్ ఇన్స్యూరెన్స్ ప్రీమియంలో డిస్కౌంట్, రుణాలపై చార్జీల తగ్గింపు, ఏటీఎం ఉపయోగించుకునే అవకాశాలు ఎక్కువగా కల్పించాలని పీఎం కార్యాలయం నుంచి ఆదేశాలు జారీ అయ్యాయి. ఇక కాంట్రాక్టు ఉద్యోగుల విషయంలో వ్యక్తిగత ప్రమాద బీమా రూ. 2 లక్షల నుంచి రూ. 62.5 లక్షలకు పెంచారు. అలాగే విమాన ప్రమాద బీమాను రూ. 40 లక్షల నుంచి రూ. కోటికి, ఇతర విషయాల్లోనూ బెనిఫిట్స్ అందేలా చూస్తారు.

ప్రీమియం సున్నా..

ఇన్ని రకాలుగా ఉద్యోగులు, కాంట్రాక్టు ఉద్యోగులకు లాభం కలిగించేలా రూపొందించిన సీఎస్‌పీ పథకం కోసం ఒక్క రూపాయికూడా ప్రీమియంగా చెల్లించాల్సిన అవసరం లేకుండా సింగరేణి సీఎండీ ఎన్.బలరామ్ బ్యాంకర్లతో చర్చించి రూపొందించగా.. యధాతథంగా దేశ వ్యాప్తంగా అమలు చేయాలంటూ ప్రధాన మంత్రి కార్యాలయం నుంచి స్పష్టమైన సూచనలు అన్ని రాష్ట్రాల సీఎస్‌లకు, సంస్థల హెడ్‌లకు వెళ్లాయి. ఇప్పటికే కోల్ ఇండియాలో 2.15 లక్షల మంది ఉద్యోగులు, 70 శాతం మంది కాంట్రాక్టు ఉద్యోగులకు దీనిని అమలు చేస్తున్నారు. అలాగే నైవేలీ లిగ్నైట్ కార్పొరేషన్ (ఎన్‌ఎల్‌సీ)లో 3500 మందికి, సింగరేణిలో 39755 మందికి అమలు చేస్తున్నారని, ఎస్‌బీఐ, యూబీఐ, పీఎన్‌బీ లాంటి బ్యాంకులు దీనికి సహకరిస్తున్నాయని ఏకంగా పీఎంవో నుంచి వచ్చిన సర్క్యులర్‌లోనే పేర్కొన్నారు.

బ్యాంకులు క్యూ..

ఏకంగా ప్రధాన మంత్రి కార్యాలయం నుంచి సూచనలు అందడంతో.. బ్యాంకులు కూడా దేశ వ్యాప్తంగా అన్ని రాష్ట్రాల్లోనూ ప్రభుత్వ శాఖల ప్రిన్సిపల్ సెక్రెటరీల వద్దకు, చీఫ్ సెక్రెటరీల వద్దకు, పబ్లిక్ సెక్టార్ సంస్థల ఛైర్మన్, వైస్ ఛైర్మన్, ఎండీల వద్దకు క్యూలు కడుతున్నాయి. అయితే ఈ పథకంలో ఉద్యోగులకు ఒక్క రూపాయి ఖర్చు లేకపోవడం వారికి లాభం అయితే.. బ్యాంకుల్లో సాలరీ ఖాతాలు తెరిస్తే.. ప్రతి నెలా ఆయా ఖాతాల్లో పడే జీతభత్యాల వల్ల బ్యాంకులకు ఆదా యం సమకూరుతుందన్నమాట.

ఇలా సమకూరే ఆదాయంలోంచే బ్యాంకులు బీమా సంస్థలతో ఒప్పందం కుదుర్చుకుని రూ. 1.25 కోట్ల బీమా పథకాన్ని అమలు చేస్తున్నాయన్నమాట. పైగా ప్రభుత్వానికి, ప్రభుత్వ రంగ సంస్థలు కూడా ఒక్క రూపా యి చెల్లించాల్సిన అవసరం లేదు. దీనివల్ల ఇటు ఉద్యోగులకు, అటు ప్రభుత్వ శాఖలు, సంస్థలకు, మరోపక్క బ్యాంకులకు, ఇంకోపక్క బీమా కంపెనీలకు కూడా లాభదా యకంగా ఉండటంతో.. ప్రతి ఉద్యోగి, శాఖాధిపతులు కూడా ఈ సీఎస్‌పీ పథకంవైపు మొగ్గుచూపుతున్నారు.  

కేస్ స్టడీ-1

* నాగుల సంతోష్ ఆర్‌కే-7లో జనరల్ మజ్దూర్‌గా పనిచేస్తున్నాడు. నిజానికి సంతోష్ తండ్రి రాజయ్య సింగరేణి కార్మికుడు. ఆయన ఆరోగ్యం సహకరిం చకపోవడంతో.. మెడికల్ అన్‌ఫిట్ కావడంతో తండ్రి స్థానంలో కుమారుడు సంతోష్‌కు జనరల్ మజ్దూర్‌గా సింగరేణి యాజమాన్యం ఉద్యోగం ఇచ్చింది. అయితే దురదృష్టవశాత్తు 2024 అక్టోబర్‌లో రోడ్డు ప్రమాదానికి గురైన సంతోష్ దుర్మరణం పాలయ్యాడు. దీనితో ఆకుటుంబానికి ఆసరా లేకుండా పోయింది. తండ్రి రాజయ్యకు అనారోగ్యంతో పనిచేసి కుటుంబాన్ని నడపలేని స్థితి. అయితే అప్పటికే బ్యాంకులతో రూ. కోటి ప్రమాదబీమాను సింగరేణి అమలు చేస్తుండ టంతో.. రూ. కోటి బీమా డబ్బులు ఆ కుటుంబానికి అండగా నిలిచాయి. ఆ కుటుంబం రోడ్డున పడకుండా బీమా ఆదుకుంది.

కేస్ స్టడీ-2

* పేంద్రి రంజిత్‌కుమార్ జీడీకే 1, 3 ఇంక్లున్ పరిధిలోని ఆర్‌జీ-1లో సపోర్ట్‌మ్యాన్‌గా పనిచేసేవాడు. 2024 ఆగస్టు లో ప్రమాదవశాత్తు ఒక రోడ్డు ప్రమాదంలో రంజిత్‌కుమార్ మరణించాడు. అప్పటికి రంజిత్, ఆయన భార్య పేంద్రి లతకు మూడు నెలల పసిగుడ్డు. ఎటూ పోలేని పరిస్థితి. కనీసం కుటుం బం గడవడానికి కూడా బయటకు వెళ్లలేని స్థితి లో బీమా పథకం అండగా నిలిచింది. సింగరేణి యాజమాన్యం ఆధ్వర్యంలో బ్యాంకులో కార్పొరేట్ సాలరీ ప్యాకేజీ (సీఎస్‌పీ) కింద రంజిత్‌కుమార్‌కు అకౌంట్ ఉండటంతో.. రూ. 1.25 కోట్ల బీమా సౌకర్యం వర్తించింది. ఈ బీమా డబ్బులు రంజిత్ భార్య లతకు కొండంత అండగా నిలిచాయి.