‘డబుల్’పై డౌట్స్
చర్చనీయాంశంగా 3,900 మంది ఉద్యోగుల రెండు జీతాల వ్యవహారం
- వారికి డబుల్ వేతనాలు ఎలా వెళ్లాయి?
- సాంకేతిక లోపాలా? అక్రమ ఎంట్రీలా?
- తేల్చనున్న అహ్మద్ నదీమ్ కమిటీ.. త్వరలో నివేదిక
- ఒకే ఆధార్‌తో రెండు శాఖల్లో జీతాలు.. మరణించిన ఉద్యోగుల పేరిటా చెల్లింపులు?
- గత జూన్ నుంచే 3,900 మంది శాలరీల నిలిపివేత
- పోలీస్ శాఖలోనే అధికంగా గుర్తింపు
- అక్రమంగా చెల్లించిన సొమ్ము రికవరీకి ప్రభుత్వం కసరత్తు
- బాధ్యులపై క్రమశిక్షణ, క్రిమినల్ చర్యలు తీసుకునే చాన్స్
అక్టోబర్ 25 (విజయక్రాంతి): ప్రభుత్వ ఉద్యోగుల జీతాల(Salaries of government employees) చెల్లింపుల్లో భారీ అక్రమాలు జరిగాయ న్న అనుమానాలు చర్చనీయాంశంగా మారుతున్నాయి. ఒకే ఆధార్ నంబర్‌తో వేర్వేరు ప్రభుత్వ శాఖల్లో జీతాలు పొందుతున్నట్లు గుర్తించిన అధికారులు.. సుమారు 3,900 మంది ఉద్యోగుల వ్యవహారాన్ని పరిశీలిస్తున్నట్లు సమాచారం.
జీతాల చెల్లింపుల్లో తలెత్తిన లోపాలపై విచారణ జరుపుతున్న అహ్మద్ నదీమ్ కమిటీ త్వరలో రాష్ట్ర ప్రభుత్వానికి నివేదిక సమర్పించనుంది. ఈ నివేదికలో వెల్లడయ్యే అంశాల ఆధారంగా ప్రభుత్వం తదుపరి చర్యలు చేపట్టే అవకాశం ఉంది. ప్రభుత్వ ఉద్యోగులకు ప్రతి నెలా జీతాలు చెల్లించడం సాధారణ పరిపాలనా ప్రక్రియే అయినప్పటికీ..
ఆ చెల్లింపులకు ఆధారమైన ఉద్యోగుల వివ రాలు, సర్వీసు రికార్డులు, ఆధార్ సమాచారం, మరణాల నమోదు వంటి అంశాల్లో లోపాలు ఉంటే ప్రభుత్వ ఖజానాపై అదనపు భారం పడే ప్రమాదం ఉంది. ఒక ఉద్యోగికి ఒకటి కంటే ఎక్కువ చోట్ల నుంచి జీతాలు అందుతున్నాయా? ఉద్యోగి సర్వీసు ముగిసిన తర్వాత కూడా చెల్లింపులు కొనసాగుతున్నాయా? మరణించిన ఉద్యోగుల పేర్లపై జీతాలు జమవుతున్నాయా?
వంటి ప్రశ్నలు ఇప్పుడు కీలకంగా మారాయి. ఉద్యోగుల వివరాలను ఆన్‌లైన్‌లో నమోదు చేసే సమయంలో వివిధ శాఖల డేటాబేస్‌లను పరిశీలించగా.. ఒకే గుర్తింపు వివరాలతో ఒకటి కంటే ఎక్కువ జీతాల చెల్లింపులు జరుగుతున్నట్లు అనుమానాలు వ్యక్తమైనట్లు సమాచారం. సాధారణంగా ఒక ప్రభుత్వ ఉద్యోగి నియామకం, సర్వీసు వివరాలు, హాజరు, పదోన్నతులు, బదిలీలు, పదవీ విరమణ, జీతాల చెల్లింపులకు సంబంధించి నిర్దిష్ట రికార్డులు నిర్వహించాల్సి ఉంటుంది. ఉద్యోగి ఏ శాఖలో పనిచేస్తున్నారు?
ఆ ఉద్యోగికి ఏ పేరోల్ నుంచి జీతం చెల్లిస్తున్నారు? సర్వీసు కొనసాగుతోందా? అనే వివరాలు స్పష్టంగా ఉండాలి. అయితే, వేర్వేరు శాఖల్లోని డేటాబేస్‌లను పరస్పరం అనుసంధానం చేయకపోవడం లేదా రికార్డులను ఎప్పటికప్పుడు అప్‌డేట్ చేయకపోవడం వల్ల ఇలాంటి డబుల్ చెల్లింపులు ఉత్పన్నమయ్యే అవకాశం ఉంది.
పోలీస్ శాఖలోనే అధికం..!
డబుల్ జీతాలకు సంబంధించిన అనుమానాస్పద రికార్డుల్లో పోలీస్ శాఖకు చెందిన ఉద్యోగుల వివరాలు అధికంగా ఉన్నట్లు సమాచారం. ముఖ్యంగా నక్సల్స్ ప్రభావిత ప్రాంతాల్లో విధులు నిర్వహిస్తూ ప్రాణాలు కోల్పోయిన సుమారు 600 మంది ఉద్యోగుల వివరాలు ఈ విచారణలో కీలకంగా మారాయి.
విధి నిర్వహణలో మరణించిన ఉద్యోగుల సమాచారాన్ని సంబంధిత రికార్డుల్లో సకాలంలో నమోదు చేయకపోవడం వల్ల జీతాల చెల్లింపులు కొనసాగాయా? అనే కోణంలో అధికారులు పరిశీలిస్తున్నట్లు తెలుస్తున్నది. ప్రభుత్వ ఉద్యోగి మరణించినప్పుడు సంబంధిత శాఖలో ఆ ఉద్యోగి సర్వీసు వివరాలను అప్‌డేట్ చేయడం, జీతాల చెల్లింపులను నిలిపివేయడం, కుటుంబ సభ్యులకు వర్తించే ప్రయోజనాలను వేరుగా ప్రాసెస్ చేయడం వంటి ప్రక్రియలు ఉంటాయి.
ఈ దశల్లో ఏదైనా లోపం జరిగితే.. మరణించిన ఉద్యోగి పేరుతో జీతం జమయ్యే చాన్స్ ఉంది. ముఖ్యంగా దూరప్రాంతాల్లో పనిచేసే సిబ్బంది మరణాల సమాచారం సంబంధిత కార్యాలయాలకు చేరడంలో జాప్యం జరిగినా, ఆ వివరాలు డేటాబేస్‌లో నమోదు కాకపోయినా సమస్యలు తలెత్తవచ్చు. సుమారు 3,900 మంది ఉద్యోగులకు గత జూన్ నుంచే జీతాల చెల్లింపులను నిలిపివేసినట్లు సమాచారం. అయితే, జీతాలు నిలిపివేసిన తర్వాత కూడా సంబంధిత శాఖలను సంప్రదించని ఉద్యోగులు ఉన్నట్లు తెలుస్తున్నది.
కమిటీ నివేదికపై ఉత్కంఠ..
జీతాల చెల్లింపుల్లో అక్రమాలపై విచారణ జరుపుతున్న అహ్మద్ నదీమ్ కమిటీ నివేదిక ఇప్పుడు కీలకంగా మారింది. వివిధ శాఖల నుంచి సేకరించిన ఉద్యోగుల వివరాలు, ఆధార్ ఆధారిత రికార్డులు, జీతాల చెల్లింపుల వివరాలు, మరణించిన ఉద్యోగుల సమాచారం వంటి అంశాలను సమగ్రంగా పరిశీలించి నివేదిక రూపొందిస్తున్నట్లు సమాచారం.
ఈనివేదికలో ప్రధానంగా ఒకే గుర్తింపు వివరాలతో ఒకటి కంటే ఎక్కువ చోట్ల నమోదైన ఉద్యోగుల రికార్డుల్లో ఎన్ని అక్రమాలు ఉన్నాయి?, మరణించిన ఉద్యోగుల పేర్లపై జీతాలు చెల్లింపులు జరిగాయా? జరిగితే ఎంతకాలం కొనసాగాయి?, డేటా నమోదు, సాంకేతిక సమస్యలు, శాఖల మధ్య సమాచార సమన్వయ లోపాల కారణంగా ఎన్ని అనుమానాస్పద రికార్డులు ఏర్పడ్డాయి?,
ఈ లోపాలకు సంబంధించి ఏ స్థాయిలో అధికారుల బాధ్యత ఉంది? వంటి అంశాలపై స్పష్టత రావాల్సి ఉంది. కేవలం జీతాలు పొందిన ఉద్యోగుల వివరాలనే కాకుండా, చెల్లింపులను ఆమోదించిన అధికారులు, పేరోల్ రికార్డులను నిర్వహించిన సిబ్బంది, ఉద్యోగుల మరణాల సమాచారాన్ని నమోదు చేయాల్సిన బాధ్యుల పాత్రను కూడా విచారణలో పరిశీలించాల్సి ఉంటుంది.
ఉద్యోగి మరణించిన విషయం తెలిసినా రికార్డులు నవీకరించకపోవడం, ఒకే ఉద్యోగికి రెండు చోట్ల జీతాలు చెల్లింపులు జరుగుతున్నా గుర్తించకపోవడం వంటి అంశాలు నిర్లక్ష్యాన్ని సూచిస్తే.. ఉద్దేశపూర్వకంగా అక్రమ చెల్లింపులకు సహకరించినట్లు ఆధారాలు లభిస్తే అది మరింత తీవ్రమైన వ్యవహారంగా మారుతుందని ఉద్యోగ వర్గాలు అంటున్నాయి.
అయితే బాధ్యులపై చర్యలు తీసుకోవాలంటే స్పష్టమైన ఆధారాలు అవసరమని.. అందుకే సాంకేతిక లోపాలు, పరిపాలనా నిర్లక్ష్యం, ఉద్దేశపూర్వక అక్రమాలను కమిటీ తన విచారణలో వేర్వేరుగా గుర్తించడంతోపాటు ప్రభుత్వ ఖజానాకు ఎంతమేర నష్టం వాటిల్లిందనేది తేల్చనుంది. సుమారు 3,900 మంది ఉద్యోగుల వివరాలు పరిశీలనలో ఉన్నప్పటికీ, వారందరికీ డబుల్ జీతాలు చెల్లించారా? అలా చెల్లించి ఉంటే ఎంతకాలం చెల్లింపులు కొనసాగాయి? మొత్తం ఎంత సొమ్ము జమ అయింది?
అందులో ఎంత మొత్తాన్ని తిరిగి రాబట్టాల్సి ఉంటుంది? అనేది తేలాల్సి ఉంది. నష్టం నిర్ధారణైతే, నిబంధనల ప్రకారం సంబంధిత మొత్తాలను తిరిగి రాబట్టేందుకు ప్రభుత్వం చర్యలు చేపట్టే అవకాశం ఉంది. బాధ్యులపై క్రమశిక్షణ, క్రిమినల్ చర్యలు తీసుకునే చాన్స్ ఉన్నట్లు ఉద్యోగ వర్గాల్లో చర్చ కొనసాగుతున్నది.
తప్పిదమా?.. పర్యవేక్షణ లోపమా?
డబుల్ జీతాల వ్యవహారం ఉద్యోగుల శాలరీల చెల్లింపులకే పరిమితం కాకుండా ప్రభుత్వ పరిపాలనా వ్యవస్థలోని పర్యవేక్షణ లోపాలను కూడా ప్రశ్నిస్తున్నది. రాష్ట్రంలోని వివిధ శాఖల్లో లక్షలాది మంది ఉద్యోగులకు ప్రతి నెలా జీతాలు చెల్లించే వ్యవస్థలో ఒకే గుర్తింపు వివరాలతో పలు రికార్డులు ఎలా కొనసాగాయి? మరణించిన ఉద్యోగుల వివరాలు సకాలంలో ఎందుకు అప్‌డేట్ చేయలేదు?
జీతాల చెల్లింపులకు ముందు డేటా ధ్రువీకరణ వ్యవస్థలు సరిగా పనిచేశాయా? అనే అంశాలపై అనుమానాలు వ్యక్తమవుతున్నాయి. ప్రభుత్వ శాఖలు విడివిడిగా ఉద్యోగుల రికార్డులను నిర్వహిస్తున్నప్పుడు, వాటి మధ్య సమాచార సమన్వయం లేకపోతే ఇలాంటి సమస్యలు గుర్తించడానికి ఎక్కువ సమయం పట్టవచ్చు. ఒక శాఖలో ఉద్యోగి మరణించినా లేదా పదవీ విరమణ చేసినా..
ఆ సమాచారం జీతాల చెల్లింపు వ్యవస్థకు సకాలంలో చేరకపోతే అనవసర చెల్లింపులు జరిగే అవకాశం ఉంటుందని, అందుకే ఉద్యోగి గుర్తింపు వివరాలు, నియామకం, సర్వీసు స్థితి, మరణం, పదవీ విరమణ వంటి అంశాలను సమగ్రంగా అనుసంధానించే విధానం అవసరమని నిపుణులు అంటున్నారు. అహ్మద్ నదీమ్ కమిటీ నివేదిక అనంతరం ఉద్యోగుల జీతాల చెల్లింపుల వ్యవస్థలో మార్పులు చేసే అంశాన్ని ప్రభుత్వం పరిశీలించే అవకాశం ఉన్నట్టు తెలుస్తున్నది.
