దొంగలకు చుక్కలు చూపించిన యువతి

ఐఫోన్ చోరీ.. స్కూటీపై దొంగలను వెంటాడిన యువతి.. ఫ్లైఓవర్‌పై హైడ్రామా!

న్యూఢిల్లీ: చేతిలో ఉన్న విలువైన ఫోన్‌ను దొంగలు లాక్కొని బైక్‌పై పరారయ్యారు. సాధారణంగా ఇలాంటి సమయంలో బాధితులు పోలీసులకు ఫిర్యాదు చేసి వెనక్కి తగ్గుతారు. కానీ ఢిల్లీకి చెందిన 24 ఏళ్ల యువతి మాత్రం అందుకు భిన్నంగా స్పందించింది. తన Apple iPhone 16 Proను ఎత్తుకెళ్లిన ఇద్దరు స్నాచర్లను స్కూటీపై వెంబడించింది. గాయాలైనా పట్టించుకోకుండా ఛేజ్ కొనసాగించి చివరకు వారిని పట్టించడంలో కీలక పాత్ర పోషించింది. ఈ ఘటన ప్రస్తుతం స్థానికంగా చర్చనీయాంశంగా మారింది.

క్లాసుల నుంచి ఇంటికి వెళ్తుండగా ఫోన్ స్నాచింగ్

ఢిల్లీకి చెందిన ఖుషీ మహేశ్వరి బుధవారం రాత్రి అశోక్ విహార్‌లో క్లాసులు ముగించుకుని స్కూటీపై ఇంటికి బయలుదేరింది. రాత్రి సుమారు 8:30 గంటల సమయంలో షాలిమార్ బాగ్ మెట్రో స్టేషన్ గేట్ నంబర్ 1 సమీపంలో బైక్‌పై వచ్చిన ఇద్దరు యువకులు ఆమె చేతిలోని iPhone 16 Proను ఒక్కసారిగా లాక్కున్నారు. ఈ ఘటనలో ఖుషీ బ్యాలెన్స్ కోల్పోయి రోడ్డుపై పడిపోయింది. అయినప్పటికీ వెంటనే తేరుకుని గట్టిగా కేకలు వేస్తూ దొంగల వెంట స్కూటీపై బయలుదేరింది. ఖుషీ వెంటపడుతుండటంతో నిందితులు బైక్ వేగం పెంచి పారిపోయేందుకు ప్రయత్నించారు. ఈ Chase ముకుంద్‌పూర్ వైపు వెళ్లే రింగ్ రోడ్ ఫ్లైఓవర్‌కు చేరుకుంది. అక్కడ Traffic నెమ్మదించడంతో యువతి వారి బైక్‌ను అడ్డుకునేందుకు ప్రయత్నించింది. ఈ క్రమంలో నిందితుల్లో ఒకరు ఆమె స్కూటీని తోసి కిందపడేసేందుకు యత్నించాడు. చివరకు జరిగిన తోపులాటలో రెండు వాహనాలు రోడ్డుపై పడిపోయాయి.

ఒకరిని స్థానికులు.. మరొకరిని పోలీసులు పట్టుకున్నారు

ఈ ఘటనను గమనించిన స్థానికులు వెంటనే స్పందించి ఒక నిందితుడిని పట్టుకున్నారు. మరో వ్యక్తి పోలీసుల నుంచి తప్పించుకునేందుకు ఫ్లైఓవర్‌పై నుంచి కిందకు దూకగా, అక్కడే ఉన్న పోలీసు సిబ్బంది అతడిని అదుపులోకి తీసుకున్నారు. నిందితులను భాల్స్వా డెయిరీ ప్రాంతానికి చెందిన సమీర్ (19), మోహిత్ (19)గా పోలీసులు గుర్తించారు. ఈ ఘటనలో ఖుషీకి గాయాలయ్యాయి. అయితే ఆమె ధైర్యంతో ఇద్దరు నిందితులు పోలీసులకు చిక్కారు.

ఫోన్‌తో పాటు మరో మూడు మొబైళ్లు స్వాధీనం

నిందితుల వద్ద నుంచి ఖుషీకి చెందిన ఐఫోన్‌ను పోలీసులు రికవరీ చేశారు. అంతేకాకుండా మరో మూడు మొబైల్ ఫోన్లను కూడా స్వాధీనం చేసుకున్నారు. వాటి వివరాలు పరిశీలించగా రెండు ఫోన్లు ఆదర్శ్ నగర్, జహంగీర్‌పురి పోలీస్ స్టేషన్ల పరిధిలో నమోదైన Theft Casesతో సంబంధం ఉన్నట్లు తేలింది. మూడో ఫోన్‌ను అదే రోజు ముకుంద్‌పూర్ ఫ్లైఓవర్‌పై స్నాచింగ్ చేసినట్లు ప్రాథమిక విచారణలో వెల్లడైంది. ఈ నేరానికి ఉపయోగించిన మోటార్‌సైకిల్ కూడా దొంగిలించిందేనని పోలీసుల దర్యాప్తులో బయటపడింది. ఆ బైక్‌పై గత ఆగస్టులో మధు విహార్ పోలీస్ స్టేషన్‌లో Theft Case నమోదైనట్లు అధికారులు తెలిపారు. ఖుషీ చూపిన ధైర్యసాహసాలను గుర్తించిన పోలీసులు ఆమెకు Appreciation Letter అందించి అభినందించారు. ఒక ఫోన్ చోరీతో మొదలైన ఘటన.. యువతి తెగువ, స్థానికుల సహకారం, పోలీసుల వేగవంతమైన స్పందనతో ఇద్దరు నిందితుల అరెస్టుకు దారితీసింది.