భూ వివాదాలకు చెక్
రీసర్వేతో భూ వివాదాలకు శాశ్వత పరిష్కారం
పరకాల,(విజయక్రాంతి): భూముల రీసర్వేతో భూ వివాదాలకు శాశ్వత పరిష్కారం లభించే అవకాశం ఉందని పరకాల ఎమ్మెల్యే రేవూరి ప్రకాష్ రెడ్డి అన్నారు. ప్రతి భూమిని క్షేత్రస్థాయిలో కొలిచి, నక్ష ప్రకారం పాస్బుక్స్ అందించే విధంగా రీసర్వే ప్రక్రియ కొనసాగుతుందని తెలిపారు. రైతులకు ఎలాంటి ఇబ్బందులు కలగకుండా అధికారులు సమన్వయంతో పనిచేయాలని సూచించారు.
ఆత్మకూరు మండలం అగ్రంపహాడ్ గ్రామంలో కొనసాగుతున్న భూ రీసర్వే కార్యక్రమాన్ని ఎమ్మెల్యే రేవూరి ప్రకాష్ రెడ్డి పరిశీలించారు. ఈ సందర్భంగా సర్వే జరుగుతున్న తీరును అధికారులను అడిగి తెలుసుకున్నారు. రైతుల భూములకు సంబంధించిన వివరాలను క్షేత్రస్థాయిలో సమగ్రంగా పరిశీలించి, పారదర్శకంగా నమోదు చేయాలని అధికారులకు సూచించారు.
రీసర్వే ప్రక్రియపై రైతులకు ఎప్పటికప్పుడు పూర్తి సమాచారాన్ని అందించాలని ఎమ్మెల్యే అధికారులను ఆదేశించారు. సర్వేకు సంబంధించి రైతులకు ఎలాంటి సందేహాలు, అభ్యంతరాలు తలెత్తకుండా ముందస్తు చర్యలు తీసుకోవాలని సూచించారు.
రైతులు తమ భూములకు సంబంధించి ఏవైనా అభ్యంతరాలు లేదా సందేహాలు వ్యక్తం చేస్తే వాటిని క్షేత్రస్థాయిలోనే పరిశీలించి, సాధ్యమైనంత త్వరగా పరిష్కరించాలని స్పష్టం చేశారు. రీసర్వే ప్రక్రియ సజావుగా సాగేందుకు రైతులు అధికారులకు అవసరమైన సహకారం అందించాలని కోరారు.
భూముల వివరాల నమోదులో ఖచ్చితత్వం, పారదర్శకతకు ప్రాధాన్యం ఇవ్వాలని ఎమ్మెల్యే సూచించారు. రీసర్వే పూర్తయిన తర్వాత భూములకు సంబంధించిన రికార్డులు మరింత స్పష్టంగా ఉండేలా చర్యలు తీసుకోవాలని అధికారులను ఆదేశించారు.
