సింధు దూకుడు
లక్ష్యకు షాక్.. సింధు, ఆయుష్లకు నెక్ట్స్ రౌండ్ టికెట్!
నగోయా: ఆసియా క్రీడల్లో భారత బ్యాడ్మింటన్కు(India Badminton) శనివారం మిశ్రమ ఫలితాలు ఎదురయ్యాయి. స్టార్ షట్లర్ పీ.వీ. సింధు(PV Sindhu Asian Games), యువ ఆటగాడు ఆయుష్ శెట్టి తమ సింగిల్స్ మ్యాచ్ల్లో విజయాలు సాధించి రౌండ్ ఆఫ్ 16లోకి దూసుకెళ్లగా.. లక్ష్య సేన్ మాత్రం రెండో రౌండ్లోనే టోర్నీ నుంచి నిష్క్రమించాడు. తొలి రౌండ్లో బై పొందిన సింధు.. మహిళల సింగిల్స్ రెండో రౌండ్లో చైనీస్ తైపీకి చెందిన చియు పిన్-చియాన్ను 21-19, 21-14 తేడాతో ఓడించింది. ప్రారంభ గేమ్లో ప్రత్యర్థి నుంచి గట్టి పోటీ ఎదురైనా, కీలక దశల్లో సింధు ఆధిపత్యం ప్రదర్శించి మ్యాచ్ను వరుస గేముల్లోనే ముగించింది.
ఈ విజయంతో సింధు ప్రీ-క్వార్టర్ ఫైనల్(Sindhu Pre-quarterfinal) బెర్త్ ఖరారు చేసుకుంది. తదుపరి రౌండ్లో జపాన్కు చెందిన టోమోకా మియాజాకితో ఆమె తలపడనుంది. సొంతగడ్డపై ఆడుతున్న జపాన్ షట్లర్ను ఎదుర్కోవడం సింధుకు మరో ఆసక్తికర పరీక్ష కానుంది. మరోవైపు యువ భారత షట్లర్ ఆయుష్ శెట్టి(Indian shuttler Ayush Shetty) కూడా సత్తా చాటాడు. కజకిస్థాన్కు చెందిన మక్సుట్ తజిబుల్లయేవ్పై విజయం సాధించి రౌండ్ ఆఫ్ 16లో అడుగుపెట్టాడు. ఇప్పుడు తదుపరి దశలో చైనీస్ తైపీకి చెందిన చౌ టియన్-చెన్ను ఎదుర్కోనున్నాడు.
అయితే లక్ష్య సేన్ ప్రయాణం మాత్రం రెండో రౌండ్తోనే ముగిసింది. సింగపూర్కు చెందిన మాజీ ప్రపంచ ఛాంపియన్ లోహ్ కీన్ యూ(Former world champion Loh Kean Yew) 21-12, 15-21, 21-14తో లక్ష్యను ఓడించాడు. తొలి గేమ్లో ఆధిపత్యం చూపిన లోహ్కు లక్ష్య రెండో గేమ్లో గట్టి సమాధానం ఇచ్చినా.. నిర్ణయాత్మక మూడో గేమ్లో సింగపూర్ ఆటగాడు పైచేయి సాధించాడు. మొత్తంగా భారత బ్యాడ్మింటన్ సింగిల్స్ విభాగంలో సింధు, ఆయుష్ తదుపరి దశకు చేరడం ఊరటనిస్తే.. లక్ష్య నిష్క్రమణ నిరాశ కలిగించింది. ఇక రౌండ్ ఆఫ్ 16లో సింధు, ఆయుష్ తమ ప్రత్యర్థులపై ఎలా రాణిస్తారన్నదే ఇప్పుడు ఆసక్తికరంగా మారింది.
