మండలవ్యాప్తంగా ఘనంగా ప్రారంభమైన బతుకమ్మ సంబరాలు
వాంకిడి, అక్టోబర్ 10 (విజయక్రాంతి): తెలంగాణ సంస్కృతి, సంప్రదాయాలకు(Telangana culture and traditions) ప్రతీకగా నిలిచే బతుకమ్మ పండుగ సంబరాలు(Bathukamma celebrations) వాంకిడి మండల(Wankidi Mandal) వ్యాప్తంగా శనివారం ఘనంగా ప్రారంభమయ్యాయి. తొమ్మిది రోజులపాటు సాగే ఈ ఉత్సవాల్లో భాగంగా తొలిరోజైన ఎంగిలిపూల బతుకమ్మ వేడుకలతో మండల కేంద్రంతో పాటు గ్రామాలు రంగురంగుల పూల శోభతో మురిసిపోయాయి.
మహాలయ అమావాస్యను(Mahalaya Amavasya) పురస్కరించుకుని మహిళలు ఉదయం పితృదేవతలకు నైవేద్యాలు సమర్పించి, అనంతరం బతుకమ్మలను పేర్చారు. అడవులు, చేల గట్ల నుంచి సేకరించిన గునుగు, తంగేడు, కట్ల, బంతి, చామంతి తదితర పూలను గోపురాకారంలో పేర్చి, మధ్యలో పసుపు గౌరమ్మను ప్రతిష్ఠించి భక్తిశ్రద్ధలతో పూజలు నిర్వహించారు.
సాయంత్రం సంప్రదాయ దుస్తుల్లో ముస్తాబైన మహిళలు, యువతులు, చిన్నారులు బతుకమ్మలను చేతబూని గ్రామ కూడళ్లకు, ఆలయ ప్రాంగణాలకు చేరుకున్నారు. బతుకమ్మల చుట్టూ తిరుగుతూ జానపద గేయాలు పాడుతూ, చప్పట్లు కొడుతూ ఉత్సాహంగా వేడుకల్లో పాల్గొన్నారు. అనంతరం స్థానిక వాగులు, చెరువుల్లో బతుకమ్మలను నిమజ్జనం చేసి, ప్రసాదాలను పంచుకున్నారు. మండలవ్యాప్తంగా బతుకమ్మ సంబరాలు పండుగ వాతావరణాన్ని నింపాయి.
