పెళ్లి వేడుకలో ప్రాణాలు తీసిన పార్కింగ్ వివాదం

పాట్నా: బీహార్‌లోని భోజ్‌పూర్ జిల్లా(Bhojpur district)లో జరిగిన ఒక వివాహ వేడుకలో పార్కింగ్ విషయంలో జరిగిన ఘర్షణ హింసాత్మకంగా మారడంతో ఇద్దరు వ్యక్తులు కాల్పుల్లో మరణించగా, ఐదుగురు గాయపడ్డారని పోలీసులు సోమవారం తెలిపారు. ఆదివారం రాత్రి 9.30 గంటల ప్రాంతంలో గర్హాని పోలీస్ స్టేషన్(Garhani Police Station) ప్రాంతంలోని లహర్పా గ్రామంలో ఈ సంఘటన జరిగిందని వారు పేర్కొన్నారు. ఒక వివాహ వేడుకలో వాహనాలను పార్కింగ్ చేయడంపై రెండు వర్గాల మధ్య తీవ్ర వాగ్వాదం చెలరేగింది. ఆ తర్వాత ఒక వర్గం మరోవైపు కాల్పులు జరిపిందని పోలీసులు ఒక ప్రకటనలో తెలిపారు.

"ఒక వ్యక్తి బుల్లెట్ గాయంతో అక్కడికక్కడే మరణించగా, మరొకరిని ఆసుపత్రిలో వైద్యులు చనిపోయినట్లు ప్రకటించారు" అని పోలీసులు తెలిపారు. మృతులను లవ్‌కుష్, రాహుల్‌గా గుర్తించారు. మరో ఐదుగురు తుపాకీ కాల్పులకు గురై భోజ్‌పూర్ జిల్లా ప్రధాన కార్యాలయం అరాలోని ఆసుపత్రిలో చికిత్స పొందుతున్నారని పోలీసులు తెలిపారు. ఈ ఘటనపై కేసు నమోదు చేసి మృతదేహాలను పోస్ట్‌మార్టం నిమిత్తం మార్చురీకి పంపామని పోలీసులు చెప్పారు. దర్యాప్తు ఇంకా కొనసాగుతుందని చెప్పిన పోలీసులు కాల్పులు జరిపిన నిందితులను గుర్తించేందుకు ప్రయత్నిస్తున్నట్లు తెలిపారు.