మండల స్థాయి ఉత్తమ ఉపాధ్యాయుల సన్మానం

గండీడ్: మండల కేంద్రంలోని బాలుర ఉన్నత పాఠశాల ఆవరణలో మండల స్థాయి ఉపాధ్యాయ దినోత్సవాన్ని ఘనంగా నిర్వహించారు. ఈ సందర్భంగా ఉత్తమ ఉపాధ్యాయులుగా ఎంపికైన 18 మందిని శాలువాలు, మెమెంటోలతో సన్మానించారు. మండల విద్యాధికారి రుద్రారం జనార్ధన్(Mandal Educational Officer Rudraram Janardhan) మాట్లాడుతూ విద్యార్థులకు నైతిక విలువలు, సామాజిక అవగాహన కల్పించడంలో ఉపాధ్యాయుల పాత్ర కీలకమన్నారు. అవార్డు గ్రహీతలు మాట్లాడుతూ ఈ సన్మానం తమపై మరింత బాధ్యతను పెంచిందన్నారు. కార్యక్రమంలో వివిధ ఉపాధ్యాయ సంఘాల నాయకులు, ప్రధానోపాధ్యాయులు, ఉపాధ్యాయులు పాల్గొన్నారు.