వరద బాధితులకు అండగా సండ్ర

సత్తుపల్లి, నవంబర్ 6 (విజయక్రాంతి): సత్తుపల్లి పట్టణ శివారులోని కేసీఆర్ కాలనీ డబుల్ బెడ్‌రూమ్ ఇళ్లలో ఆకస్మిక వరదల కారణంగా తీవ్రంగా నష్టపోయిన కుటుంబాలకు బీఆర్ఎస్ రాష్ట్ర నాయకులు, మాజీ ఎమ్మెల్యే సండ్ర వెంకట వీరయ్య అండగా నిలిచారు. వరద బాధితులను ఆదుకునేందుకు ఒక్కో కుటుంబానికి 10 కిలోల బియ్యం, నిత్యావసర సరుకులు, దిండ్లు, దుప్పట్లు, పరుపులు అందజేశారు. ఒక్కో కుటుంబానికి రూ.5 వేల చొప్పున తక్షణ ఆర్థిక సాయం (Financial Assistance) అందించి భరోసా కల్పించారు.

ఈ సందర్భంగా సండ్ర వెంకట వీరయ్య మాట్లాడుతూ.. ఆకస్మిక వరదలతో సర్వం కోల్పోయిన బాధిత కుటుంబాలను ప్రభుత్వం తక్షణమే ఆదుకోవాలని కోరారు. ప్రతి బాధిత కుటుంబానికి రూ.50 వేల చొప్పున నష్టపరిహారం (Compensation) అందించాలని డిమాండ్ చేశారు.

కేసీఆర్ కాలనీ పక్కనే ఉన్న లారీ ట్రాన్స్‌పోర్ట్ కార్యాలయంలో వరదల కారణంగా 70కి పైగా లారీల ఇంజిన్లు దెబ్బతిని భారీ ఆస్తి నష్టం (Property Damage) సంభవించిందని తెలిపారు. లారీ యజమానులు కూడా తీవ్రంగా నష్టపోయారని, వారిని ఆదుకోవాల్సిన బాధ్యత ప్రభుత్వంపై ఉందన్నారు. వారికి సైతం తగిన పరిహారం అందించాలని కోరారు.

వరదలతో నష్టపోయిన పేద కుటుంబాలు, లారీ యజమానులను ప్రభుత్వం నిర్లక్ష్యం చేయకుండా తక్షణమే స్పందించి న్యాయం చేయాలని సండ్ర వెంకట వీరయ్య డిమాండ్ చేశారు.