రామాయంపేట కరాటే కీర్తి పతాకం!

హైదరాబాద్ వేదికపై అదరగొట్టిన విద్యార్థులు.. 17 మందిలో 17 పతకాలు..

హైదరాబాద్‌లో జరిగిన 7వ నేషనల్ కరాటే ఛాంపియన్‌షిప్ టోర్నమెంట్‌(National Karate Championship Tournament)లో రామాయంపేట విద్యార్థులు సత్తాచాటారు. వరల్డ్ నాకామయ్ కరాటే అసోసియేషన్ ఆధ్వర్యంలో నిర్వహించిన ఈ పోటీల్లో రామాయంపేటకు చెందిన 17 మంది విద్యార్థులు పాల్గొని 9 గోల్డ్, 4 సిల్వర్, 4 బ్రాంజ్ మెడల్స్ సాధించి మొత్తం 17 పతకాలను తమ ఖాతాలో వేసుకున్నారు. చిన్నారుల అద్భుత ప్రతిభతో రామాయంపేట పేరు జాతీయ స్థాయిలో మార్మోగింది.

రామాయంపేట, సెప్టెంబర్ 20 (విజయక్రాంతి):

హైదరాబాద్ వేదికగా జరిగిన 7వ నేషనల్ కరాటే ఛాంపియన్‌షిప్ టోర్నమెంట్‌లో రామాయంపేట కరాటే విద్యార్థులు అద్భుత ప్రతిభ కనబరిచారు. వరల్డ్ నాకామయ్ కరాటే అసోసియేషన్ ఆధ్వర్యంలో నిర్వహించిన ఈ జాతీయ స్థాయి పోటీల్లో రామాయంపేట నుంచి 17 మంది విద్యార్థులు పాల్గొన్నారు.

పోటీల్లో 9 మంది గోల్డ్ మెడల్స్, 4 మంది సిల్వర్ మెడల్స్, మరో 4 మంది బ్రాంజ్ మెడల్స్ సాధించి మొత్తం 17 పతకాలను కైవసం చేసుకున్నారు. కఠోర సాధన, పట్టుదల, క్రమశిక్షణకు ఈ విజయాలు నిదర్శనంగా నిలిచాయి. జాతీయ స్థాయి వేదికపై రామాయంపేట విద్యార్థులు చూపిన ప్రతిభకు పలువురు అభినందనలు తెలిపారు.

ఈ సందర్భంగా రామాయంపేట కరాటే వ్యవస్థాపకులు రొయ్యల హరిప్రసాద్ విజేతలను అభినందించారు. భవిష్యత్తులో మరిన్ని జాతీయ, అంతర్జాతీయ పోటీల్లో రామాయంపేటకు పేరు తీసుకురావాలని ఆకాంక్షించారు. బ్లాక్ బెల్ట్ మాస్టర్ సంపత్ కుమార్ ఆధ్వర్యంలో విద్యార్థులు శిక్షణ పొందుతూ ఈ ఘనత సాధించడం విశేషం.