మియాపూర్ భూములపై ప్రభుత్వానికి అనుకూల తీర్పు!
మియాపూర్‌లోని 550 ఎకరాల భూముల వ్యవహారంలో సుప్రీంకోర్టు (Supreme Court) తెలంగాణ ప్రభుత్వానికి అనుకూలంగా తీర్పు ఇవ్వడం రాష్ట్రానికి పెద్ద విజయమని ముఖ్యమంత్రి రేవంత్ రెడ్డి అన్నారు. సుమారు రూ.50 వేల కోట్ల విలువైన ప్రభుత్వ భూములు అన్యాక్రాంతం కాకుండా న్యాయస్థానం తీర్పు ఇచ్చిందని తెలిపారు.
ఢిల్లీలో నిర్వహించిన మీడియా సమావేశంలో సీఎం మాట్లాడుతూ.. గత బీఆర్ఎస్ (BRS) ప్రభుత్వ హయాంలో కేసీఆర్ తన అనుచరుల ద్వారా తెలంగాణ ఆస్తులను కాజేసేందుకు కుట్ర చేశారని ఆరోపించారు. ప్రతిపక్షంలో ఉన్నప్పుడే కేసీఆర్ భూ ఆక్రమణలపై పోరాటం చేశామని, ఆయనకు సంబంధించిన చీకటి వ్యాపార లావాదేవీలను అప్పట్లోనే బయటపెట్టామని గుర్తుచేశారు.
మియాపూర్‌లోని 550 ఎకరాల భూముల రికార్డులను (Land Records) తారుమారు చేసి ఆక్రమించేందుకు ప్రయత్నాలు జరిగాయని విమర్శించారు. ఈ భూములను కాపాడేందుకు తమ ప్రభుత్వం న్యాయపోరాటం చేసిందని వెల్లడించారు.
అవసరమైతే ఈ భూములను విక్రయించి వచ్చే ఆదాయాన్ని రాష్ట్ర విద్యావ్యవస్థ అభివృద్ధికి, మహిళా సాధికారత (Women Empowerment)కు వినియోగిస్తామని సీఎం రేవంత్ రెడ్డి స్పష్టం చేశారు. తెలంగాణ ప్రజల ఆస్తులను కాపాడటమే తమ ప్రభుత్వ లక్ష్యమని అన్నారు.
