అభివృద్ధికి కొత్త దారి : సీఎం రేవంత్

హైదరాబాద్‌: దేశ ఆర్థిక ప్రగతిలో తెలంగాణను కీలక భాగస్వామిగా నిలపాలన్న లక్ష్యంతో రాష్ట్ర ప్రభుత్వం ముందుకు సాగుతోందని ముఖ్యమంత్రి రేవంత్ రెడ్డి(CM Revanth Reddy) తెలిపారు. 2047 నాటికి భారత్‌ను 30 ట్రిలియన్ డాలర్ల ఆర్థిక వ్యవస్థగా తీర్చిదిద్దాలన్న జాతీయ లక్ష్యంలో తెలంగాణ 10 శాతం వాటాను అందించాలనే సంకల్పంతో ఉన్నట్లు వెల్లడించారు.

అభివృద్ధికి హైదరాబాద్‌ కీలకం

భారత ఆర్థిక సంస్కరణలకు మాజీ ప్రధాని పీవీ నరసింహారావు(Former Prime Minister P. V. Narasimha Rao) అందించిన సేవలను సీఎం గుర్తుచేశారు. దేశంలో, ముఖ్యంగా హైదరాబాద్‌లో ఏరోస్పేస్ రంగం ఎదుగుదలకు రాజీవ్ గాంధీ హయాంలో పునాదులు పడ్డాయని పేర్కొన్నారు. తెలంగాణకు చెందిన పీవీ దేశ ఆర్థిక విధానాల్లో కీలక మార్పులకు శ్రీకారం చుట్టడం గర్వకారణమన్నారు.

RRRతో రీజియన్‌కు కొత్త ఊపు

హైదరాబాద్ చుట్టూ ప్రతిపాదిత రీజినల్ రింగ్ రోడ్ (RRR) నిర్మాణం నగరంతో పాటు పరిసర ప్రాంతాల అభివృద్ధికి గేమ్‌చేంజర్‌గా మారుతుందని రేవంత్ రెడ్డి ఆశాభావం వ్యక్తం చేశారు. మెరుగైన రవాణా అనుసంధానం, పెట్టుబడులకు అనుకూల వాతావరణం రాష్ట్ర ఆర్థిక పురోగతికి దోహదపడతాయని తెలిపారు.

కేంద్రంతో కలిసి అభివృద్ధి పథంలో..

తెలంగాణ ప్రగతి కోసం కేంద్ర ప్రభుత్వంతో సమన్వయంతో ముందుకు సాగుతున్నామని సీఎం చెప్పారు. రాష్ట్రంలో మరో రెండు విమానాశ్రయాలకు కేంద్రం అనుమతులు మంజూరు చేసిందని వెల్లడించారు. మౌలిక సదుపాయాల విస్తరణ, రవాణా సౌకర్యాల మెరుగుదలతో తెలంగాణ అభివృద్ధి లక్ష్యాలకు మరింత బలం చేకూరుతుందని పేర్కొన్నారు. 2047 వికసిత్ భారత్ లక్ష్యంలో తెలంగాణ తనదైన ముద్ర వేయాలన్నది రాష్ట్ర ప్రభుత్వ లక్ష్యం. హైదరాబాద్‌ను అభివృద్ధి కేంద్రంగా మలుస్తూ, రాష్ట్ర ఆర్థిక వాటాను పెంచుకోవడంపై ప్రభుత్వం దృష్టి సారిస్తోంది.