‘OM’ మూవీ రివ్యూ.. స్క్రీన్‌పై సెన్సేషన్!

20-11-2026 | 12:34pm

ధనుష్ నటనకు మమ్ముట్టి గాంభీర్యం తోడు.. ‘OM’ మూవీ టాక్!

ధనుష్, మమ్ముట్టి ఒకే సినిమాలో కనిపిస్తే అభిమానులకు పండగే! అందులోనూ ఎర్రచందనం స్మగ్లింగ్, అండర్‌కవర్ పోలీస్ ఆపరేషన్, క్రైమ్, ఎమోషన్స్ కలిస్తే ఆ సినిమాపై అంచనాలు మరింత పెరుగుతాయి. ‘అమరన్’తో ఆకట్టుకున్న దర్శకుడు రాజ్‌కుమార్ పెరియసామి తెరకెక్కించిన తాజా చిత్రం ‘OM’ (Operation Mole) ఈ అంశాలతో ప్రేక్షకుల ముందుకొచ్చింది. ధనుష్, మమ్ముట్టితో పాటు సాయి పల్లవి, శ్రీలీల, నసీరుద్దీన్ షా, ఇంద్రన్స్ కీలక పాత్రల్లో నటించారు. మరి ఈ Spy Action Thriller ప్రేక్షకులను ఎంతవరకు ఆకట్టుకుంది?

కథేంటి?

తిరుకుమరన్ అలియాస్ తిరు (ధనుష్) ఓ స్థానిక కార్యక్రమంలో ఎర్రచందనం స్మగ్లర్, రాజకీయ నాయకుడు బర్మా కార్తికేయన్ అలియాస్ సియా (మమ్ముట్టి) ప్రాణాలను కాపాడతాడు. దీంతో తిరుపై నమ్మకం పెంచుకున్న సియా అతడిని తన అనుచర బృందంలోకి తీసుకుంటాడు. సొంత తమ్ముడిలా చూసుకుంటాడు. కానీ ఇక్కడే అసలు ట్విస్ట్ మొదలవుతుంది. తిరు నిజానికి తిరువణ్ణామలైకి చెందిన అండర్‌కవర్ పోలీస్ అధికారి పళని. సియా నడిపిస్తున్న ఎర్రచందనం స్మగ్లింగ్ నెట్‌వర్క్‌ను కూల్చడమే అతడి అసలు లక్ష్యం. ఈ రహస్య ఆపరేషన్‌కు ‘OM’ (Operation Mole) అని పేరు పెడతారు. ఐపీఎస్ అధికారి నిత్యారెడ్డి (సాయి పల్లవి) ఈ మిషన్‌కు నాయకత్వం వహిస్తుంది. మరోవైపు పళని భార్య రోజా (శ్రీలీల), కొడుకు, తండ్రి తిరువణ్ణామలైలో ఉంటారు.

తన అసలు వృత్తి గురించి భార్యకు తెలియకుండా కుటుంబ బాధ్యతలు, పోలీస్ డ్యూటీ రెండింటినీ నిర్వహించేందుకు పళని ప్రయత్నిస్తుంటాడు. ఈ క్రమంలో అతడి వైవాహిక జీవితంలోనూ సమస్యలు మొదలవుతాయి. సియాకు దగ్గరవుతున్న కొద్దీ అతడిలోని మరో కోణం పళనికి కనిపిస్తుంది. మరోవైపు దుబాయ్‌లో ఉంటూ నేర సామ్రాజ్యాన్ని నడిపించే హమీద్ (నసీరుద్దీన్ షా) కూడా ఈ వ్యవహారంలో కీలకంగా మారతాడు. మరి పళని తన మిషన్‌ను పూర్తి చేశాడా? సియా, హమీద్ నెట్‌వర్క్‌ను కూల్చగలిగాడా? కుటుంబాన్ని కాపాడుకుంటూ ఆపరేషన్‌ను ఎలా కొనసాగించాడు? అన్నదే మిగతా కథ.

ఫస్ట్ హాఫ్ ఎలా ఉంది?

దాదాపు మూడు గంటల నిడివితో తెరకెక్కిన ఈ సినిమా కథను, పాత్రలను పరిచయం చేయడానికి ఎక్కువ సమయం తీసుకుంటుంది. తిరు, పళని, సియా పాత్రల నేపథ్యాలను దర్శకుడు నెమ్మదిగా ఆవిష్కరిస్తాడు. వీటితో పాటు పలు Subplots, ఇతర పాత్రలు కూడా కథలోకి వస్తాయి. దీంతో ఫస్ట్ హాఫ్ కొంత నెమ్మదిగా సాగుతుంది. అయితే ఇంటర్వెల్‌కు ముందు వచ్చే సీక్వెన్స్ మాత్రం ప్రేక్షకుల్లో ఉత్కంఠను పెంచుతుంది. ఎమోషన్, థ్రిల్ కలిసిన ఈ సన్నివేశం సెకండాఫ్‌పై ఆసక్తిని పెంచుతుంది.

సెకండాఫ్‌లో ఎమోషనల్ డ్రామా!

రెండో భాగంలో కథ మరింత ఆసక్తికరంగా మారినప్పటికీ Screenplay కొన్ని చోట్ల తడబడుతుంది. అండర్‌కవర్ ఆపరేషన్లు పోలీస్ అధికారుల వ్యక్తిగత జీవితాలపై ఎలాంటి ప్రభావం చూపిస్తాయో దర్శకుడు చూపించే ప్రయత్నం బాగుంది. అయితే కొన్ని ఎమోషనల్ సీన్లు సాగదీయడంతో సినిమా నిడివి పెరిగిన భావన కలుగుతుంది. Editing ఇంకాస్త క్రిస్పీగా ఉంటే కథనం మరింత వేగంగా సాగేది. అయినప్పటికీ తిరు, సియా పాత్రల మధ్య పెరిగే అనుబంధం ప్రేక్షకులను కథలో లీనమయ్యేలా చేస్తుంది.

నటీనటుల పెర్ఫార్మెన్స్

ఈ సినిమాకు ప్రధాన బలం ధనుష్, మమ్ముట్టి నటన. పళని పాత్రలో ధనుష్ తనదైన Intensity, Physical Performanceతో ఆకట్టుకుంటాడు. ముఖ్యంగా ఆయన నటించిన Single Shot Sequence తెరపై చూడదగ్గ హైలైట్‌గా నిలుస్తుంది. సియా పాత్రలో మమ్ముట్టి తన గంభీరమైన Screen Presenceతో సినిమాకు ప్రత్యేక ఆకర్షణగా నిలిచారు. క్రూరమైన స్మగ్లర్‌గా కనిపిస్తూనే ఫుట్‌బాల్‌పై ప్రేమ, ఓ చిన్నారి ఆరోగ్య సమస్య పట్ల చూపించే దయ వంటి అంశాలతో పాత్రకు మరో కోణాన్ని ఇచ్చారు. ధనుష్‌కు భార్యగా శ్రీలీల సహజమైన నటనతో మెప్పిస్తుంది. భార్యాభర్తల మధ్య వచ్చే చిన్నచిన్న అపార్థాలు, భావోద్వేగాలను చక్కగా పలికించింది. ఐపీఎస్ అధికారి నిత్యారెడ్డిగా సాయి పల్లవి తన పాత్రకు న్యాయం చేసింది. నసీరుద్దీన్ షా, ఇంద్రన్స్ తమ పాత్రల పరిధిలో ఆకట్టుకుంటారు.

టెక్నికల్ అంశాలు

సాంకేతికంగా సినిమా మంచి స్థాయిలో ఉంది. ధనుష్‌పై చిత్రీకరించిన Single Shot Sequence ప్రత్యేక ఆకర్షణ. మమ్ముట్టి కోర్టు సన్నివేశాలు కూడా డ్రామాటిక్‌గా, విజువల్‌గా బాగున్నాయి. సినిమాటోగ్రాఫర్ ఎజిల్ అరసు కె అడవుల అందాలను, స్మగ్లింగ్ ప్రపంచంలోని చీకటి కోణాలను తెరపై సమర్థంగా చూపించారు. సాయి అభ్యంకర్ అందించిన Music, ముఖ్యంగా Background Score ఉత్కంఠభరిత సన్నివేశాలకు బలాన్నిచ్చింది. అయితే కొన్ని సన్నివేశాల్లో ఎడిటింగ్ మరింత మెరుగ్గా ఉండాల్సింది.

ఫైనల్‌గా..

‘OM’లో ధనుష్, మమ్ముట్టి నటన ప్రధాన ఆకర్షణ. ఎర్రచందనం స్మగ్లింగ్ నేపథ్యం, అండర్‌కవర్ ఆపరేషన్, కుటుంబ భావోద్వేగాలను కలిపి దర్శకుడు ఓ ఆసక్తికరమైన కథను అందించాడు. కథనం కొన్ని చోట్ల నెమ్మదించినా, నటీనటుల పెర్ఫార్మెన్స్, ఎమోషనల్ సీన్లు, టెక్నికల్ అంశాలు సినిమాను ఆసక్తికరంగా నిలబెడతాయి. ముఖ్యంగా ధనుష్, మమ్ముట్టి అభిమానులకు ఈ సినిమా మంచి అనుభూతిని అందిస్తుంది. OM  3.5/5 rating

మరిన్ని వార్తలు