మీరాబాయి సరికొత్త చరిత్ర!

నాగోయా: భారత స్టార్ వెయిట్‌లిఫ్టర్ మీరాబాయి చాను ఎట్టకేలకు ఆసియా క్రీడల్లో(Asian Games 2026) పతకం సాధించారు. మహిళల 49 కేజీల విభాగంలో బుధవారం జరిగిన ఫైనల్లో ఆమె రజత పతకాన్ని కైవసం చేసుకున్నారు. దీంతో ఆమె సుదీర్ఘ కెరీర్‌లో ఆసియా క్రీడల పతకం కూడా చేరింది. మీరాబాయి(Mirabai Chanu) మొత్తం 198 కేజీలు ఎత్తారు. స్నాచ్‌లో 88 కేజీలు, క్లీన్ అండ్ జర్క్‌లో 111 కేజీలతో ఈ మార్కును అందుకున్నారు. ఉత్తర కొరియాకు చెందిన రి సాంగ్ గమ్ 215 కేజీలతో స్వర్ణం సాధించగా, ఇండోనేషియాకు చెందిన లులుక్ డయానా ట్రి విజయానా కాంస్య పతకం గెలిచారు.

ఈ రజతంతో ఆసియా క్రీడల్లో భారత్ వెయిట్‌లిఫ్టింగ్(Indian Weightlifting) పతకాల నిరీక్షణకు కూడా తెరపడింది. 1998లో కర్ణం మల్లేశ్వరి(Karnam Malleswari) తర్వాత ఆసియా క్రీడల వెయిట్‌లిఫ్టింగ్‌లో భారత్‌కు వచ్చిన తొలి పతకం ఇదే. ఇప్పటికే టోక్యో ఒలింపిక్స్‌లో(Tokyo Olympics) రజతం, ప్రపంచ ఛాంపియన్‌షిప్‌లో పతకాలు, కామన్వెల్త్ క్రీడల్లో స్వర్ణాలతో మెరిసిన మీరాబాయి ఖాతాలో ఇప్పుడు ఆసియా క్రీడల రజతం కూడా చేరింది. దీంతో అంతర్జాతీయ స్థాయిలో ఆమె సాధించిన ప్రధాన పతకాల జాబితాలో మరో కీలక ఘనత నమోదైంది. హాంగ్‌జౌ ఆసియా క్రీడల్లో(Hangzhou Asian Games) నాలుగో స్థానంతో పతకానికి దూరమైన చాను.. ఈసారి నాగోయాలో తన లక్ష్యాన్ని సాధించారు. 49 కేజీల విభాగంలో 198 కేజీల ప్రదర్శనతో రజతాన్ని సొంతం చేసుకుని భారత వెయిట్‌లిఫ్టింగ్‌కు మరో చారిత్రక అధ్యాయాన్ని జోడించారు.A