ఎన్‌హెచ్‌ఎం ఉద్యోగుల గోడు.. మంత్రి దృష్టికి సమస్యలు
కొల్లాపూర్, నవంబర్ 05 (విజయక్రాంతి): ఎన్‌హెచ్‌ఎం (National Health Mission) ఉద్యోగుల సమస్యలను పరిష్కరించి, కాంట్రాక్టు ఉద్యోగులకు ఉద్యోగ భద్రత (Job Security) కల్పించాలని మంత్రి జూపల్లి కృష్ణారావుకు ఏఎన్ఎంలు విజ్ఞప్తి చేశారు. గురువారం కొల్లాపూర్ పట్టణంలోని మంత్రి కార్యాలయంలో ఆయనను కలిసి తమ సమస్యలను వివరించారు.
22 ఏళ్లుగా ఆరోగ్యశాఖలో సేవలందిస్తున్న ఉద్యోగులకు తగిన వేతనాలు అందడం లేదని ఆవేదన వ్యక్తం చేశారు. ముఖ్యంగా సెక్యూరిటీ గార్డులకు కేవలం రూ.8,500 మాత్రమే చెల్లిస్తున్నారని తెలిపారు. ఫోర్త్ క్లాస్ సిబ్బందికి రూ.21 వేల వేతనం (Salary) చెల్లించాలని డిమాండ్ చేశారు.
సమాన పనికి సమాన వేతనం అమలు చేయడంతో పాటు కాంట్రాక్టు ఉద్యోగులకు ఉద్యోగ భద్రత కల్పించాలని కోరారు. ఈ సమస్యలను నేటి కేబినెట్ సమావేశంలో (Cabinet Meeting) ప్రస్తావించి పరిష్కారానికి కృషి చేయాలని మంత్రి జూపల్లి కృష్ణారావును విజ్ఞప్తి చేశారు.
ఈ కార్యక్రమంలో నాగర్‌కర్నూల్ జిల్లా జేఏసీ అధ్యక్షుడు బాలకృష్ణ, వనపర్తి జిల్లా ప్రధాన కార్యదర్శి ప్రమీల, నాగర్‌కర్నూల్ జిల్లా ప్రధాన కార్యదర్శి కుమార్, కొల్లాపూర్‌కు చెందిన గోపి, కట్ట మంజుల, ఏఎన్ఎంలు తదితరులు పాల్గొన్నారు.
