సంప్రదాయానికి డిజిటల్ టచ్
10-10-2026 | 05:09pm
కాలం మారుతోంది.. సాంకేతికత (Technology) పెరుగుతోంది.. చివరకు సంప్రదాయ ఆచారాలు సైతం వీడియో కాల్స్ (Video Calls) ద్వారా నిర్వహించే పరిస్థితులు కనిపిస్తున్నాయి. పితృదేవతలకు నిర్వహించే పిండ ప్రదాన కార్యక్రమాన్ని వీడియో కాల్ ద్వారా వీక్షించిన ఓ కుటుంబానికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.
పశ్చిమగోదావరి జిల్లా భీమవరంలో ఈ ఘటన చోటుచేసుకున్నట్లు సమాచారం. వెంప గ్రామానికి చెందిన సూర్యనారాయణ రాజు కుటుంబ సభ్యులు అమెరికాలో స్థిరపడటంతో, అక్కడి నుంచే వీడియో కాల్ ద్వారా పిండ ప్రదాన కార్యక్రమాన్ని వీక్షించారు.
సాధారణంగా పితృదేవతలకు పిండ ప్రదానం చేసే సమయంలో కుటుంబ సభ్యులు ప్రత్యక్షంగా పాల్గొని సంప్రదాయబద్ధంగా పూజలు నిర్వహిస్తుంటారు. అయితే, విదేశాల్లో నివసిస్తున్న వారు స్వదేశానికి రాలేని పరిస్థితుల్లో సాంకేతికతను ఉపయోగించుకుంటూ ఇలాంటి కార్యక్రమాలను వీక్షిస్తున్నారు (Rituals).
అయితే, వీడియో కాల్ ద్వారా పూజను వీక్షిస్తే పితృదేవతలకు శాంతి కలుగుతుందా? సంప్రదాయ ఆచారాల ప్రకారం పిండ ప్రదానానికి ఉన్న ప్రాధాన్యత ఏమిటి? అనే చర్చకు ఈ ఘటన దారితీస్తోంది. ఒకవైపు విదేశాల్లో ఉన్నా కుటుంబ సభ్యులు సంప్రదాయాలను కొనసాగించాలనే తపన కనిపిస్తుండగా, మరోవైపు ఆచారాల నిర్వహణపై భిన్నాభిప్రాయాలు వ్యక్తమవుతున్నాయి. ఏదేమైనా, సంప్రదాయాలు.. సాంకేతికత (Digital Technology) కలగలిసిన ఈ ఘటన నెటిజన్ల దృష్టిని ఆకర్షిస్తోంది.
