సీఎంకు కవిత కౌంటర్.. సీబీఐ విచారణకు డిమాండ్

హైదరాబాద్: సీఎం రేవంత్ రెడ్డి(CM Revanth Reddy) తన కుటుంబంపై చేసిన భూ ఆరోపణలకు తెలంగాణ రక్షణ సేన(TRS) అధ్యక్షురాలు కల్వకుంట్ల కవిత తీవ్రంగా స్పందించారు. ఎన్నికల అఫిడవిట్‌లో తాను ప్రకటించిన ఆస్తుల కంటే ఒక్క గజం భూమి అదనంగా ఉన్నట్లు తేలినా, ఆ భూమిని ప్రభుత్వానికి సరెండర్ చేస్తానని స్పష్టం చేశారు. తన ఆస్తులకు సంబంధించి ఎలాంటి అవకతవకలు లేవని ఆమె పేర్కొన్నారు.

అసెంబ్లీ వేదికగా సీఎం రేవంత్ రెడ్డి తన కుటుంబానికి ఎక్కడో భూములు ఉన్నాయని తప్పుడు ఆరోపణలు చేశారని కవిత విమర్శించారు. ముఖ్యమంత్రి చెప్పిన భూముల వివరాల్లో వాస్తవాలు ఏమిటో తేల్చాల్సిన అవసరం ఉందన్నారు. ఈ అంశంపై రాష్ట్ర ప్రభుత్వంపై తమకు నమ్మకం లేదని, అందువల్ల అసెంబ్లీలో సీఎం ప్రస్తావించిన భూముల వ్యవహారంపై సీబీఐతో సమగ్ర విచారణ జరిపించాలని డిమాండ్ చేశారు.

తన కుటుంబానికి సంబంధించిన ఆస్తుల విషయంలో తాను ఇప్పటికే ఎన్నికల అఫిడవిట్‌లో వివరాలను వెల్లడించానని కవిత తెలిపారు. ప్రభుత్వ నిబంధనలకు విరుద్ధంగా లేదా అఫిడవిట్‌లో పేర్కొన్న దానికంటే అదనంగా ఒక్క గజం భూమి ఉన్నట్లు నిర్ధారణ అయినా దానిని ప్రభుత్వానికి అప్పగించేందుకు సిద్ధంగా ఉన్నానని మరోసారి స్పష్టం చేశారు.

అదే సమయంలో సీఎం అసెంబ్లీలో ప్రస్తావించిన పలువురు వ్యక్తులు, రాజకీయ నాయకులు, వ్యాపారవేత్తలకు సంబంధించిన భూములపై కూడా విచారణ జరపాలని కవిత డిమాండ్ చేశారు. సీఎం ప్రస్తావించిన భూముల వివరాలతో పాటు నవీన్ రావు, కొండల్ రావు, గంగుల కమలాకర్, ఎర్రబెల్లి దయాకర్ రావు, జగదీశ్ రెడ్డి, రామేశ్వర్ రావు, ప్రతిమ శ్రీనివాస్ రావు, పల్లా రాజేశ్వర్ రెడ్డి, సుధీర్ రెడ్డి, పైలెట్ రోహిత్ రెడ్డి తదితరుల భూములపై సమగ్ర దర్యాప్తు చేయాలని కోరారు.

కేసీఆర్ ఫామ్‌హౌస్‌లో ఉండే సీఎం గూఢచారి సహా పలువురి భూముల వివరాలను కూడా విచారణ పరిధిలోకి తీసుకురావాలని ఆమె అన్నారు. భూముల వ్యవహారంలో ఎవరి పాత్ర ఉన్నా వాస్తవాలు బయటకు రావాల్సిందేనని పేర్కొన్నారు. ఈ మేరకు సీబీఐతో సమగ్ర విచారణకు ఆదేశాలు ఇవ్వాలని ప్రభుత్వాన్ని కవిత డిమాండ్ చేశారు.

‘గుంపు మేస్త్రీ–గుంటనక్క’ వ్యవహారంలో ఇద్దరూ కలిసి ఉన్నారన్న తన ఆరోపణను కవిత మరోసారి ప్రస్తావించారు. అయితే ఈ ఆరోపణలకు సంబంధించిన వాస్తవాలను విచారణ ద్వారా తేల్చాలని ఆమె కోరారు. సీఎం చేసిన ఆరోపణలు, అసెంబ్లీలో ప్రస్తావించిన భూముల వివరాలపై నిష్పక్షపాతంగా దర్యాప్తు జరిగితే అసలు నిజాలు వెలుగులోకి వస్తాయని కవిత పేర్కొన్నారు.

తనపై, తన కుటుంబంపై చేస్తున్న భూ ఆరోపణలను రుజువు చేయాలని సవాల్ విసిరిన కవిత.. ఎన్నికల అఫిడవిట్‌లో ప్రకటించిన ఆస్తుల కంటే అదనంగా ఒక్క గజం భూమి ఉన్నా ప్రభుత్వానికి అప్పగిస్తానని పునరుద్ఘాటించారు. అదే సమయంలో సీఎం ప్రస్తావించిన ఇతరుల భూములపై కూడా సీబీఐ విచారణ జరిపించి పూర్తి వాస్తవాలను ప్రజల ముందు ఉంచాలని ఆమె డిమాండ్ చేశారు.