1. తమిళనాడు, ఆంధ్రప్రదేశ్ రాష్ట్రాలతో కాదు 
2. విజన్ డాక్యుమెంట్‌లో రెండు కీలక అంశాలు మొదటిది విజన్, మరొకటి స్ట్రాటజీ 
3. లక్ష్యం.. మూడు ట్రిలియన్ల ఆర్థిక వ్యవస్థ: సీఎం రేవంత్‌రెడ్డి
4. తెలంగాణ రైజింగ్ -2047 పాలసీ, గ్లోబల్ సమ్మిట్‌పై సమీక్ష

హైదరాబాద్, నవంబర్ 30 (విజయక్రాంతి): తెలంగాణను మూడు ట్రిలి యన్ల ఆర్థిక వ్యవస్థగా తీర్చిదిద్దడమే లక్ష్యమని, అభివృద్ధి చెందిన దేశాలైన చైనా, జపాన్, సింగపూర్‌తోనే తమకు పోటీ అని, అంతేగానీ.. తమ పోటీ ఏపీ, తమిళనాడు రాష్ట్రాలతో కాదని ముఖ్యమంత్రి రేవంత్‌రెడ్డి పేర్కొన్నారు. హైదరాబాద్‌లోని సచివాలయంలో డిప్యూటీ సీఎం భట్టివిక్రమార్కతో కలిసి ఆదివారం తెలంగాణ రైజింగ్ -2047 పాలసీ డాక్యుమెంట్, 8, 9వ తేదీల్లో ప్యూచర్ సిటీలో నిర్వహించనున్న రాష్ట్ర రైజింగ్ గ్లోబల్ సమ్మిట్‌పై నిర్వహించిన సమీక్షా సమావేశంలో ఆయన మాట్లాడారు.

రాష్ట్ర ప్రజల భవిష్యత్ కోసం పారదర్శక విధానాలు అమలులోకి తీసుకురాబోతున్నట్లు వివరించారు. ప్రజలకిచ్చిన ప్రతి హామీని అమలు చేస్తున్నట్లు వెల్లడించారు. విజన్ డాక్యుమెంట్‌లో రెండు ప్రధానమైన అంశాలున్నాయని, ఒకటి దార్శనికత (విజన్) అయితే, మరొకటి ఎత్తుగడ (స్ట్రాటజీ) అని అభివర్ణించారు. డాక్యుమెంట్ రూపకల్పనకు వివిధ రంగాలకు చెందిన నిపుణులు, ప్రముఖులతోపాటు లక్షలాది మంది సలహాలు తీసుకున్నట్లు తెలిపారు.

స్ట్రాటజీలో భాగంగా రాష్ట్రాన్ని మూడు విభాగాలుగా విభజించామని, అవి కోర్, ప్యూర్, రేర్ రీజియన్లని స్పష్టం చేశారు. ఔటర్ రింగ్ రోడ్డు (ఓఆర్‌ఆర్) లోపల వివిధ విభాగాల పాలన ఉంటుందని, అందుకే ఈ ప్రాంతం మొత్తం కోర్ అర్బన్ రీజియన్ అని నామకరణం చేశామన్నారు. ఓఆర్‌ఆర్, ట్రిపుల్ ఆర్ మధ్య ప్రాంతాన్ని పెరి అర్బన్ రీజియన్‌గా గుర్తించామని వివరించారు. ఈ ప్రాంతాన్ని మ్యానుఫాక్చరింగ్ జోన్‌గా మారుస్తామని వెల్లడించారు.

కోర్ అర్బన్ రీజియన్‌ను సర్వీస్ సెక్టార్ కేంద్రంగా మారుస్తున్నామని తెలిపారు. మూసీ ప్రక్షాళన, మెట్రో విస్తరణ వంటి కార్యక్రమాలు చేస్తామని వివరించారు. ఔటర్ రింగ్ రోడ్డు అవతలి భాగంలో రీజినల్ రింగ్ రోడ్లు రాబోతున్నాయని తెలిపారు. ఫ్యూచర్ సీటీతోపాటు అనేకం ఈ రీజినల్‌లో ఉండబోతున్నాయని, గ్రీన్ ఫీల్డ్ హై వే, బుల్లెట్ ట్రైన్ రాబోతున్నాయని స్పష్టం చేశారు.

మచిలీపట్నం పోర్టుకు కనెక్టివిటీ తీసుకువస్తున్నామని వివరించారు. వరంగల్ , ఆదిలాబాద్, కొత్తగూడెం, రామగుండానికి ఎయిర్ పోర్టులు తీసుకురాబో తున్నామని వెల్లడించారు. అన్నింటినీ క్రోడీకరించి తెలంగాణ రైజింగ్ విజన్ డాక్యూమెంట్ 2047 అమలు చేస్తామని తెలిపారు.

అభివృద్ధి చెందిన దేశాలతో పోటీ 

తెలంగాణలోని అన్నివర్గాలను దృష్టిలో ఉంచుకుని అభివృద్ధి ప్రణాళికలు రచిస్తున్నామని సీఎం తెలిపారు. దేశానికి అవసరం అయిన దానికంటే అహారధాన్యాలను ఉత్ప త్తి చేస్తున్నామని, కానీ.. పౌష్టికాహారం ఇవ్వలేకపోతున్నామని పేర్కొన్నారు. అందరికీ విద్య అందుబాటులో ఉన్నప్పటికి నాణ్యమైన విద్య, సాంకేతిక విధ్య అందుబాటులో లేదని అభిప్రాయపడ్డారు. అంతర్జాతీయ విద్యా సంస్థలను రాష్ట్రానికి రప్పించి ‘నాలెడ్జ్ హబ్’ ఏర్పాటుకు కృషి చేస్తామన్నారు.

తెలంగాణను 2034 నాటికి వన్ ట్రిలియన్, 2047 మూడు ట్రిలియన్ల ఆర్థికవ్యవస్థగా తీర్చిదిద్దడమే లక్ష్యంగా నిర్దేశించుకున్నామని సీఎం తెలిపారు. దేశంలో తెలంగాణ వాటా 10 శాతానికి పెంచేలా ప్రణాళికలు రూపొందిస్తున్నామని వివరించారు. చైనా, జపాన్, జర్మనీ, సౌత్ కొరియా, సింగపూర్ దేశాలు తమకు రోల్ మోడల్ అని పేర్కొన్నారు. ఆంధ్రప్రదేశ్, తమిళనాడు తమకు పోటీ కాదని వెల్లడించారు.

అభివృద్ధి చెందిన దేశాలతో పోటీ పడి, వారి నుంచి తెలంగాణకు పెట్టుబడులను ఆకర్షిస్తున్నామని వివరించారు. రాష్ట్రానికి పెద్ద పెద్ద పరిశ్రమలు రాబోతున్నాయని తెలిపారు. రైజింగ్ గ్లోబల్ సమ్మిట్‌కు అనేక మంది ప్రముఖులను ఆహ్వానిస్తున్నామని, ప్రజాభవన్‌లో డిప్యూటీ సీఎం భట్టి ఆధ్వర్యంలో వార్ రూం ఏర్పా టు చేసినట్లు చెప్పారు. 

డాక్యుమెంట్‌పై అధ్యయనం చేయాలి

తెలంగాణ రైజింగ్- 2047 పాలసీ డాక్యుమెంట్, రాష్ట్ర రైజింగ్ గ్లోబల్ సమ్మిట్ సమీక్షలో సీఎం రేవంత్ రెడ్డి మంత్రులకు పలు కీలక సూచనలిచ్చారు. ‘సోమ, మంగళవారాల్లో రైజింగ్ విజన్ డాక్యుమెంట్‌ను మంత్రులు, సంబంధిత విభాగాల అధికారులు క్షుణ్ణంగా అధ్యయనం చేయాలి. 2వ తేదీ రాత్రిలోపు నివేదిక సమర్పించాలి. 3, 4వ  తేదీల్లో అన్ని శాఖలు ఇచ్చిన నివేదికలను ప్రభుత్వ సీఎస్, స్పెషల్ సీఎస్,  సీఎంవో అధికారులు పరిశీలించి, అవసరమైన మార్పులు చేర్పులు చేసి తుది ప్రతి సిద్ధం చేయాలి.

6వ తేదీ సాయంత్రం వరకు తెలంగాణ రైజింగ్ విజన్ 2047 డాక్యుమెంట్ సంపూర్ణం గా సిద్ధం కావాలి. అన్ని విభాగాల అధికారులు తెలంగాణ రైజింగ్ డాక్యుమెంట్ రూపకల్పన కోసం పూర్తి సమయం కేటాయించాలి. గ్లోబల్ సదస్సు ఏర్పాట్ల నిర్వహణలో శాఖల మధ్య సమన్వయం ఉండాలి’ అని సీఎం ఆదేశించారు. అనంతరం గ్లోబల్ సమ్మిట్‌కు సంబంధించిన పోస్టర్లు, ఆహ్వాన పత్రాలను సీఎం, మంత్రులు ఆవిష్కరించారు.  

మూడేళ్ల ప్రణాళికలు వివరిస్తాం: మంత్రి శ్రీధర్‌బాబు  

రెండేళ్లలో తమ ప్రభుత్వం చేపట్టిన అభివృద్ధి కార్యక్రమాలు, వచ్చే మూడేళ్లలో అభివృద్ధి ప్రణాళికలపై విజన్ డాక్యుమెంట్ ఉంటుందని మంత్రి శ్రీధర్‌బాబు తెలిపారు. 2047లోపు రాష్ట్రాన్ని మూడు ట్రిలియన్ల ఆర్థిక వ్యవస్థ చేయాలనే సంకల్పంతో అంచనాలు రూపొందించామని వివరించారు. ఈనెల 8, 9వ తేదీల్లో తెలంగాణ రైజింగ్ గ్లోబిల్ సమ్మిట్‌ను నిర్వహిస్తున్నామని తెలిపారు. అన్ని శాఖలకు సంబంధించి డాక్యుమెంట్ రూపొందించామని, అందుకు సుమారు 4 లక్షల మంది నుంచి సలహాలు, సూచనలు తీసుకున్నట్లు స్పష్టంచేశారు. 

నేటి నుంచి ఉత్సవాలు: డిప్యూటీ సీఎం భట్టి

రాష్ట్రంలో కాంగ్రెస్ ప్రభుత్వం ఏ ర్పడి రెండేళ్లు పూర్తయిన సందర్భంగా రాష్ట్రవ్యాప్తంగా ఉత్సవాలు నిర్వహించాలని నిర్ణయించినట్లు డిప్యూటీ సీ ఎం భట్టివిక్రమార్క తెలిపారు. సోమవారం నుంచే వేడుకలు ప్రారంభం కాబోతున్నాయన్నారు. అన్ని ఉమ్మడి జిల్లాల్లో కార్యక్రమాలు ఉంటాయన్నా రు. డిసెంబర్ 1న మక్తల్, 2న కొత్తగూ డెం, 3న హుస్నాబాద్, 4న ఆదిలాబాద్, 5న నర్సంపేట, 6న దేవరకొం డ, 7న ఉస్మానియా యూనివర్సిటీలో ఉత్సవాలు ఉంటాయని వివరించారు.

అదే రోజు ఓయూలో సీఎం రేవంత్‌రె డ్డి పలు అభివృద్ది కార్యక్రమాలకు శం కుస్థాపన చేస్తారని చెప్పారు. 8న ప్యూచర్ సిటీలో సమ్మి ట్ ఉంటుందన్నారు. 9 నుంచి భవిష్య త్ కార్యాచర ణ ఉంటుందని, తెలంగాణ విజన్ -2047 డాక్యుమెంట్ విడుదలు చేస్తామని తెలిపారు. 13న ఫుట్‌బాల్ దిగ్గజం మెస్సీతో ఉప్పల్ స్టే డియంలో ఫ్రెండ్లీ మ్యాచ్ ఉంటుందన్నారు.