గుడిపేట 13వ బెటాలియన్‌లో రెండో రోజు డీఐజీ వార్షిక తనిఖీలు
- అవుట్‌పోస్టులు, ఆసుపత్రి, సంక్షేమ విభాగాల పరిశీలన
- 'ఆపద మిత్ర' శిక్షణార్థులతో ముఖాముఖి
హాజీపూర్,(విజయక్రాంతి): తెలంగాణ స్పెషల్ పోలీస్ (Telangana Special Police) వార్షిక తనిఖీల్లో భాగంగా మంచిర్యాల జిల్లా హాజీపూర్ మండలం గుడిపేటలోని 13వ బెటాలియన్‌లో రెండో రోజైన శుక్ర వారం డీఐజీ (DIG) విస్తృతంగా పర్యటించారు. బెటాలియన్ భద్రతా ప్రమాణాలు, సిబ్బంది సంక్షేమం, అందుబాటులో ఉన్న మౌలిక వసతులను క్షేత్రస్థాయిలో స్వయంగా పరిశీలించారు. తొలుత బెటాలియన్ పరిధిలోని అవుట్‌పోస్టులను సందర్శించిన డీఐజీ, భద్రతా విధుల్లో ఉన్న సిబ్బంది పనితీరును అడిగి తెలుసుకున్నారు.
అనంతరం బెటాలియన్ వెల్ఫేర్ కాంప్లెక్స్, ఈసీసీ (ECC), సీపీఎస్ (CPS) క్యాంటీన్ స్టోర్లను తనిఖీ చేశారు. సిబ్బందికి, వారి కుటుంబాలకు నిత్యావసర సరుకులు, వస్తువులు సక్రమంగా అందుతున్నాయా లేదా అనే అంశాలపై ఆరా తీశారు. తర్వాత యూనిట్ మెడికల్ ఆసుపత్రిని సందర్శించిన డీఐజీ, అక్కడ అందుబాటులో ఉన్న అత్యాధునిక వైద్య పరికరాలను, అవి పనిచేస్తున్న తీరును పరిశీలించారు. ఆసుపత్రి సిబ్బంది ఎదుర్కొంటున్న సమస్యలు, వారి యోగక్షేమాలను అడిగి తెలుసుకున్నారు.
బెటాలియన్ సిబ్బందికి, వారి కుటుంబ సభ్యులకు మెరుగైన వైద్య సేవలు అందించడంలో ఎటువంటి లోటుపాట్లు లేకుండా చూసుకోవాలని వైద్యులకు సూచించారు. ఈ సందర్భంగా బెటాలియన్‌లో శిక్షణ పొందుతున్న 'ఆపద మిత్ర' శిక్షణార్థులతో డీఐజీ ప్రత్యేకంగా సమావేశమయ్యారు. విపత్తు నిర్వహణలో ప్రజలను ఆదుకునే ఈ గొప్ప శిక్షణకు ఎంపికైనందుకు వారిని అభినందిస్తూ, శుభాకాంక్షలు తెలిపారు. అత్యవసర సమయాల్లో ప్రాణాలను రక్షించేలా అంకితభావంతో శిక్షణ పూర్తిచేయాలని పిలుపునిచ్చారు.
అలాగే స్టేట్ డిజాస్టర్ రెస్పాన్స్ ఫోర్స్ (SDRF) సిబ్బంది వద్ద ఉన్న అధునాతన సహాయక పరికరాలను స్వయంగా పరిశీలించి, విపత్తుల సమయంలో వాటి వినియోగం, పనితీరుపై సిబ్బందిని వివరాలు అడిగి తెలుసుకున్నారు. ఈ తనిఖీ కార్యక్రమంలో అసిస్టెంట్ కమాండెంట్లు నాగభూషణం, ఆంజనేయ రెడ్డి, యూనిట్ మెడికల్ డాక్టర్ సంతోష్ సింగ్ తో పాటు బెటాలియన్ అధికారులు, వైద్య సిబ్బంది, ఇతర పోలీసు సిబ్బంది పాల్గొన్నారు.
