హైదరాబాద్‌లోనూ కరెంట్‌ వినియోగం జోరు
హైదరాబాద్‌: తెలంగాణ రాష్ట్రంలో విద్యుత్‌ డిమాండ్‌ సరికొత్త రికార్డు సృష్టించింది. రాష్ట్ర చరిత్రలో తొలిసారిగా గరిష్ఠ విద్యుత్‌ డిమాండ్‌ 20 వేల మెగావాట్ల మార్కును దాటింది. అక్టోబర్‌ 15న రాష్ట్రవ్యాప్తంగా 20,003 మెగావాట్ల గరిష్ఠ విద్యుత్‌ డిమాండ్‌ నమోదైనట్లు విద్యుత్‌ శాఖ వెల్లడించింది. గతంలో నమోదైన రికార్డును అధిగమిస్తూ రాష్ట్రంలో విద్యుత్‌ అవసరాలు భారీగా పెరిగినట్లు తాజా గణాంకాలు స్పష్టం చేస్తున్నాయి.
హైదరాబాద్‌లోనూ భారీగా విద్యుత్‌ డిమాండ్‌
రాష్ట్ర రాజధాని హైదరాబాద్‌లోనూ విద్యుత్‌ వినియోగం గణనీయంగా పెరిగింది. నగరంలో 4,220 మెగావాట్ల గరిష్ఠ విద్యుత్‌ డిమాండ్‌ నమోదైంది. గృహాలు, వ్యవసాయం, వాణిజ్య సంస్థలు, పరిశ్రమల నుంచి విద్యుత్‌ అవసరాలు పెరుగుతుండటంతో సరఫరా వ్యవస్థపై ఒత్తిడి అధికమవుతోంది. పెరుగుతున్న డిమాండ్‌కు అనుగుణంగా విద్యుత్‌ సరఫరాను కొనసాగించేందుకు అధికారులు చర్యలు చేపడుతున్నారు.
