ఈ AIని Google ఎందుకు దాచింది?
న్యూఢిల్లీ: ఆర్టిఫిషియల్ ఇంటెలిజెన్స్(Artificial Intelligence) రంగంలో దూసుకెళ్తున్న Google.. తన అత్యంత శక్తివంతమైన AI మోడల్ విషయంలో మాత్రం ఆచితూచి అడుగులు వేస్తోంది. Gemini 4 Argon పేరుతో రూపొందించిన ఈ అధునాతన AI మోడల్‌ను ప్రస్తుతానికి సామాన్య ప్రజలకు అందుబాటులోకి తీసుకురావడం లేదు. సైబర్ దాడులకు ఈ టెక్నాలజీ దుర్వినియోగమయ్యే అవకాశాలను దృష్టిలో పెట్టుకుని.. తొలిదశలో ఎంపిక చేసిన సైబర్‌సెక్యూరిటీ నిపుణులకే యాక్సెస్ ఇవ్వాలని Google నిర్ణయించింది.
Google చీఫ్ AI ఆర్కిటెక్ట్ కొరే కవుక్చుయోగ్లు ప్రకారం.. ఇంతటి అధునాతన సామర్థ్యాలు ఉన్న AIని సురక్షితంగా విడుదల చేయాలంటే దశలవారీ విధానం అవసరం. అందులో భాగంగా వెటెడ్ సైబర్‌సెక్యూరిటీ నిపుణులు మోడల్‌ను పరీక్షించి, దాని సామర్థ్యాలు మరియు సంభావ్య ప్రమాదాలపై ఫీడ్‌బ్యాక్ ఇవ్వనున్నారు. అమెరికా ప్రభుత్వానికి కూడా ముందస్తు యాక్సెస్ అందించి, వారి సూచనలను సేకరించనున్నట్లు Google తెలిపింది.
Gemini 4 Argonకు సాఫ్ట్‌వేర్ ఇంజినీరింగ్, లీగల్, ఫైనాన్షియల్ పనులతో పాటు Cybersecurityలోనూ అధునాతన సామర్థ్యాలు ఉన్నాయని కంపెనీ పేర్కొంది. ముఖ్యంగా కీలకమైన సాఫ్ట్‌వేర్ లోపాలను గుర్తించి పరిష్కరించడంలో ఇది ప్రత్యేక సామర్థ్యాన్ని చూపినట్లు తెలిపింది. ప్రారంభ పరీక్షల్లో భాగంగా ప్రపంచవ్యాప్తంగా ఆసుపత్రుల్లో ఉపయోగించే సాఫ్ట్‌వేర్‌లో ఉన్న ఒక లోపాన్ని గుర్తించగా.. దాని కారణంగా సున్నితమైన వ్యక్తిగత సమాచారం బయటపడే అవకాశం ఉన్నట్లు గుర్తించినట్టు Google వెల్లడించింది.
అయితే ఇంతటి శక్తివంతమైన AI Model సైబర్ నేరగాళ్ల చేతుల్లోకి వెళ్తే పరిస్థితి ఎలా ఉంటుందనే ఆందోళన నిపుణుల్లో ఉంది. బ్యాంకులు, ఆసుపత్రులు, ప్రభుత్వ వ్యవస్థలపై సైబర్ దాడులకు అధునాతన AIని ఉపయోగించే ప్రమాదం ఉందని సైబర్‌సెక్యూరిటీ వర్గాలు హెచ్చరిస్తున్నాయి. అందుకే Argonలో సైబర్ దాడులు నిర్వహించడం లేదా రసాయన, జీవ, అణు ఆయుధాల తయారీకి సహాయపడే అభ్యర్థనలను తిరస్కరించే AI Safety safeguards ఏర్పాటు చేసినట్లు Google తెలిపింది.
అంతేకాదు.. యూజర్ ఉద్దేశానికి మించి AI తన సామర్థ్యాలను ఉపయోగించకుండా దాని ‘reasoning’ను పర్యవేక్షిస్తున్నట్లు కంపెనీ పేర్కొంది. AI మోడళ్లు ఊహించని విధంగా వ్యవహరించే misalignment ప్రమాదాన్ని తగ్గించడమే దీని ఉద్దేశం. మరోవైపు Anthropic, OpenAI వంటి సంస్థలు కూడా తమ అధునాతన AI మోడళ్లలో ఇలాంటి భద్రతా వ్యవస్థలను అమలు చేస్తున్నాయి. ఇటీవలి కాలంలో AI మోడళ్ల సైబర్ సామర్థ్యాలపై ఆందోళనలు పెరుగుతున్న నేపథ్యంలో Google తీసుకున్న ఈ నిర్ణయం ప్రాధాన్యత సంతరించుకుంది. AI మరింత శక్తివంతమవుతున్న కొద్దీ.. దాన్ని ఎవరికి, ఎప్పుడు, ఎంతవరకు అందుబాటులో ఉంచాలనే ప్రశ్న టెక్ ప్రపంచంలో కీలకంగా మారుతోంది.
