భారీ వర్ష సూచన.. ఇదిగో లేటెస్ట్ వెదర్ అప్డేట్
బంగాళాఖాతంలో కొత్త అల్పపీడనం.. తెలుగు రాష్ట్రాలకు వర్ష సూచన!
హైదరాబాద్ / అమరావతి: అర్నాబ్, మురసు తుఫాన్ల ప్రభావం నుంచి పూర్తిగా కోలుకోకముందే తెలుగు రాష్ట్రాలకు మరో వర్ష సూచన అందింది. తూర్పు తెలంగాణ, దానిని ఆనుకుని ఉన్న ఉత్తర కోస్తాంధ్ర ప్రాంతాలపై కొనసాగుతున్న Upper Air Cyclonic Circulation ప్రభావంతో ఏపీ, తెలంగాణలో అక్కడక్కడ వర్షాలు కురిసే అవకాశం ఉందని వాతావరణ శాఖ తెలిపింది. మరోవైపు బంగాళాఖాతంలో కొత్తగా Low Pressure Area ఏర్పడే పరిస్థితులు కనిపిస్తున్నాయని IMD తాజా అంచనాలో వెల్లడించింది.
ఏపీ, తెలంగాణలో వర్షాలు ఎక్కడెక్కడంటే?
ప్రస్తుత వాతావరణ పరిస్థితుల కారణంగా కోస్తాంధ్ర, రాయలసీమ ప్రాంతాల్లో రాగల కొన్ని రోజులు అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది. కొన్ని ప్రాంతాల్లో ఉరుములు, మెరుపులతో కూడిన జల్లులు పడవచ్చని అధికారులు అంచనా వేస్తున్నారు. అల్లూరి సీతారామరాజు, పోలవరం, అనకాపల్లి, కాకినాడ, కృష్ణా, పల్నాడు, మార్కాపురం, ప్రకాశం, నెల్లూరు, అన్నమయ్య, చిత్తూరు, తిరుపతి జిల్లాల్లో వర్ష సూచన ఉంది. తెలంగాణలోనూ నవంబర్ 7 వరకు అక్కడక్కడ తేలికపాటి నుంచి మోస్తరు వర్షాలు పడే అవకాశం ఉందని తాజా Forecast సూచిస్తోంది.
నవంబర్ 13న బంగాళాఖాతంలో అల్పపీడనం?
ఇదిలా ఉండగా, ఆగ్నేయ బంగాళాఖాతం, దానికి ఆనుకుని ఉన్న అండమాన్ సముద్రం పరిసరాల్లో నవంబర్ 11 ప్రాంతంలో ఉపరితల ఆవర్తనం ఏర్పడే అవకాశం ఉందని IMD అంచనా వేసింది. దీని ప్రభావంతో నవంబర్ 13 నాటికి ఆగ్నేయ బంగాళాఖాతంలో అల్పపీడనం ఏర్పడవచ్చని తెలిపింది. అనంతరం ఈ వ్యవస్థ నవంబర్ 15 నాటికి నైరుతి బంగాళాఖాతం వైపు కదిలే అవకాశం ఉంది. అయితే ఇది వాయుగుండంగా బలపడే అవకాశాలు ప్రస్తుతం తక్కువగానే ఉన్నాయని వాతావరణ శాఖ పేర్కొంది.
తమిళనాడు, కేరళకు భారీ వర్ష సూచన
కొత్తగా ఏర్పడే అల్పపీడనం ప్రభావం దక్షిణాది రాష్ట్రాలపై ఎలా ఉంటుందనే దానిపై వాతావరణ శాఖ నిశితంగా పరిశీలిస్తోంది. నవంబర్ 12 నుంచి 18 మధ్య తమిళనాడు, కేరళలోని కొన్ని ప్రాంతాల్లో భారీ వర్షాలు కురిసే అవకాశం ఉందని నిపుణులు అంచనా వేస్తున్నారు. అయితే అల్పపీడనం ఏర్పడిన తర్వాత దాని కదలిక, తీవ్రత ఆధారంగా వర్షాలపై మరింత స్పష్టత రానుంది. ప్రస్తుతం ఏపీ, తెలంగాణ ప్రజలు స్థానిక Weather Updates గమనిస్తూ, ఉరుములు, మెరుపుల సమయంలో బయటకు వెళ్లకుండా జాగ్రత్తలు తీసుకోవాలని అధికారులు సూచిస్తున్నారు.
