పశువులకు ఉచితంగా నట్టల మందులు

ఎల్లారెడ్డి, నవంబర్ 2 (విజయక్రాంతి): ఎల్లారెడ్డి మండలంలోని వెల్లుట్లపేట గ్రామంలో ఆవులు, గేదెలు, లేగదూడల పొట్టలో పెరిగే నట్టలను (పేగు పురుగులు) నివారించేందుకు తెలంగాణ ప్రభుత్వ పశుసంవర్ధక శాఖ ఆధ్వర్యంలో ఉచిత నట్టల నివారణ మందుల పంపిణీ (Deworming) కార్యక్రమం నిర్వహించారు. ఈ విషయాన్ని పశువైద్యాధికారి అర్చన తెలిపారు.

ఈ సందర్భంగా పశువైద్యాధికారి అర్చన మాట్లాడుతూ.. పశువులకు నట్టల నివారణ మందులు పంపిణీ చేయడంతో పాటు వాటి ఆరోగ్య పరిరక్షణపై రైతులకు అవగాహన (Awareness) కల్పించినట్లు తెలిపారు. నట్టల నివారణతో పశువుల పెరుగుదల, ఆరోగ్యం, పాల ఉత్పత్తి (Milk Production) మెరుగుపడతాయని వివరించారు. ప్రభుత్వం అందిస్తున్న ఉచిత పశువైద్య సేవలను రైతులు సద్వినియోగం చేసుకోవాలని సూచించారు.

ఈ కార్యక్రమంలో గ్రామ సర్పంచ్ కొయ్యల వినోద్ రాజా గౌడ్, పశువైద్యాధికారి అర్చన, పశువైద్య సిబ్బంది శ్రీనివాస్, సయ్యద్ మహబూబ్, రైతులు పటేల్ రవి, చిమ్మ రాములు తదితరులు పాల్గొన్నారు.