విద్యార్థుల చదువుపై ప్రత్యేక శ్రద్ధ.. పాఠశాలల్లో ఆకస్మిక తనిఖీలు
భద్రాద్రి కొత్తగూడెం జిల్లా, టేకులపల్లి (విజయక్రాంతి): ప్రాథమిక స్థాయి నుంచే విద్యార్థుల అభ్యసన సామర్థ్యాలను (Learning Skills) పెంపొందించేందుకు ఉపాధ్యాయులు ప్రత్యేక శ్రద్ధ వహించాలని సీఎస్ఎఫ్ సభ్యుడు అల్లూరి రెడ్డి, కాంప్లెక్స్ హెచ్ఎం మోహన్ రావు సూచించారు. బుధవారం వారు తడికలపూడి యూపీఎస్, టేకులపల్లి ప్రాథమిక పాఠశాలలను ఆకస్మికంగా తనిఖీ చేశారు.
ఈ సందర్భంగా మధ్యాహ్న భోజనం నాణ్యత, విద్యార్థులు, ఉపాధ్యాయుల హాజరు రికార్డులను పరిశీలించారు. టేకులపల్లి పాఠశాలలో మూడో తరగతి తెలుగు బోధనను స్వయంగా గమనించి, టీచర్ హ్యాండ్బుక్ (Teacher Handbook), బోధనోపకరణాలను వినియోగించాలని సూచించారు. పెండింగ్లో ఉన్న వర్క్షీట్లను పూర్తి చేయడంతోపాటు చదువులో వెనుకబడిన విద్యార్థులపై ప్రత్యేక దృష్టి సారించాలన్నారు.
అనంతరం ఉపాధ్యాయులతో నిర్వహించిన సమీక్షలో ఎఫ్ఎల్ఎన్ మిడ్లైన్ పరీక్షను (FLN Midline Assessment) విద్యార్థులందరికీ నిర్వహించాలని సూచించారు. గ్రంథాలయ పీరియడ్ను క్రమం తప్పకుండా చేపట్టాలని, వెనుకబడిన విద్యార్థులకు ప్రత్యేక బోధన (Remedial Classes) అందించాలని తెలిపారు. అర్హులైన విద్యార్థుల పేర్లను ఏఐ ఆధారిత ఆక్సెల్ (AXL Software)లో నమోదు చేయాలని ఆదేశించారు. కార్యక్రమంలో పాఠశాలల ప్రధానోపాధ్యాయులు, ఉపాధ్యాయులు పాల్గొన్నారు.