రాష్ట్ర స్థాయి పోటీలకు సిద్దిపేట జిల్లా కబడ్డీ జట్ల ఎంపిక

గజ్వేల్: రాష్ట్ర స్థాయి కబడ్డీ పోటీల్లో పాల్గొనే సిద్దిపేట జిల్లా(Siddipet district) జట్ల ఎంపిక ప్రక్రియ పూర్తయింది. సిద్దిపేట జిల్లా కబడ్డీ అసోసియేషన్(Siddipet District Kabaddi Association) ఆధ్వర్యంలో సబ్‌-జూనియర్ బాలురు, బాలికలు, జూనియర్ బాలురు, బాలికల విభాగాల్లో జిల్లా స్థాయి ఎంపికలు నిర్వహించారు. ఈ ఎంపికల్లో సుమారు 450 మంది క్రీడాకారులు పాల్గొని తమ ప్రతిభను ప్రదర్శించారు. క్రీడాకారుల ఆటతీరు, ఫిట్‌నెస్, సాంకేతిక నైపుణ్యాలు, సామర్థ్యాలను పరిశీలించిన నిర్వాహకులు ప్రతిభావంతులను ఎంపిక చేశారు. నాలుగు విభాగాల్లో ఒక్కో విభాగం నుంచి 21 మంది చొప్పున మొత్తం 84 మంది క్రీడాకారులను ప్రత్యేక శిక్షణా శిబిరానికి ఎంపిక చేశారు.

శిక్షణా శిబిరంలో క్రీడాకారులకు కబడ్డీ(kabaddi)లో సాంకేతిక నైపుణ్యాలు, ఫిట్‌నెస్, వ్యూహాలు, ఆటతీరుపై ప్రత్యేక శిక్షణ ఇవ్వనున్నారు. శిబిరంలో చూపిన ప్రతిభ ఆధారంగా రాష్ట్ర స్థాయి పోటీల్లో పాల్గొనే తుది జిల్లా జట్లను ఎంపిక చేయనున్నారు. ఎంపికలను జిల్లా కబడ్డీ అసోసియేషన్ అధ్యక్షులు ఎన్.సి. సంతోష్ కుమార్, ప్రధాన కార్యదర్శి కుంటనోళ్ల శివ కుమార్ ఆధ్వర్యంలో నిర్వహించారు. కార్యక్రమాన్ని గజ్వేల్–ప్రజ్ఞాపూర్ మున్సిపల్ చైర్మన్ చందన రవీందర్, వైస్ చైర్మన్ పద్మాబాయి నర్సింగ్ రావు ప్రారంభించారు.

కార్యక్రమంలో కౌన్సిలర్లు బొగ్గుల చందు, భాగ్యలక్ష్మి కనకసేన, రాష్ట్రపతి అవార్డు గ్రహీత దేశబోయిన నర్సింహులు, గజ్వేల్ కోర్టు బార్ అసోసియేషన్ వైస్ ప్రెసిడెంట్ నరేష్ చారి, మాజీ అధ్యక్షులు పండరి, జిల్లా కబడ్డీ అసోసియేషన్ ఉపాధ్యక్షులు రమేష్, రాజు, సంయుక్త కార్యదర్శులు అంగడి నరేంద్రబాబు, చిల్లి మహేష్, చిన్న నర్సు, కరుణాకర్, కార్యవర్గ సభ్యులు తదితరులు పాల్గొన్నారు. రాష్ట్ర స్థాయి పోటీల్లో సిద్దిపేట జిల్లా జట్లు అత్యుత్తమ ప్రదర్శన కనబరిచేలా ఎంపికైన క్రీడాకారులకు నాణ్యమైన శిక్షణ అందించనున్నట్లు అసోసియేషన్ అధ్యక్ష, ప్రధాన కార్యదర్శులు తెలిపారు.